မွန်ပြည်နယ် ကျိုက်ထိုမြို့ကနေ ရေးမြို့နယ်ကို မဲဆွယ်စည်းရုံးရေးသွားတဲ့ ပြည်သူ့ရှေ့ဆောင်ပါတီ (PPP) ပြည်နယ်ဥက္ကဋ္ဌ ဒေါ်မြသီတာနဲ့ ပါတီဝင် ၃ ယောက် လမ်းမှာပျောက်သွားတာကြောင့် ရဲစခန်းမှာ လူပျောက်ဖွင့်ထားတယ်လို့ မြို့ခံတွေဆီက သိရပါတယ်။
စက်တင်ဘာ ၁၀ ရက်က ကျိုက်ထိုမြို့ကနေ ရေးမြို့နယ်ကို မဲဆွယ်စည်းရုံးရေးသွားတဲ့ PPP ပါတီ ပြည်နယ်ဥက္ကဋ္ဌ ဒေါ်မြသီတာ၊ ပါတီဝင် ကိုဟိန်းလင်းအောင်၊ ဒေါ်ခင်သီတာကျော်နဲ့ အမျိုးသမီးတယောက်တို့ဟာ သံဖြူဇရမ် - ရေး လမ်းမှာ ပျောက်ဆုံးသွားတာလို့ ကျိုက်ထိုမြို့ခံတယောက်က DVB ကို ပြောပါတယ်။
“စထွက်တုန်းက အဆက်အသွယ်ရတယ်၊ သံဖြူဇရပ်-ရေးလမ်းခွဲဘက်ရောက်မှ အဆက်အသွယ်ပြတ်သွားတာ။ ဖြစ်တဲ့နေ့ကတည်းက မိသားစုရော၊ ပါတီဝင်တွေရော လိုက်ရှာကြသေးတယ် မတွေ့ဘူး။ ကျိုက်ထိုရော၊ သံဖြူဇရပ် စခန်းမှာပါ လူပျောက်သဘောမျိုး အကြောင်းကြားထားတယ်။ နောက်ဆုံးရတဲ့သတင်းက လက်နက်ကိုင်အဖွဲ့တခုက ဖမ်းသွားတယ်လို့ သိရတယ်။ ဟုတ်မဟုတ်တော့ မသိရသေးဘူး” လို့ ပြောပါတယ်။
ရေးမြို့နယ်ပါတီရုံးခန်းဖွင့်ပွဲသွားတဲ့ PPP ပြည်နယ်ပါတီဥက္ကဋ္ဌ ဒေါ်မြသီတာနဲ့ ပါတီဝင် ၃ ယောက်ကို လက်နက်ကိုင်အဖွဲ့အစည်းတခုက သံဖြူဇရပ်- ရေးကားလမ်းမှာ ဖမ်းဆီးခဲ့တာဖြစ်ပြီး ပြည်နယ် ဒုဥက္ကဋ္ဌ ကို စာပို့ကြောင်း ပါတီဝင်တယောက်က DVB ကို ပြောပါတယ်။
“ဒေါ်မြသီတာတို့ကို လက်နက်ကိုင်အဖွဲ့တဖွဲ့ ဖမ်းပြီး သူတို့ထိန်းသိမ်းထားတယ်လို့ ဒုဥက္ကဋ္ဌကို Viber ကနေ စာပို့တယ်လို့ ပြောတယ်။ ဒါပေမဲ့ PPP က အခုချိန်ထိ မထုတ်ပြန်သေးဘူး။ ကျိုက်ထို ကျိုက်မရော နဲ့ သထုံဘက်က ပါတီဝင်တွေက အဲ့သတင်းကြားပြီး လန့်နေတယ်။”
လက်ရှိအချိန်ထိ PPP ပြည်နယ်ဥက္ကဋ္ဌ ဒေါ်မြသီတာနဲ့ ပါတီဝင် ၃ ယောက် ပျောက်ဆုံးနေတဲ့ ကိစ္စနဲ့ပတ်သက်ပြီး PPP ပါတီနဲ့ စစ်ကောင်စီဘက်က သတင်းထုတ်ပြန်ခြင်းမရှိသလို ဖမ်းဆီးသွားတဲ့ လက်နက်ကိုင်အဖွဲ့အစည်းကလည်း သတင်းထုတ်ပြန်တာ မရှိသေးပါဘူး။
စစ်အုပ်စုက ပြုလုပ်မယ့် ရွေးကောက်ပွဲပထမပိုင်းမှာ မြို့နယ် ၁၀၂ မြို့နယ်ပါဝင်ပြီး မွန်ပြည်နယ်က ကျိုက်ထို၊ ကျိုက်မရော၊ ချောင်းဆုံ၊ မော်လမြိုင် နဲ့ သထုံမြို့နယ် ၅ မြို့နယ်သာ ပါဝင်ပါတယ်။
