အကြမ်းဖက်စစ်တပ်ကို အပြီးသတ်အနိုင်ယူနိုင်ရေးအတွက် တပ်မှူးကြီးများ အစည်းအဝေးကို ကျင်းပခဲ့တယ်လို့ အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေး တပ်မတော် (PDF) စစ်ရုံးချုပ်က ဩဂုတ် ၂၈ ရက် ဒီနေ့ညမှာ ထုတ်ပြန်ပါတယ်။

ပြည်သူ့ခုခံတော်လှန်စစ်ရဲ့ စစ်ရေးအောင်ပွဲတွေ ဆက်လက်ရရှိနေစေရေး၊ ပြည်သူ့ကာကွယ်ရေး တပ်မတော်နဲ့ ပြည်သူ့ကာကွယ်ရေးအဖွဲ့တွေကို အမိန့်ပေးကွပ်ကဲမှု ကောင်းမွန်ပြီး ကျင့်ဝတ်လိုက်နာတဲ့ တပ်မတော်တရပ်အဖြစ် စနစ်တကျ ဆက်လက်တည်ဆောက်ရေး၊ အကြမ်းဖက်စစ်တပ်ကို အပြီးသတ်အနိုင်ယူနိုင်ရေးတို့အတွက် တပ်မှူးကြီးများ အစည်းအဝေးကို ၂၀၂၅ ခုနှစ်၊ သြဂုတ် ၂၃၊ ၂၄၊ ၂၅ ရက်က ကျင်းပခဲ့တယ်လို့ ဆိုပါတယ်။

အစည်းအဝေးကို စစ်ဦးစီးချုပ်၊ ဒုစစ်ဦးစီးချုပ်နဲ့ စစ်ရုံးချုပ်တာဝန်ရှိသူတွေ၊ အမှတ် ၁ စစ်ဒေသ စစ်ဒေသမှူး၊ ပြည်သူ့ကာကွယ်ရေးတပ်မတော် တပ်မှူးကြီးတွေဖြစ်ကြတဲ့ တိုင်းစစ်ဌာန ၁၀ ခုက တိုင်းကွပ်ကဲရေးမှူးနဲ့ ဒုတိယတိုင်းကွပ်ကဲရေးမှူးတွေ၊ ကာကွယ်ရေးဝန်ကြီးဌာန အကြီးတန်း အရာရှိတွေ တက်ရောက်ခဲ့ကြတယ်လို့ ဆိုပါတယ်။

အစည်းအဝေးမှာ တပ်မှူးကြီးတွေက ကိုယ့်ရဲ့တိုင်းစစ်ဌာနအလိုက် စစ်ရေးသုံးသပ်ချက် စာတမ်းတွေ တင်သွင်းခဲ့ကြပြီး လက်ရှိတော်လှန်ရေးအခြေအနေအပေါ် သုံးသပ်‌ဆွေးနွေးခဲ့ကြသလို ပြည်သူ့ကာကွယ်ရေးတပ်မတော်ရဲ့ ရှေ့လုပ်ငန်းစဉ်တွေကိုလည်း ဖော်ထုတ်ချမှတ်နိုင်ခဲ့တယ်လို့ သတင်းထုတ်ပြန်ပါတယ်။

လက်ရှိမှာ ပြည်သူ့ကာကွယ်ရေးတပ်မတော် စစ်ရုံးချုပ်ရဲ့ ကွပ်ကဲမှု‌အောက်မှာ စစ်ကိုင်းတိုင်းစစ်ဌာန၊ မန္တလေးတိုင်းစစ်ဌာန၊ မကွေးတိုင်းစစ်ဌာန၊ ရှမ်းတောင်-ကယား(ကရင်နီ) တိုင်းစစ်ဌာန၊ နေပြည်တော်တိုင်းစစ်ဌာန၊ ပဲခူးတိုင်းစစ်ဌာန၊ ရန်ကုန်တိုင်းစစ်ဌာန၊ ဧရာဝတီတိုင်းစစ်ဌာန၊ ‌‌‌‌‌‌‌‌‌‌‌‌‌‌‌တနင်္သာရီတိုင်းစစ်ဌာနနဲ့ အထူးတိုင်းစစ်ဌာနဆိုပြီး တိုင်းစစ်ဌာန ၁၀ ခုရှိပါတယ်။