စစ်ကိုင်းတိုင်း၊ မုံရွာမြို့မှာ စစ်ကောင်စီတပ်ရဲ့ မတရားပေါ်တာဆွဲ ဖမ်းဆီးခံရသူ ၂ ယောက်ဟာ လက်နက်ခဲယမ်းတွေနဲ့အတူ မေ ၂၇ ရက်မှာ အလင်းဝင်ရောက်လာခဲ့တယ်လို့ စစ်ကိုင်းတိုင်းအခြေစိုက် ပြည်သူ့ကာကွယ်ရေးတပ်ဖွဲ့ဆီကနေ သိရပါတယ်။

စစ်ကိုင်းတိုင်းအခြေစိုက် ပြည်သူ့ကာကွယ်ရေးတပ်ဖွဲ့တခုရဲ့ တာဝန်ခံက “မုံရွာ နမခ ထဲကနေ အလင်းဝင်လာကြတာပါ။ ဒါပေမဲ့ သူတို့ ၂ ယောက်က ကျနော်တို့ဆီကို အရင်ဆက်သွယ်လာတာတော့ မဟုတ်ဘူး။ ဒို့အရေး Channel ဆီကို ဆက်သွယ်ပြီးတော့ ဒို့အရေး Channel ရဲ့ အတွင်းရေးမှူး မရွှေဂျူး ကမှတဆင့် ရပ်ကျေးပကဖ တဖွဲ့ဆီကို ချိတ်ဆက်ပေးခဲ့လို့ သွားရောက်ခေါ်ဆောင်ခဲ့ရတာပါ” လို့ ပြောပါတယ်။

အဆိုပါ တပ်သားသစ် ၂ ယောက်ဟာ MA1 သေနတ် ၂ လက်၊ ၃၆ ခွင်းဗုံး ၂ လုံး၊ နင်းမိုင်း ၂ လုံး၊ ၅.၅၆ ကျည်အတောင့် ၂၀၀ တို့နဲ့အတူ အလင်းဝင်ရောက်လာတာလို့ ဆိုပါတယ်။

စစ်ကိုင်းတိုင်း ပြည်သူ့ကာကွယ်ရေးတပ်ဖွဲ့ရဲ့ တာဝန်ရှိသူက “သူတို့ ၂ ယောက်က ဆွဲခံရကတည်းက ထွက်ပြေးဖို့ အကြိမ်ကြိမ်ကြိုးစားခဲ့တာ မအောင်မြင်ခဲ့ဘူးတဲ့။ စစ်သင်တန်းအပတ်စဥ် ၈ သင်တန်းဆင်းပြီး နမခ ထဲကို အပို့ခံလိုက်ရတော့လည်း ထွက်ပြေးဖို့ ကြိုးစားခဲ့ကြသေးတယ်။ အဲဒီ နမခထဲ ရောက်နေတာ ၅ လကြာမှ အခုလို အောင်မြင်ခဲ့တာလို့ သိရတယ်။ ထူးခြားမှုက သူတို့ ၂ ယောက်လုံးရဲ့ သဘောထားဟာ ကျနော်တို့ ပြည်သူ့ကာကွယ်ရေး တပ်ဖွဲ့ဝင်တွေနဲ့အတူ အကြမ်းဖက်စစ်တပ်ကို ပြန်တိုက်ဖို့ ဆုံးဖြတ်ချက်ချထားသူတွေ ဖြစ်တယ်။ အခုတော့ သူတို့ ၂ ယောက်ကို လက်ခံထားတဲ့ ရပ်ကျေးပကဖ အဖွဲ့ကပဲ ဆက်လက်တာဝန်ယူပြီးတော့ လုံခြုံတဲ့နေရာမှာ ထားပေးထားပါတယ်” လို့ DVB ကို ပြောပါတယ်။

အလင်းဝင်လာသူ ၂ ယောက်ကို ဆုကြေးငွေ ချီးမြှင့်ပေးဖို့အတွက်လည်း ဆက်လက် လုပ်ဆောင်နေတယ်လို့ ပါတယ်။

စစ်ကောင်စီလက်အောက်မှာ တာဝန်ထမ်းဆောင်နေကြသူတွေ အနေနဲ့လည်း စစ်ရေးအရှိန်တွေ မြှင့်တင်လာတော့မှာဖြစ်လို့ နီးစပ်တဲ့ ပြည်သူ့ကာကွယ်ရေးအဖွဲ့တွေနဲ့ အမြန်ဆုံး ချိတ်ဆက်ခိုလှုံ အလင်းဝင်ရောက်ကြဖို့ စစ်ကိုင်းတိုင်း ပြည်သူ့ကာကွယ်ရေးတပ်ဖွဲ့ တိုက်တွန်းထားပါတယ်။