Google ရဲ့ ပိုင်ရှင်ကုမ္ပဏီဖြစ်တဲ့  Alphabet က ဆိုက်ဘာလုံခြုံရေးကုမ္ပဏီ Wiz ကို အမေရိကန်ဒေါ်လာ ၃၂ ဘီလီယံနဲ့ ဝယ်ယူဖို့အတွက် သဘောတူညီမှုရပြီးနောက် အကြီးမားဆုံးအရောင်းအဝယ် ဖြစ်လာခဲ့ပါတယ်။

ဒီမတိုင်ခင်တုန်းက Motorola Mobility မိုဘိုင်းလ်ဖုန်းကုမ္ပဏီကို ဒေါ်လာ ၁၂ ဒသမ ၅ ဘီလီယံနဲ့ ဝယ်ယူမှုဟာ အများဆုံးပမာဏ ဖြစ်ခဲ့ပေမဲ့ ၂ နှစ်အကြာမှာတင် ဒေါ်လာ ၂ ဒသမ ၉ ဘီလီယံနဲ့ ပြန်ရောင်းချလိုက်ပါတယ်။

တချိန်တည်းမှာ Google ကလည်း အဓိကပြိုင်ဘက်တွေဖြစ်တဲ့ Microsoft နဲ့ Amazon ကို အချက်အလက် သိမ်းဆည်းနိုင်တဲ့ Cloud ဝန်ဆောင်မှုဈေးကွက်မှာ အမီလိုက်နိုင်အောင် ကြိုးပမ်းနေပါတယ်။

အစ္စရေး စွန့်ဦးတီထွင်ကုမ္ပဏီ Wiz က Cloud ဝန်ဆောင်မှုကုမ္ပဏီတွေရဲ့  လုံခြုံရေးအန္တရာယ်ကို စစ်ဆေးပေးတာမျိုး ဖြစ်ပါတယ်။ လွန်ခဲ့တဲ့နွေ ရာသီမှာ Alphabet ရဲ့ ဒေါ်လာ ၂၃ ဘီလီယံနဲ့ ဝယ်ယူမယ့် ကမ်းလှမ်းချက်ကို Wiz  က ငြင်းဆန်ခဲ့ပါသေးတယ်။

အဲဒီတုန်းက Wiz နဲ့အတူ ရင်းနှီးမြှုပ်နှံသူတချို့ဟာ စည်းကမ်းကြီးကြပ်ရေးအဖွဲ့ရဲ့  ခွင့်ပြုချက်ရရှိရေးအပေါ် စိုးရိမ်နေရတာကြောင့် ဆွေးနွေးပွဲတွေကို မအောင်မမြင် ဖြစ်စေခဲ့တာပါ။ ဒါကြောင့် ဒီတခေါက် အရောင်းအဝယ်ကိစ္စ အပြီးမသတ်နိုင်ခဲ့ရင်တောင် Alphabet က Wiz ကို ဒေါ်လာ ၃ ဒသမ ၂ ဘီလီယံ ပေးဖို့ သဘောတူထားပါတယ်။

၂၀၂၀ ခုနှစ်တုန်းက အစ္စရေးထောက်လှမ်းရေး တပ်ဖွဲ့ဝင်ဟောင်းတွေနဲ့ စတင်တည်ထောင်ခဲ့တဲ့ Wiz ကို တဲလ်အဗီး၊ နယူးယောက်ခ်နဲ့ လန်ဒန်မြို့တွေမှာ ရုံးဖွင့်ထားကြောင်း သိရပါတယ်။

အခုလိုမျိုး ဝယ်ယူပြီးရင်တောင် Microsoft က LinkedIn ကို လွတ်လပ်စွာ လုပ်ငန်းလည်ပတ်စေတဲ့ ပုံစံအတိုင်း Wiz ရဲ့ အမှတ်တံဆိပ်နဲ့ ဝန်ဆောင်မှုတွေဟာ ဆက်ရှိနေမှာ ဖြစ်ပါတယ်။

ဒါကြောင့် Wiz ဟာ Amazon Web Services ၊  Microsoft Azure (အက်ရှ်ဇာ) နဲ့ Oracle Cloud (အော်ရကယ်လ်) တို့လိုမျိုး အဓိကကျတဲ့ ပလက်ဖောင်းကြီးတွေမှာ ဆက်လည်ပတ်နေဦးမှာပါ။

Wiz ရဲ့ နှစ်စဉ်ဝင်ငွေဟာ ဒေါ်လာ ၇၅၀ သန်းရှိကြောင်း ပြောဆိုထားတဲ့အတွက် Google က ဒီကုမ္ပဏီကို ဒေါ်လာ ၁ ဘီလီယံကျော်ရမယ့် စီပွားရေး လုပ်ငန်းအဖြစ် မောင်းနှင်ပေးလိမ့်မယ်လို့ ခန့်မှန်းထားပါတယ်။

ဒါ့အပြင် Alphabet ဟာ Google လိုမျိုး ရှာဖွေရေးအင်ဂျင်တွေမှာရတဲ့ ကြော်ငြာဝင်ငွေအပေါ် အဓိကမီခိုနေရတာကနေ​ ရှောင်လွှဲနိုင်ဖို့အတွက် အခုလိုမျိုး မတူညီတဲ့လုပ်ငန်းအမျိုးမျိုးကို စမ်းသပ်လုပ်ကိုင်နေခဲ့တာ ဖြစ်ပါတယ်။

Source:Reuters