မန္တလေးမြို့၊ မဟာအောင်မြေမြို့နယ်၊ စိန်ပန်းရပ်မှာ မတ် ၂၈ ရက် နေ့လယ်ပိုင်းက ငလျင်လှုပ်ချိန် မီးလောင်မှုဖြစ်ပွားခဲ့လို့ လူနေအိမ်ခြေ ၈၀၀ နီးပါး မီးလောင်ဆုံးရှုံးခဲ့ရပြီး မီးဘေးဒုက္ခရောက်နေတဲ့ ပြည်သူတွေ အကူအညီလိုအပ်နေတယ်လို့   လူမှုကူညီရေးအဖွဲ့တွေဆီကနေ သိရပါတယ်။

မန္တလေးအခြေစိုက် လူမှုကူညီရေးအဖွဲ့တခုရဲ့ တာဝန်ခံတယောက်က “စိန်ပန်းရပ် မီးလောင်တာက နည်းနည်းထူးဆန်းတယ်။ ဆိုလိုတာကဗျာ အဲဒီနေရာက အရင် အမှိုက်ပုံဟောင်းကြီးပေါ့။ ငလျင်လှုပ်တော့ မြေအောက်က ဓာတ်ငွေ့တွေ ထွက်လာပြီးတော့ မီးတွေထတောက်ရင်း မီးလောင်တာလို့တော့ ပြောကြတာပဲ။ အခုနောက်ပိုင်း ၁၅ နှစ်၊ အနှစ် ၂၀ လောက်မှာ အဲဒီ အမှိုက်ပုံအဟောင်းကြီးပေါ်မှာ လူနေအိမ်တွေ ဆောက်ကြတယ်။ တဖြည်းဖြည်း များလာကြပြီး အိမ်တွေကလည်း အရမ်းများလာတယ်။ လူနေတာလည်း အရမ်းသိပ်သည်းလာတာပေါ့ဗျာ။ မီးဘေးသင့်တဲ့ အိမ်ခြေအရေအတွက်က ၇၀၀ နဲ့ ၈၀၀ ကြားရှိတယ်။ မီးဘေးသင့်ပြည်သူက ၃,၀၀၀ ကျော်ရှိတယ်” လို့ ပြောပါတယ်။

မန္တလေးမြို့ဟာ မတ် ၂၈ ရက် နေ့လယ်ပိုင်းက လှုပ်ခတ်ခဲ့တဲ့ ငလျင်ဒဏ်ကို အပြင်းအထန် ခံစားခဲ့ရသလို ဘုရားစေတီ၊ သာသနိကအဆောက်အအုံတွေနဲ့ လူနေအိမ်အများအပြားလည်း ပြိုကျပျက်စီးခဲ့ပြီးတဲ့နောက် ဧပြီ ၂ ရက်အထိ ရှာဖွေကယ်ဆယ်ရေးလုပ်ငန်းတွေကို ဆက်တိုက် လုပ်ဆောင်ဆဲဖြစ်ပါတယ်။

မန္တလေးမြို့မှာ ဧပြီ ၂ ရက်အထိ နောက်ဆက်တွဲငလျင်တွေ နေ့စဉ်လိုလို လှုပ်ခတ်နေတဲ့အတွက် မြို့ခံပြည်သူတွေဟာ ညစဉ်ညတိုင်း လမ်းတွေ၊ ကွင်းပြင်တွေနဲ့ နီးစပ်ရာ ဘေးလွတ်တဲ့ နေရာတွေမှာ အိပ်စက်နေကြရတယ်လို့လည်း ဆိုပါတယ်။

မဟာအောင်မြေမြို့ခံတယောက်က “ကျနော်တို့ မန္တလေးမြို့မှာက ငလျင်ဘေးရယ်၊ မီးဘေးရယ်တွေကြောင့် ဆိုင်တွေအများစုက ပိတ်နေတော့ ပိုက်ဆံရှိလို့ သောက်ရေသန့်တို့၊ စားစရာတို့ ဝယ်ဖို့ကို နည်းနည်းခက်ခဲလာတဲ့ အနေအထားရှိတယ်။ လျှပ်စစ်မီးက မရသေးတဲ့နေရာတွေ မရသေးဘူး။ ဖုန်းလိုင်းတွေလည်း မကောင်းဘူး။ တချို့ ပြိုကျတဲ့တိုက်တွေမှာဆိုရင် ရှာဖွေကယ်ဆယ်ရေးတွေ မလုပ်နိုင်ကြသေးလို့ အပုပ်နံ့ထွက်တဲ့ နေရာတွေ အများကြီးရှိသေးတယ်။ နောက်ပြီးတော့လည်း ရှာဖွေကယ်ဆယ်ရေးလုပ်ငန်းတွေကို လူမှုကူညီရေးအဖွဲ့တွေနဲ့ ပြည်သူတွေ ပေါင်းပြီးတော့ပဲ လုပ်ဆောင်နေကြရတာ။ စစ်တပ်ဘက်က ငလျင်ဘေးသင့်တဲ့ ပြည်သူတွေအပေါ်မှာ အင်တိုက်အားတိုက် ပါဝင်ကူညီတာ မတွေ့သေးဘူး။ အဓိကမကျတဲ့ အလုပ်တွေ လျှောက်လုပ်နေတယ်” လို့ DVB ကို ပြောပါတယ်။

စစ်ကောင်စီတပ်ဖွဲ့ဝင်တွေနဲ့ လက်အောက်ခံ ရဲတပ်ဖွဲ့ဝင်တွေဟာ ငလျင်ဘေးသင့်တဲ့ ပြည်သူတွေနဲ့ မီးဘေးသင့်ကြတဲ့ ပြည်သူတွေအတွက် ရှာဖွေကယ်ဆယ်ရေး ဆောင်ရွက်ပေးတာတွေ မပြုလုပ်ဘဲ ငလျင်ဒဏ်ကြောင့် ပျက်စီးသွားတဲ့ မဟာမြတ်မုနိဘုရားကြီးနဲ့ နန်းတော်မြို့ရိုး ပြိုကျတာတဲ့နေရာတွေမှာ အုတ်ခဲတွေ ဟန်ပြသယ်နေတာတွေ့ရလို့ ပြည်သူတွေကြား ဝေဖန်မှုတွေ မြင့်တက်နေ ပါတယ်။