တရုတ်နိုင်ငံက ထိုင်ဝမ်ကျွန်းရဲ့မြောက်၊ တောင်နဲ့ အရှေ့ဘက်ကမ်းရိုးတန်းတဝိုက်မှာ ဧပြီ ၁ ရက်က စစ်ရေးလေ့ကျင့်မှု အသစ်လုပ်ခဲ့လို့ အခုနှစ်မှာ ထိုင်ဝမ်ကျွန်းတဝိုက် ပိုပြီး စစ်ရေးလေ့ကျင့်လာနိုင်မယ်လို့ ထိုင်ဝမ်လေ့လာသုံးသပ်သူတယောက်က ပြောပါတယ်။
တရုတ်ပြည်မကြီးအစိုးရရဲ့ စစ်ရေးလေ့ကျင့်မှုဟာ ခွဲထွက်ရေးဝါဒကို ဆန့်ကျင်တဲ့ ပြင်းထန်တဲ့ သတိပေးချက် ဖြစ်တယ်လို့ တရုတ်က ပြောပါတယ်။
မနှစ်က စစ်ရေးလေ့ကျင့်ပုံနဲ့ မတူဘဲ တရုတ်ပြည်မကြီးအစိုးရကို ထပ်ခါတလဲ ဝေဖန်ခဲ့တဲ့ အမေရိကန် ကာကွယ်ရေးဝန်ကြီး ပိထ်ဟက်ဇက်ရဲ့ အာရှခရီးစဉ်အပြီး ထိုင်ဝမ်သမ္မတ လိုင်ချင်းတယ်ကို ဆန့်ကျင်တဲ့ တရုတ်စကား အသုံးအနှုန်းတွေ၊ အပြောအဆိုတွေ မြင့်တက်လာပြီးတဲ့နောက် တရုတ်က စစ်ရေးလေ့ကျင့်ခဲ့တာပါ။
တရုတ်နိုင်ငံဟာ အမေရိကန် ကာကွယ်ရေးဝန်ကြီးဆီ ပြင်းထန်တဲ့ သတင်းစကားတရပ် ပေးပို့ခဲ့ပြီး ထရမ့်ပ်ရဲ့ အစိုးရအဖွဲ့ဟာ အရှေ့အာရှမှာ ဖွံ့ဖြိုးဆဲအခြေအနေတွေနဲ့ ပတ်သက်လို့ အရေးကြီးပြီဆိုတဲ့ ခံစားချက်ရှိဖို့ လိုတယ်လို့ ထိုင်ဝမ် ထမ်ခန်းတက္ကသိုလ်က သံတမန်ရေးရာနဲ့ နိုင်ငံတကာဆက်ဆံရေး လက်ထောက်ပါမောက္ခ ချန်ယိဖန်က ပြောပါတယ်။
အာဏာရ ဒီမိုကရက်တစ် တိုးတက်ရေးပါတီ (DPP)ဟာ လာမယ့်နှစ် ပြည်တွင်းရွေးကောက်ပွဲတွေ မတိုင်မီ ပြည်တွင်းထောက်ခံမှုကို စုစည်းဖို့ တရုတ်ရဲ့ စစ်ရေးလေ့ကျင့်မှုတွေကို ‘ကောင်းမွန်တဲ့နည်းဗျူဟာ’ အဖြစ် အသုံးချသွားမယ်လို့ ချန်က ပြောပါတယ်။
ထိုင်ဝမ်အစိုးရက တရုတ်ရဲ့ စစ်ရေးလေ့ကျင့်မှုကို ရှုတ်ချခဲ့ပြီး တရုတ်ဟာ “ဒုက္ခပေးသူအဖြစ် နိုင်ငံတကာအသိုင်းအဝိုင်းက ကျယ်ကျယ်ပြန့်ပြန့် အသိအမှတ်ပြု ခံထားရတယ်” လို့ ထိုင်ဝမ်သမ္မတရုံးက ပြောပါတယ်။
ထိုင်ဝမ်အစိုးရက မိမိကိုယ်ကို ခုခံကာကွယ်နိုင်စွမ်းရှိတယ်လို့လည်း သူကပြောပါတယ်။ ထိုင်ဝမ်အစိုးရဟာ တရုတ်ပြည်မကြီးအစိုးရရဲ့ ထိုင်ဝမ်နဲ့ပတ်သက်တဲ့ အချုပ်အခြာအာဏာ ပိုင်ဆိုင်မှုကို ငြင်းဆိုထားပြီး ကျွန်းနေပြည်သူတွေကသာ သူတို့ရဲ့ အနာဂတ်ကို ဆုံးဖြတ်နိုင်တယ်လို့ ပြောထားပါတယ်။
Source : Reuters
