ပစိဖိတ်ကျွန်းနိုင်ငံ တွန်ဂါနားမှာ မတ် ၃၁ ရက် ဒီမနက်အစောပိုင်းက ပြင်းအား ရစ်ချ်တာစကေး ၇ ဒသမ ၀ အဆင့်ရှိ အင်အားပြင်း ငလျင်လှုပ်ခတ်လို့ ဆူနာမီသတိပေးချက် ထုတ်ပြန်ပြီး ဒေသခံတွေကို ဘေးလွတ်ရာဆီ ရွှေ့ဖို့ အာဏာပိုင်တွေက အကြံပြုခဲ့ပါတယ်။ 

ငလျင်က ဒေသစံတော်ချိန် မနက် ၀၁ နာရီ ၁၈ မိနစ်မှာ ဖန်းဂိုင် အုပ်ချုပ်ရေးမြို့တော်ရဲ့ အရှေ့တောင်ဘက် ၇၃ ကီလိုမီတာအကွာမှာ လှုပ်ခတ်သွားခဲ့တာလို့ အမေရိကန် ဘူမိလေ့လာရေးဌာန (USGS) ရဲ့ နောက်ဆုံးအချက်အလက်တွေက ဆိုပါတယ်။

တွန်ဂါ အမျိုးသား သဘာဝဘေးအန္တရာယ် စီမံခန့်ခွဲရေးရုံး (NDRMO) နဲ့ တွန်ဂါ မိုးလေဝသဌာနတို့က ကျွန်းစုရဲ့ ကမ်းရိုးတန်းဒေသအားလုံးအတွက် ဆူနာမီ သတိပေးချက် ထုတ်ပြန်ခဲ့ပါတယ်။

ဒေသခံအများအပြားက လုံခြုံရေးအတွက် ကုန်းမြင့်တွေနဲ့ ကုန်းတွင်းပိုင်းတွေဆီ ညတွင်းချင်း မောင်းနှင်ခဲ့ကြပါတယ်။

တွန်ဂါ အမျိုးသား သဘာဝဘေးအန္တရာယ် စီမံခန့်ခွဲရေးရုံး (NDRMO) က ငလျင်လှုပ်ခတ်ပြီးနောက် နေရာအားလုံးအတွက် ထိခိုက်မှုမရှိဘူးလို့ ပြောပါတယ်။

တွန်ဂါနိုင်ငံမှာ လူဦးရေ တသိန်းကျော်သာရှိပြီး ကျွန်းပေါင်း ၁၇၃ ကျွန်းနဲ့ ဖွဲ့စည်းထားကာ နိုင်ငံသား အများစုက ငလျင်ဗဟိုချက်ကနေ ကီလိုမီတာ ၁၀၀ လောက်ဝေးတဲ့ အဓိကကျွန်းဖြစ်တဲ့ တွန်ဂါတာပူကျွန်းပေါ်မှာ နေထိုင်ကြပါတယ်။

Source: Reuters