မန္တလေးတိုင်း၊ သပိတ်ကျင်းမြို့နယ်၊ လိပ်ကျကျေးရွာကို စစ်ကောင်စီတပ်က မေ ၁၈ ရက်နဲ့ ၁၉ ရက်တွေမှာ ၂ ရက်ဆက်တိုက် ဗုံးကြဲတိုက်ခိုက်ခဲ့လို့ အရပ်သားပြည်သူတယောက် သေဆုံးကာ ၄ ယောက်ထက်မနည်း ဒဏ်ရာရရှိခဲ့သလို လူနေအိမ်တွေ ထိခိုက်ပျက်စီးခဲ့တယ်လို့ သိရပါတယ်။

ပြင်ဦးလွင်ခရိုင် ပြည်သူ့ကာကွယ်ရေးအဖွဲ့ရဲ့ ပြန်ကြားရေးတာဝန်ခံက “လိပ်ကျရွာကို ၂ ရက်အတွင်း လေကြောင်းတိုက်ခိုက်ခံရတာ ၃ ကြိမ် ဖြစ်ပါတယ်။ ပထမရက်မှာ တံတားဦးလေတပ်က တက်လာတဲ့ ဂျက်ဖိုက်တာက လိပ်ကျရွာနားက ရွှေလုပ်ကွက်ထဲကို ပေါင် ၃၀၀ ဗုံးတလုံး ကြဲသွားပြီးတော့ နောက်ရက်မှာလည်း အဲဒီရွှေလုပ်ကွက်ထဲကိုပဲ မိတ္ထီလာ ရှမ်းတဲလေတပ်က တက်လာတဲ့ ဂျက်ဖိုက်တာနဲ့ ပေါင် ၃၀၀ ဗုံးတွေ ၂ ကြိမ် ထပ်ကြဲသွားတာပါ” လို့ ပြောပါတယ်။

ဗုံးကြဲတိုက်ခိုက်ခံရတဲ့အတွက် ရွှေလုပ်သား အမျိုးသားတယောက် သေဆုံးခဲ့သလို ပြည်သူ ၄ ယောက်ထက်မနည်းလည်း ထိခိုက်ဒဏ်ရာရရှိခဲ့ပြီး လူနေအိမ် ၇ လုံးလောက်နဲ့ ပြည်သူပိုင် မော်တော်ယာဥ်တွေလည်း ပျက်စီးခဲ့တယ်လို့ သူက ဆက်ပြောပါတယ်။

စစ်ကောင်စီတပ်ဟာ အဆိုပါ ရွှေလုပ်ကွက်ကို မေ ၁၈ ရက် ည ၇ နာရီဝန်းကျင်မှာ တကြိမ်၊ မေ ၁၉ ရက် မနက် ၁၀ နာရီခွဲဝန်းကျင်မှာ ၂ ကြိမ်၊ စုစုပေါင်း ၃ ကြိမ် ဗုံးကြဲတိုက်ခိုက်သွားတာလို့ ဆိုပါတယ်။

သပိတ်ကျင်းမြို့နယ် ပကဖ တာဝန်ခံ ကိုနဂါးနီက “တိုက်ပွဲမဖြစ်ဘဲနဲ့ကို စစ်တပ်က ရည်ရွယ်ချက်ရှိရှိ လေကြောင်းတိုက်ခိုက်သွားတာပါဗျ။ အခုရက်ပိုင်း ကျနော်တို့ သပိတ်ကျင်းမြို့နယ်ထဲမှာ လေကြောင်းတိုက်ခိုက်ခံရတာတွေက ခပ်စိပ်စိပ်ဖြစ်လာနေတယ်။ အရင်ရက်ပိုင်းကလေးမှ လမ်းလယ်ကျစ်ရွာနဲ့ ၉ မိုင်ရွာကြားက စစ်ဘေးရှောင်တွေ စုနေကြတဲ့ စစ်ဘေးရှောင်စခန်းကို ဂျက်ဖိုက်တာနဲ့ ဗုံးကြဲခံခဲ့ရလို့ စစ်ဘေးရှောင်ပြည်သူ ၂ ယောက် သေဆုံးခဲ့ပြီးတော့ သံဃာတော်တပါးနဲ့ ကလေးငယ်တွေ ဒဏ်ရာရခဲ့ပါသေးတယ်” လို့ DVB ကို ပြောပါတယ်။

အာဏာသိမ်းစစ်တပ်ဟာ အရပ်သားပြည်သူအပေါ် ပစ်မှတ်ထားတဲ့ လေကြောင်းတိုက်ခိုက်မှုတွေ ဆက်တိုက်လုပ်ဆောင်နေလို့ ပြည်သူတွေအနေနဲ့ ဗုံးခိုကျင်းတွေထဲမှာ နေထိုင်ကြဖို့နဲ့ လေကြောင်းရန် သတိပေးချက်တွေကို သတိပြုလိုက်နာကြဖို့ တိုက်တွန်းထားတယ်လို့ ဆိုပါတယ်။

ပြီးခဲ့တဲ့ မေ ၁၀ ရက်ကလည်း သပိတ်ကျင်းမြို့နယ်မှာရှိတဲ့ ဇရပ်ကွင်းကျေးရွာ ဗုံးကြဲခံရလို့ ပြည်သူ ၅ ယောက် သေဆုံးခဲ့သလို ၁၀ ယောက်ထက်မနည်း ဒဏ်ရာရရှိခဲ့ကာ လူနေအိမ်တွေလည်း ထိခိုက်ပျက်စီးခဲ့ပါတယ်။

မေ ၇ ရက်ကလည်း သပိတ်ကျင်းမြို့နယ် တောင်ခြမ်းက ရေထွက်ကျေးရွာကို စစ်ကောင်စီတပ်က လေယာဥ်နဲ့ ထပ်မံဗုံးကြဲတိုက်ခိုက်ခဲ့တဲ့အတွက် ပြည်သူတယောက်သေဆုံးကာ ၁၀ ယောက်ထက်မနည်း ထိခိုက်ဒဏ်ရာရခဲ့ကြသလို လူနေအိမ် ၅ လုံးထက်မနည်း ပျက်စီးခဲ့သေးတယ်လို့ ဒေသခံတွေက ပြောပါတယ်။

စစ်ကောင်စီတပ်ဟာ မတ် ၂၈ ရက်နေ့ ငလျင်လှုပ်ခတ်ပြီးချိန်ကစပြီး အခုမေလကုန်ထိ အပစ်အခတ်ရပ်စဲ​ထားတယ်လို့ ကြေညာထားပေမဲ့ မတ် ၂၈ ရက်ကနေ မေ ၁၅ ရက်အထိ လေကြောင်း နဲ့ လက်နက်ကြီးတိုက်ခိုက်မှု အကြိမ်ရေ ၆၆၃ ကြိမ် ပြုလုပ်ခဲ့တာကြောင့် အရပ်သားပြည်သူတွေနဲ့ တော်လှန်ရေးတပ်ဖွဲ့ဝင် ၄၅၆ ယောက် သေဆုံးခဲ့ရတယ်လို့ မှတ်တမ်းတွေအရ သိရပါတယ်။