တရုတ်နိုင်ငံတောင်ပိုင်း၊ ကွမ်တုံပြည်နယ်၊ ကျန့်ကျန်းမြို့မှာ “Blue Strike-2025” ပူးတွဲရေတပ်လေ့ကျင့်မှုရဲ့ တစိတ်တပိုင်းအဖြစ် စနေနေ့နဲ့ တနင်္ဂနွေနေ့တွေမှာ တရုတ်နဲ့ ထိုင်းရေတပ်တို့က အကြမ်းဖက်မှု တိုက်ဖျက်ရေး စစ်ရေးလေ့ကျင့်ခဲ့ပါတယ်။

ဗုဒ္ဓဟူးနေ့က စတဲ့ဒီလေ့ကျင့်ခန်းဟာ ပူးတွဲလေ့ကျင့်ရေး အစီအစဉ်ရဲ့ ဆဋ္ဌမမြောက်အကြိမ်ဖြစ်ပြီး ၂ နိုင်ငံ ပူးပေါင်းဆောင်ရွက်မှုကို နက်နက်ရှိုင်းရှိုင်းမြှင့်တင်ဖို့နဲ့ ပေါင်းစပ် ဆောင်ရွက်မှု စွမ်းရည်တွေ မြှင့်တင်ဖို့ ရည်ရွယ်ထားပါတယ်။

အကြမ်းဖက်မှု တိုက်ဖျက်ရေး ပူးတွဲစစ်ရေးလေ့ကျင့်မှုအတွင်း တရုတ်နဲ့ ထိုင်း ရေတပ်သားတွေဟာ စစ်ဆင်ရေးတွေကို ဆောင်ရွက်ဖို့ အနီးကပ် ညှိနှိုင်းခဲ့ကြပါတယ်။ 

လေမှုတ်ကမ်းတက်ရေယာဉ်တွေနဲ့ ရဟတ်ယာဉ်တွေကနေ ဆင်းသက်ပြီးတဲ့နောက် စစ်သည် တွေဟာ အကြမ်းဖက်မှု နှိမ်နင်းရေး တပ်ဖွဲ့တခုကို အမြန်စုရုံးဖွဲ့စည်းပြီး အဆောက်အအုံ သိမ်းဆည်း ရမိရေး၊ အခန်းရှင်းလင်းရေး၊ ခဲယမ်းမီးကျောက်တွေ ထောက်ပံ့ရေးနဲ့ လူသားချင်းစာနာ ထောက်ထားမှုဆိုင်ရာ အကူအညီတွေပေးရေး အပါအဝင် စစ်ရေးလေ့ကျင့်မှုလုပ်ငန်းတွေကို ဆောင်ရွက်ခဲ့ပါတယ်။

ဘာသာစကား အတားအဆီးကို ကျော်လွှားပြီး ပေါင်းစပ်ညှိနှိုင်းမှု ပိုမိုကောင်းမွန်လာစေဖို့ ရေတပ်သားတွေက ချောချောမွေ့မွေ့ အကောင်အထည် ဖော်နိုင်တာ သေချာစေဖို့ လေ့ကျင့်မှုအတွင်း လက်ဟန်အမူအရာတွေကို သုံးဖို့ ကြိုတင်ညှိနှိုင်းခဲ့ကြပါတယ်။

ပူးပေါင်းအဖွဲ့ အလျင်အမြန် လေ့ကျင့်ရေး ကာလအတွင်း ၂ ဖက်စလုံးက အထူးတပ်ဖွဲ့ တွေအတွက် အကြီးမားဆုံးစိန်ခေါ်မှုဟာ ဘာသာစကား အခက်အခဲပါ။ လေ့ကျင့်မှုမစတင်မီ ထိုင်းစစ်တပ်အရာရှိတွေနဲ့ ဆက်သွယ်ခဲ့ပြီး လေ့ကျင့်ရေး ကာလအတွင်း နည်းဗျူဟာမြောက် လက်ဟန်ခြေဟန်တွေကို သုံးဖို့ သဘောတူခဲ့ပါတယ်။

ဒါဟာ နှစ်ဖက်အကြား နည်းဗျူဟာဆိုင်ရာ ပူးပေါင်းဆောင်ရွက်မှုကို မြှင့်တင်ပေးခဲ့ပါတယ်။ ဒီလေ့ကျင့်ခန်းဟာ သက်ဆိုင်ရာဒေသတွေမှာ အကြမ်းဖက်မှု နှိမ်နင်းရေးလုပ်ငန်းတွေကို အသွင်ယူ ဒီဇိုင်းထုတ်ထားတာပါ။

ဒီစစ်ရေးလေ့ကျင့်မှုအတွင်း တရုတ်နဲ့ ထိုင်းရေတပ်သားတွေဟာ အသွင်ယူ အကြမ်းဖက်အဖွဲ့ရဲ့ လက်ကျန်အဖွဲ့ဝင်တွေကို ဖယ်ရှားရှင်းလင်းဖို့ အတူတကွ လုပ်ဆောင်ခဲ့ကြပါတယ်။ ဒီလေ့ကျင့်ခန်းဟာ အထူးသဖြင့် ကမ်းရိုးတန်းဒေသတွေမှာ ပူးပေါင်းလုပ်ဆောင်နိုင်မှုစွမ်းရည်ကို မြှင့်တင်ပေးခဲ့ပါတယ်။ 

Source: Reuters