ရုရှားကယ်ဆယ်ရေးအဖွဲ့ဟာ မန္တလေးမြို့မှာ ရွှေ့ပြောင်းနိုင်တဲ့ လေကြောင်းဆေးရုံတခုကို ဖွင့်ပြီး ငလျင်ကြောင့် ထိခိုက်ဒဏ်ရာရသူတွေကို ကုသပေးနေပါတယ်။
ငလျင်ကြောင့် အဆောက်အအုံထဲမှာ ပိတ်မိသူတွေ၊ အသက်ရှင်ကျန်ရစ်သူတွေကို အဓိက ကုသပေးဖို့ ရည်ရွယ်ပါတယ်။
ရွှေ့ပြောင်းနိုင်တဲ့ လေကြောင်းဆေးရုံနဲ့ပတ်သက်ပြီး ရုရှားကယ်ဆယ်ရေးအဖွဲ့ခေါင်းဆောင် ဗိုရွန်ဆော့ဗ်က အခုလို ပြောပြပါတယ်။
“ဒီနေ့ ကျနော်တို့ ရွှေ့ပြောင်းနိုင်တဲ့ လေကြောင်းဆေးရုံကို စတင်ခဲ့ပါတယ်။ ကျနော်တို့မှာ လူနာတွေရှိပါတယ်။ ငလျင်ကြောင့် ထိခိုက်ဒဏ်ရာရသူတွေထဲမှာ ထိရှတာတွေ၊ အတွင်းကြေတာတွေ၊ ဖိမိတာမျိုးတွေလို ဒဏ်ရာတွေကို ကုသပေးပါတယ်။”
ဒီရွှေ့ပြောင်းလေကြောင်းဆေးရုံမှာ ကုသပေးနိုင်တဲ့ ဒဏ်ရာအခြေအနေကို မေ့ဆေးဆရာဝန် ဘီလင်စကီးက “ဒီဆေးရုံမှာ ဌာနတွေ အစုံရှိပါတယ်။ ကျနော်တို့ဆီမှာ သတိပြန်လည်လာအောင် ကုသပေးနိုင်မှုတွေ၊ ခွဲစိတ်မှုတွေ၊ ပြင်းထန်တဲ့လူနာကို ကုသမှုတွေ၊ ကုထုံးဆိုင်ရာ နေရာတွေ ရှိပါတယ်။ ဘာရောဂါလဲဆိုတာ ဖော်ထုတ်ဖို့လိုအပ်တာနဲ့ ကုသမှုတွေ ပြုလုပ်ရမှာပါ။ အရေးပေါ်ဖြစ်နေတဲ့ ထိခိုက်မိသူ ၇၀ ကို ဆေးကုသမှုတွေ ပေးပြီးပါပြီ” လို့ ပြောပါတယ်။
ငလျင်ကြောင့် လူပေါင်း ၄,၅၂၁ ယောက် ဒဏ်ရာရထားတယ်လို့ စစ်ကောင်စီက ရုပ်သံထုတ်လွှင့်မှုတွေမှာ ဖော်ပြထားပါတယ်။ လက်ရှိအချိန်မှာ မန္တလေးမြို့ ဆေးရုံတွေမှာလည်း ဆေးကုတဲ့သူတွေနဲ့ ပြည့်နှက်နေတာ တွေ့ရပါတယ်။
မတ်လ ၂၈ ရက် နေ့လယ်က လှုပ်ခတ်ခဲ့တဲ့ ငလျင်ဟာ ရာစုနှစ်အတွင်း အရှေ့တောင်အာရှမှာ အပြင်းထန်ဆုံး ငလျင်တခု ဖြစ်ပါတယ်။
Source : Reuters
