ပဲခူးတိုင်း၊ တောင်ငူမြို့မှာ မတ် ၂၉ ရက် ညက မြေငလျင် အရေးပေါ်အခြေအနေ အသံချဲ့စက်နဲ့ လိုက်လံအသိပေးခဲ့ပေမဲ့ ပြည်သူတွေကို စစ်ကောင်စီတပ်က မိုင်ဒါကွင်းအတွင်းသို့ ပေးမဝင်ခဲ့ဘူးလို့ မြို့ခံတွေက ပြောပါတယ်။
မနေ့ ည ၁၀ နာရီကျော်လောက်က စစ်ကောင်စီတပ်ဖွဲ့ဝင်တွေနဲ့ ရပ်ကွက်အုပ်ချုပ်ရေး အဖွဲ့ဝင်တွေက မြေငလျင်သတိပေးချက်ဟုဆိုကာ အသံချဲ့စက်နဲ့ ပြည်သူတွေ အထက်မြင့်တိုက်နဲ့ အဆောက်အအုံကြီးတွေမှာ နေထိုင်ချင်းမပြုဖို့ မြို့နယ်အတွင်းလိုက်လံ အသိပေးခဲ့တာပါ။
ဒါပေမဲ့ ငလျင်ဘေးလွတ်နိုင်တဲ့ မြေနေရာအကျယ်အဝန်း ကျယ်ကျယ်ဝန်းရှိတဲ့ မိုင်ဒါကွင်းအ တွင်းထဲကို ပြည်သူတွေ ဝင်ရောက်ဖို့ ကြိုးစားရာမှာတော့ ခွင့်မပြုခဲ့ဘူးလို့ တောင်ငူမြို့ခံက ပြောပါတယ်။
“သူတို့(စစ်ကောင်စီ)က ရပ်ကွက်ထဲ လိုက်အော်တော့ အဲဒီကွင်းပဲ ကျယ်တာလေ။ အဲဒီတော့ မြို့ခံတွေ အတော်များများ အဲဒီကွင်းထဲ သွားကြတော့၊ အဲဒါကို ပေးမဝင်တော့ လမ်းပေါ်မှာ လူတွေအများကြီး ဆေးရုံပေါ်ကလူတွေပါ ပါလာတာ။”
မြေငလျင်သတိပေးချက်ကြောင့် မြို့အတွင်း နေထိုင်သူတွေနဲ့ ဆေးရုံတက်ကုသနေရတဲ့ လူနာတွေ အများအပြား မိုင်ဒါကွင်းကို လာရောက်နေထိုင်ကြပေမဲ့ စစ်ကောင်စီတပ်ဖွဲ့ဝင်တွေက ကွင်းအတွင်း ပေးမဝင်ဘဲ ပြန်လွှတ်နေတာကြောင့် ပြည်သူတွေ နေစရာမရှိ လမ်းပေါ်တွေမှာ သွားလာနေထိုင်နေရတယ်လို့ သိရပါတယ်။
မတ် ၂၈ ရက်က လှုပ်ခတ်ခဲ့တဲ့ အင်အားပြင်းမြေငလျင်နဲ့ နောက်ဆက်တွဲ ငလျင်တွေကြောင့် တောင်ငူမြို့မှာလည်း အဆောက်အအုံတွေ ပြိုကျပျက်စီးပြီး လူသေဆုံးမှုလည်း ရှိခဲ့ပါတယ်။
