ကလပ်ကမ္ဘာ့ဖလားက အောင်မြင်မှုအရှိဆုံး ပြိုင်ပွဲဖြစ်ဟု ဖီဖာဥက္ကဋ္ဌပြော
DVB
·
July 14, 2025
လတ်တလော ကျင်းပပြီးစီးသွားတဲ့ ကလပ်ကမ္ဘာ့ဖလားပြိုင်ပွဲဟာ အောင်မြင်မှုအရှိဆုံး ဘောလုံးပြိုင်ပွဲ ဖြစ်ကြောင်း ဖီဖာဥက္ကဋ္ဌ အင်ဖက်တီနိုက ပြောပါတယ်။
တချို့ပွဲစဉ်တွေမှာ ပရိသတ်နည်းပါးမှု၊ ပွဲအရေအတွက်များပြားမှုနဲ့ ရာသီဥတုအခြေအနေတွေနဲ့ ပတ်သက်လို့ ဘောလုံးကျွမ်းကျင်သူတွေဘက်က ဝေဖန်နေတာနဲ့ပတ်သက်လို့ အင်ဖက်တီနိုက ပြန်လည်တုံ့ပြန်ခဲ့တာပါ။
ကလပ်ကမ္ဘာ့ဖလားပြိုင်ပွဲက ကလပ်ဘောလုံးလောကရဲ့ တိုးတက်လာမှုစတင်တဲ့ ပြိုင်ပွဲဖြစ်ပြီး တပွဲကိုပျမ်းမျှ အမေရိကန်ဒေါ်လာ ၃၃ သန်း ဝင်ငွေရရှိတဲ့ပြိုင်ပွဲ ဖြစ်သလို ပြိုင်ပွဲတပွဲလုံးမှာ ကန်ဒေါ်လာ ၂ ဘီလီယံအထိ ဝင်ငွေရရှိတဲ့ ပြိုင်ပွဲဖြစ်တယ်လို့ အင်ဖက်တီနိုက ပြောပါတယ်။
ဒါ့အပြင် တပွဲပျမ်းမျှ ပရိသတ် ၄၀,၀၀၀ လောက်ရှိလို့ ပရီးမီးယားလိဂ်ပြိုင်ပွဲ ပြီးရင် ပရိသတ်ကြည့်ရှုမှု အများဆုံး ကလပ်အသင်းပြိုင်ပွဲဖြစ်ကြောင်း အင်ဖက်တီနိုက ပြောသွားပါတယ်။
