အိန္ဒိယနိုင်ငံအနောက်ပိုင်း၊ ဂူဂျာရတ်ပြည်နယ်ရှိ လိုင်စင်မဲ့ မီးရှူးမီးပန်းစက်ရုံမှာ ဧပြီ ၁ ရက်က ပေါက်ကွဲမှုဖြစ်လို့ လူ ၁၈ ယောက်သေဆုံးပြီး ၅ ယောက် ဒဏ်ရာရရှိခဲ့တယ်လို့ တာဝန်ရှိသူတွေက ပြောပါတယ်။
ပေါက်ကွဲမှုကြောင့် စက်ရုံတခုလုံးပြိုကျပြီး အလုပ်သမားအများအပြား ဒဏ်ရာရရှိခဲ့ကာ လူအများအပြား ပိတ်မိနေမှာကို စိုးရိမ်ရတယ်လို့ တာဝန်ရှိသူတွေက ပြောပါတယ်။
အနာစ်ကန်သာ ခရိုင်အုပ်ချုပ်ရေးမှူးရုံးမှ မီဟီယာပတေးလ်က“စက်ရုံက စလဘ်အမိုးကြီးတခု ပြိုကျသွားပြီးတော့ ကယ်ဆယ်ရေးအဖွဲ့တွေက အပျက်အစီးတွေကို ဆက်လက်ဖယ်ရှားနေတာကြောင့် အနည်းဆုံး အလောင်း ၁၃ လောင်းကို ဆယ်ယူရရှိထားပါတယ်”လို့ ပြောပါတယ်။
ပြင်းပြင်းထန်ထန် ပေါက်ကွဲမှုကြောင့် ဂူဂျာရတ်ပြည်နယ် ဒီးဆာမြို့ရှိ စက်ရုံအဆောက်အအုံကနေ ဝေးကွာတဲ့ နေရာတွေအထိ ကျောက်တုံးကျောက်ခဲနဲ့ သတ္တုအတုံးအခဲတွေ လွင့်စင်ပျံထွက်သွားခဲ့ပါတယ်။
ပေါက်ကွဲမှုဖြစ်ရတဲ့ အကြောင်းရင်းကိုတော့ တိတိကျကျ မသိရသေးပါဘူး။ ဒီဖြစ်စဉ်နဲ့ ပတ်သက်ပြီး အာဏာပိုင်တွေက စုံစမ်းစစ်ဆေးမှုတွေ ပြုလုပ်ခဲ့ပါတယ်။
ကယ်ဆယ်ရေးသမားတွေဟာ အပျက်အစီးတွေအောက်မှာ ပိတ်မိနေတဲ့ အလုပ်သမားတွေကို ရှာဖွေကယ်ဆယ်ဖို့အတွက် အပျက်အစီးတွေကို ပိုက်စိပ်တိုက် ရှာဖွေနေကြပါတယ်။
အိန္ဒိယနိုင်ငံမှာ မီးရှူးမီးပန်းတွေဟာ အထူးသဖြင့် ဟိန္ဒူပွဲတော်အတွင်းနဲ့ မင်္ဂလာပွဲတွေမှာ အသုံးပြုဖို့အတွက် အလွန်ရေပန်းစားပါတယ်။
မီးရှူးမီးပန်း အလုပ်ရုံတွေမှာ ပေါက်ကွဲမှုတွေ ဖြစ်လေ့ရှိပြီး ပိုင်ရှင်တွေဟာ အခြေခံဘေးကင်းရေး လိုအပ်ချက်တွေကို မကြာခဏ လျစ်လျူရှုလေ့ရှိပါတယ်။
အိန္ဒိယနိုင်ငံမှာ စက်ရုံမတော်တဆမှုတွေ အဖြစ်များပြီး ဘေးကင်းရေး စံနှုန်းတွေကို ချိုးဖောက်သူတွေနဲ့ အစိုးရအရာရှိတွေရဲ့ ပေါ့ပေါ့လျော့လျော့ စစ်ဆေးမှုတွေကိုလည်း မကြာခဏ အပြစ်တင်လေ့ရှိပါတယ်။
Source: Reuters
