ချင်းပြည်နယ် ပလက်ဝမြို့နယ် ရွှေလိုက်ဝကျေးရွာမှာ ကျောင်းဆရာတယောက် ချောင်းကို ဖြတ်ကူးစဉ် ရေစီးနဲ့အတူ မျောပါပျောက်ဆုံးနေကြောင်း ဒေသခံတွေက ပြောပါတယ်။

ကျောင်းဆရာဟာ ဇူလိုင် ၂၆ ရက် ညနေ ၇ နာရီခွဲလောက်က ရာရီတောင်ကျေးရွာကနေ ရွှေလိုက်ဝကျေးရွာကိုအပြန် ရှင်းလက်ချောင်းကို ဖြတ်ကူးစဉ် ရွှေလိုက်ဝဆိပ်ကမ်း မရောက်မီမှာ ရေစီးနဲ့အတူ မျောပါပျောက်ဆုံးနေတာလို့ ဆိုပါတယ်။

ဒေသခံတယောက်က “ပျောက်ဆုံးနေသူက ရွှေလိုက်ဝကျေးရွာက အသက် ၁၈ နှစ်အရွယ် ကျောင်းဆရာ မောင်ကိုဇာ ဖြစ်တယ်လို့ သိရပါတယ်။ ချောင်းဖြတ်ကူးရင်း ပျောက်နေတာ” လို့  ပြောပါတယ်။

အဲ့ဒီ ရေနစ်ပျောက်ဆုံးနေတဲ့ ကျောင်းဆရာကို ဒီနေ့ ဇူလိုင် ၂၈ ရက်အထိ ရှာမတွေ့သေးဘဲ သက်ဆိုင်ရာ တာဝန်ရှိသူတွေနဲ့ ဒေသခံတွေ ပူးပေါင်းရှာဖွေနေတယ်လို့ ဆိုပါတယ်။

ချင်းပြည်နယ် ပလပ်ဝမြို့နယ်မှာ ဇူလိုင် ၂၅ ရက်ကစတင်ပြီး ဘင်္ဂလားပင်လယ်အော်မှာ ဖြစ်ခဲ့တဲ့ မုန်တိုင်းငယ်ရဲ့အရှိန်နဲ့ ဗီယက်နမ်နိုင်ငံကို ဖြတ်ကျော်ခဲ့တဲ့ ဝီဖာမုန်တိုင်းရဲ့ အရှိန်ကြောင့် မိုးရွာသွန်မှုအားကောင်းတာကြောင့် ရှင်းလက် ချောင်းရေကြီးနေတယ်လို့ သိရပါတယ်။

Photo - GEM