စစ်ကောင်စီတပ်ဟာ သဘာဝဘေးကြောင့်ဆိုပြီး ယာယီအပစ်အခတ်ရပ်စဲရေးကို မေ ၆ ရက်နေ့ကနေ ၃၁ ရက်နေ့အထိ သက်တမ်းတိုးခဲ့ပေမယ့် အဲဒီနေ့ကစပြီး TNLA ထိန်းချုပ်နယ်မြေကို ထိုးစစ်ဆင်တိုက်ခိုက်တာ ၈ ကြိမ်၊ လက်နက်ကြီးနဲ့ အကြိမ် ၁၀၀ ထက်မနည်း ပစ်ခတ်တိုက်ခိုက်ခဲ့တယ်လို့ TNLA ရဲ့ထုတ်ပြန်ချက်တွေအရ သိရပါတယ်။
စစ်ကောင်စီ အပစ်ရပ်သက်တမ်းတိုးတယ်လို့ ထုတ်ပြန်တဲ့ မေ ၆ ရက်နေ့က TNLA ထိန်းချုပ်နယ်မြေ နောင်ချိုမြို့နယ်၊ သရက်ချိုကျေးရွာက TNLA တပ်စခန်းကို စစ်ကောင်စီတပ်က ထိုးစစ်ဆင်တိုက်ခိုက်လို့ နှစ်ဖက်အပြန်အလှန် ပစ်ခတ်မှုဖြစ်ခဲ့ပါတယ်။
မေ ၈ ရက်နေ့မှာလည်း စစ်ကောင်စီရဲ့ ၉၀၂ အမြောက်တပ်က TNLA ထိန်းချုပ်နယ်မြေ နောင်ချိုမြို့နယ်၊ သရက်ချိုကျေးရွာထဲက မင်္ဂလာဆောင်ကျင်းပနေတဲ့နေရာကို လက်နက်ကြီးနဲ့ ပစ်ခတ်တိုက်ခိုက်ခဲ့တာကြောင့် အသက် ၅ နှစ်အရွယ် ကလေးတယောက်အပါအဝင် ဒေသခံ ၄ ယောက်သေဆုံးခဲ့ပြီး ၇ ယောက်ထိခိုက်ဒဏ်ရာရခဲ့ပါတယ်။
TNLA ရဲ့ ထုတ်ပြန်ချက်တွေအရ မေ ၆ ရက်နေ့ကနေ ၉ ရက်နေ့အထိ စစ်ကောင်စီတပ်က ထိုးစစ်ဆင်တိုက်ခိုက်မှု ၈ ကြိမ် ရှိခဲ့ပါတယ်။
မေ ၆ ရက်နေ့ကနေ ၉ ရက်နေ့အထိ TNLA ထိန်းချုပ်နယ်မြေတွေကို စစ်ကောင်စီတပ်က ဂျက်ဖိုက်တာနဲ့ ဗုံး ၂ လုံးကြဲချတိုက်ခိုက်ခဲ့ပြီး ဒရုန်းနဲ့ ဗုံး ၃၀ ကျော်ချပြီး တိုက်ခိုက်ခဲ့တယ်လို့ TNLA ရဲ့ ထုတ်ပြန်ချက်တွေကဆိုပါတယ်။
ဒါ့အပြင် လက်နက်ကြီးနဲ့ အကြိမ်ပေါင်း ၁၀၀ နီးပါး၊ အဆိပ်ငွေ့ဗုံးပေါင်း ၃၀ ကျော်နဲ့ တိုက်ခိုက်ခဲ့တယ်လို့ TNLA ရဲ့ ထုတ်ပြန်ချက်တွေအရ သိရပါတယ်။
စစ်ကောင်စီတပ်က အပစ်ရပ်သက်တမ်း ၁ လ ထပ်တိုးထားပေမယ့်လည်း အခုလို ဗုံးကြဲတိုက်ခိုက်နေတဲ့အတွက် လေကြောင်း၊ ဒရုန်း၊ လက်နက်ကြီး ပစ်ခတ်တိုက်ခိုက်မှုရန်က ရှောင်ရှားနိုင်ဖို့ စစ်ရေးသတိအမြဲရှိကြဖို့လည်း TNLA က သတိပေးထုတ်ပြန်ထားပါတယ်။
TNLA အပါအဝင် ညီနောင်မဟာမိတ် ၃ ဖွဲ့ကလည်း ငလျင်ဒဏ်သင့်ပြည်သူတွေနဲ့ လူသားချင်း စာနာထောက်ထားရေးလုပ်ငန်းတွေ ဆက်ပြီးလုပ်ဆောင်နိုင်ဖို့ တိုက်ပွဲဖြစ်ပွားနေတဲ့နေရာတွေမှာ ထိုးစစ်ဆင်မှာမဟုတ်ဘဲ တဖက်သတ်အပစ်ရပ်ကာလကို နောက်ထပ် ၁ လ သက်တမ်းတိုးတယ်လို့ မေ ၁ ရက်နေ့မှာ ထုတ်ပြန်ထားပါတယ်။
TNLA ရဲ့ သတင်းနဲ့ပြန်ကြားရေး တာဝန်ခံ လွေးယေဦးကတော့ စစ်ကောင်စီက ယာယီအပစ်ရပ်ထားတဲ့ကာလမှာ လေကြောင်းတိုက်ခိုက်တာတွေ၊ ထိုးစစ်ဆင်တာတွေ ပိုလုပ်လာတာကြောင့် ဒီအခြေအနေတွေကို လက်ရှိအချိန်မှာစောင့်ကြည့်နေတယ်လို့ မေ ၄ ရက်နေ့က ပြုလုပ်တဲ့ သတင်းစာရှင်းလင်းပွဲမှာ ပြောဆိုခဲ့ပါတယ်။
သူတို့အနေနဲ့ မေ ၁ လတာ အပစ်ရပ်ထားတဲ့အတွက် ထိုးစစ်ဆင်မှာမဟုတ်သေးသလို စစ်ကောင်စီရဲ့ လှုပ်ရှားမှုကို မိမိကိုယ်ကိုခုခံကာကွယ်ဖို့တော့ ဆောင်ရွက်မယ်လို့လည်း ပြောပါတယ်။
