စစ်ကောင်စီလက်အောက်ခံ ပညာရေးဝန်ကြီးဌာနရဲ့ စနစ်သစ် ၁၂ တန်းပညာရေး တက္ကသိုလ်ဝင်စာမေးပွဲတွေ မတ် ၂၂ရက်မှာ နောက်ဆုံးနေ့အဖြစ် ဘောဂဗေဒနဲ့ ဇီဝဗေဒ ဘာသာရပ်တွေ ဖြေဆိုကာ ပြီးစီးသွားပြီဖြစ်ပါတယ်။
စစ်ရေးဇုန်ကနေကင်းလွတ်နေတဲ့ ရန်ကုန်တိုင်းနေ ကျောင်းသူ၊ ကျောင်းသားအများစု ဖြေဆိုနိုင်ကြ ပေမဲ့ စစ်မက်ဖြစ်ပွားရာ ဒေသတွေက ကျောင်းသား ကျောင်းသူအများစုကတော့ အခက်ခဲဖြစ် မယ်လို့ မေးခွန်းနားလည်သူ ရန်ကုန်မြို့ခံတယောက်က သုံးသပ်ပါတယ်။
စစ်ရေးပဋိပက္ခတွေ ပြင်းထန်နေတဲ့ ရခိုင်ပြည်နယ်မှာ အခုနှစ် တက္ကသိုလ်ဝင်တန်းစစ်ဆေးနေမှုမှာ ဖြေဆိုခွင့်လျှောက်ထားသူ ၃,၂၆၄ ယောက် ရှိတဲ့အထဲက ဖြေဆိုဖို့ ပျက်ကွက်သူ ၁,၇၀၀ အထိ ရှိခဲ့တာကြောင့် ကျောင်းသားတဝက်ကျော်အထိ စာမေးပွဲဖြေဆိုနိုင်ခြင်း မရှိဘူးလို့ စစ်ကောင်စီ ထုတ်ပြန်ချက်အရ သိရပါတယ်။
ပြီးဆုံးသွားပြီဖြစ်တဲ့ စနစ်သစ် ၁၂ တန်းပညာရေး တက္ကသိုလ်ဝင်စာမေးပွဲမှာ နိုင်ငံခြားစာစစ်ဌာနတွေ အပါအဝင် မြန်မာတနိုင်ငံလုံး စာစစ်ဌာနပေါင်း ၈၁၇ ခုမှာ စာမေးပွဲဖြေဆို ဖို့ စာရင်းပေးသွင်းထားသူပေါင်း ၂၂၀,၀၀၀ ကျော်ရှိခဲ့ပါတယ်။
ဒီပမာဏက မနှစ်ကဖြေဆိုသူ ဦးရေထက် ကျောင်းသား ကျောင်းသူဦးရေ ၈၀,၀၀၀ ကျော် ပိုမိုဝင်ရောက်ဖြေဆိုခဲ့တာပဲ ဖြစ်ပါတယ်။
ဒါပေမဲ့ သန်းနဲ့ချီတဲ့ ကျောင်းသား ကျောင်းသူတွေဟာ စစ်ကျွန်ပညာရေးကို ဆန့်ကျင်ကန့်ကွက် သပိတ်မှောက်ထားကြတာကြောင့် ဒီတိုးလာတဲ့ အရေအတွက်ဟာ စစ်အာဏာမသိမ်းခင် တုန်းကထက် များစွာလျော့နည်းနေဆဲ ဖြစ်ပါတယ်။
