ရှမ်းပြည်နယ်တောင်ပိုင်း၊  ရွာငံမြို့နယ်၊ မင်းပလောင်ကျေးရွာကနေ စစ်ဘေးရှောင်နေကြတဲ့ စစ်ရှောင်ပြည်သူအများအပြား အခုလက်ရှိ ယားနာဖြစ်ပွားနေတယ်လို့ ဓနုပြည်နယ် အမျိုးသားကာကွယ်ရေးတပ်တော် DSNDA တာဝန်ရှိသူက မတ် ၂၂ ရက်နေ့မှာ ပြောပါတယ်။

အိမ်ခြေ ၂၀၀ လောက်ရှိတဲ့ မင်းပလောင်ကျေးရွာမှာ နေအိမ်ပေါင်း ၁၇၀ ကျော်  မီးရှို့ခံရတာကြောင့် ရွာခံပြည်သူ ၇၀၀ ကျော်ဟာ တောတောင်တွေနဲ့ နီးစပ်ရာဒေသတွေမှာ စစ်ဘေးရှောင်နေကြရပြီး အယောက် ၂၀၀ လောက်မှာ ယားနာဖြစ်တာတွေရှိတယ်လို့ သိရပါတယ်။

DSNDA က တာဝန်ရှိသူက “လောလောဆယ်တော့ ယားနာရောဂါတွေ ဖြစ်နေတယ်ဗျ။ ရေမသန့်ရှင်းလို့ ဖြစ်တဲ့ရောဂါဖြစ်လို့ ဝမ်းရောဂါဖြစ်မှာလည်း စိုးရိမ်နေရတယ်ဗျာ” လို့ ပြောပါတယ်။

ကလေးငယ်တွေအပါအဝင် လူကြီးတွေမှာလည်း ယားနာဖြစ်ပွားတာတွေရှိနေပြီး ဆေးဝါးလိုအပ်ချက်တွေလည်း ရှိနေပါတယ်။

ဒါ့အပြင် စားနပ်ရိက္ခာအတွက် ဆန်နဲ့ တခြားအသုံးအဆောင်ပစ္စည်းတွေလည်း လိုအပ်နေပြီး DSNDA နဲ့ ချိုးဖြူတော်လှန်ရေးတပ်ဖွဲ့ JPRF တို့က တတ်နိုင်တာတွေ ကူညီထောက်ပံ့တာတွေရှိတယ်လို့ သိရပါတယ်။

ခုလက်ရှိ မင်းပလောင်ကျေးရွာထဲမှာ စစ်ကောင်စီတပ်မရှိတော့ပေမယ့် နေအိမ်တွေ မီးလောင်ပျက်စီးခဲ့ရလို့ နေရပ်ပြန်ဖို့အခက်အခဲရှိနေတယ်လို့ စစ်ဘေးရှောင်ပြည်သူတွေက ပြောပါတယ်။