ဧရာဝတီတိုင်း၊ ဘိုကလေးမြို့နယ်၊ မရဲ့ကျေးရွာသစ် တဖက်ကမ်းက ဘုရားကြီးချောင် အာဝါဒေး လောင်းကစားဝိုင်းအား ဖမ်းဆီးခဲ့ပြီး လာဘ်ငွေကြေးတောင်းယူကာ ဖမ်းဆီးခံရသူတွေကို ပြန်လွှတ်ပေးခဲ့ရာမှာ ပါဝင်တဲ့ ရဲအရာရှိတချို့ကို မတ် ၂၄ ရက်က စတင်စစ်ဆေးနေတယ်လို့ ရဲတပ်ဖွဲ့နဲ့ နီးစပ်သူတွေဆီက သိရပါတယ်။

အာဝါဒေး လောင်းကစားဝိုင်းတွေကို မတ် ၁၀ ရက်က တိုင်း၊ ခရိုင်၊ မြို့နယ်အဆင့် ဒုစရိုက်နှိမ်နင်းရေးအဖွဲ့ (ဒန) နဲ့ မြင်းကာကုန်းစခန်းက ဝင်ရောက်ဖမ်းဆီးခဲ့ပြီး အဖမ်းခံရတဲ့ သူတွေကို မတ် ၁၂ ရက် နေ့လယ်ပိုင်းက ဘိုကလေးမြို့အဝင် ချယ်ရီအောင် စားသောက်ဆိုင်မှာ ငွေကြေးတောင်းယူပြီး ပြန်လွှတ်ပေးလိုက်တယ်လို့ ဆိုပါတယ်။

ဘိုကလေးမြို့နယ် ရဲတပ်ဖွဲ့နဲ့ နီးစပ်သူက “ငွေညှစ်ပြီး ပြန်လွှတ်ပေးတဲ့ သတင်းတွေ ကျယ်ကျယ်ပြန့်ပြန့် ထွက်လာပြီးနောက် အခုလို စစ်ဆေးတဲ့အထိ ဖြစ်လာတာ။ ဒုရဲအုပ်တွေ အပါအဝင် ရဲအရာရှိတချို့ စစ်ဆေးခံနေရတာ။ အကြောင်းထူးမယ်တော့ မထင်ပါဘူး” လို့ ပြောပါတယ်။

အာဝါဒေး လောင်းကစားဝိုင်းကို လာဖမ်းဆီးချိန် တိုင်းအဆင့် ရဲအရာရှိတွေ အပါအဝင် ဘိုကလေးမြို့နယ်၊ မြင်းကာကုန်း ရဲစခန်းမှူး ဒုရဲအုပ် စိုးဇော်၊ နယ်မြေခံနယ်ထိန်း၊ ဖျာပုံ(ဒန) ဒုရဲအုပ် ဇာနည်အောင်နဲ့ ရဲသတင်းပေး အများအပြားနဲ့ လာရောက်ဖမ်းဆီးခဲ့တာဖြစ်ပြီး လက်ရှိ စခန်းမှူးနဲ့ ဒုရဲအုပ်တွေ အပါအဝင် ရဲအရာရှိ ၄ ယောက် စစ်ဆေးခံနေရတာလို့ ဆိုပါတယ်။

ဘိုကလေးဒေသခံတယောက်က “ဘိုကလေးဘက်မှာ နယ်မြေခံရဲတွေက လောင်းကစားဝိုင်းတွေကို ငွေယူပြီး ခွင့်ပြုပေးထားတာ။ ဘယ်လို အဆင်မပြေမှုကြောင့် ဖမ်းဆီးပြီး ငွေညှစ် ပြန်လွှတ်ခဲ့လို့ အခုလိုအထိ ဖြစ်တာလည်း မသိဘူး။ ဖမ်းတုန်းကတော့ တိုင်းအဆင့်က အရာရှိတွေပါ ဆင်းဖမ်းခဲ့တာ” လို့ ပြောပါတယ်။

အဲဒီ လောင်းကစားဝိုင်းတွေကို စစ်တပ်ထောက်ခံသူတွေနဲ့ ကြံ့ခိုင်ရေးပါတီဝင်တွေက နယ်မြေခံရဲတွေနဲ့ ပေါင်းလုပ်နေတာဖြစ်ပြီး ၁၀ ရက်တကြိမ် ရဲတွေကို လောင်းကစားဝိုင်း ဦးဆောင်လုပ်သူတွေက KTV မှာ ချိန်းဆို လာဘ်ငွေပေး လုပ်နေတာလို့ ဆိုပါတယ်။