ရှမ်းပြည်နယ်မြောက်ပိုင်း၊ နောင်ချိုမြို့နယ်ထဲက နမ့်ဆောင်ဟူးရွာထဲကို စစ်ကောင်စီတပ်က ဧပြီ ၅ ရက်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် နေအိမ် ၄ လုံး ပျက်စီးခဲ့ရတယ်လို့ ဒေသခံတွေက ပြောပါတယ်။
“ရွာကိုကြဲတာ၊ မနေ့ညက ၃ လုံးကြဲချတယ်။ လေယာဥ်ကြဲတဲ့နေရာက တိုက်ပွဲနေရာလည်း မဟုတ်ဘူး။”
စစ်ကောင်စီတပ်က ငလျင်ကြောင့် ၂၁ ကြာ အပစ်အခတ်ရပ်စဲမယ်လို့ ပြောပေမဲ့ အရပ်သားပြည်သူတွေ ရှိရာနေရာကို ဗုံးကြဲနေဆဲပဲ ဖြစ်ပါတယ်။
ဓနုပြည်သူ့လွတ်မြောက်ရေးတပ်တော် (DPLA) ဥက္ကဋ္ဌ ကိုထွန်းထွန်းနိုင်က “မင်းအောင်လှိုင်စကားကတော့ ဘာတလုံးမှကို ယုံစရာမရှိဘူး။ လက်တွေ့လည်း အများကြီး။ ၄ နှစ်ကျော်တောင်မကဘူး နှစ်ပေါင်း ၆၀ ကျော်ပြီ။ ယုံစရာစကားလည်း မရှိပါဘူးပေါ့လေ” လို့ ပြောပါတယ်။
ပြီးခဲ့တဲ့ ၂၀၂၄ ဇူလိုင်လအတွင်း TNLA ပူးပေါင်းတပ်တွေက နောင်ချိုမြို့သိမ်းတိုက်ပွဲပြီးချိန်မှာ စစ်ကောင်စီက နမ့်ဆောင်ဟူးရွာထဲကို လေကြောင်းကနေ ဗုံးကြဲတိုက်ခိုက်ခဲ့ပြီး ခုတခေါက်ကတော့ ဒုတိယအကြိမ်ဖြစ်တယ်လို့ သိရပါတယ်။
