ရန်ကုန်မြို့မှာ လက်ခံကျင်းပသွားမယ့် အာရှအမျိုးသမီး ယူ ၂၀ ခြေစစ်ပွဲမှာ မြန်မာအသင်းက အိန္ဒိယ၊ အင်ဒိုနီးရှား၊ တာ့မင်နစ္စတန်အသင်းတွေနဲ့ တွေ့ဆုံနေပါတယ်။
လာမယ့် သြဂုတ် ၆ ရက် စတင်မယ့် အာရှခြေစစ်ပွဲမှာ မြန်မာအသင်းပါဝင်တဲ့ အုပ်စု D ပွဲစဉ် ၆ ပွဲကို ရန်ကုန်က သုဝဏ္ဏကွင်းမှာ လက်ခံကျင်းပသွားမှာပါ။
အမျိုးသမီး အာရှယူ ၂၀ ခြေစစ်ပွဲမှာ အုပ်စု ၈ ခု ခွဲခြားထားပြီး အုပ်စုပထမ ၈ သင်းနဲ့ အကောင်းဆုံးအုပ်စုဒုတိယ ၃ သင်းသာ ခြေစစ်ပွဲအောင်မြင်မှာပါ။
မြန်မာယူ ၂၀ အမျိုးသမီးအသင်းက သြဂုတ် ၆ ရက်မှာ တာ့မင်နစ္စတန်နဲ့ စတင်ယှဉ်ပြိုင်ရမှာဖြစ်ပြီး သြဂုတ် ၈ ရက်မှာ အင်ဒိုနီးရှား၊ သြဂုတ် ၁၀ ရက်မှာ အိန္ဒိယအသင်းတွေနဲ့ ယှဉ်ပြိုင်သွားရမှာ ဖြစ်ပါတယ်။
၂၀၀၂ ခုနှစ်က စတင်ပြီး ယူ ၁၉ ပြိုင်ပွဲအဖြစ် ၂ နှစ်တကြိမ်နဲ့ စတင်ခဲ့တဲ့ အာရှအမျိုးသမီးပြိုင်ပွဲမှာ မြန်မာယူ ၁၉ အသင်းက ၄ ကြိမ် ပါဝင်ယှဉ်ပြိုင်ခဲ့ဖူးပြီး ၄ ကြိမ်စလုံး အုပ်စုအဆင့်တွေနဲ့သာ ကျေနပ်ခဲ့ရပါတယ်။
