မန္တလေးတိုင်း၊ စဥ့်ကူးမြို့နယ်ထဲက လက်ပံလှကျေးရွာအနီးကို စစ်ကောင်စီတပ်က မတ် ၁၇ ရက် ညဦးပိုင်း ၇ နာရီဝန်းကျင်မှာ လေကြောင်းတိုက်ခိုက်မှုထပ်မံပြုလုပ်ခဲ့လို့ ဒေသခံပြည်သူ ၃ ယောက် သေဆုံးခဲ့သလို ၆ ယောက်ထက်မနည်းလည်း ဒဏ်ရာရရှိခဲ့ကြတယ်လို့ ကူညီဆောင်ရွက်ပေးနေသူတွေဆီကနေ သိရပါတယ်။

စစ်ဘေးရှောင်တွေကိုကူညီဆောင်ရွက်ပေးနေတဲ့ ရောင်နီနွေဦးအဖွဲ့ရဲ့ တာဝန်ခံတယောက်က “အရင်ရက်က ဗုံးကြဲခံခဲ့ရတဲ့ လက်ပံလှရွာက သင်ဇာဆန်စက်ရဲ့ အရှေ့မြောက်ဘက် ပင်လယ်ကြီးရွာနားက ချောင်းရိုးထဲကို ဂျက်ဖိုက်တာနဲ့ ဗုံး ၁ လုံးကြဲသွားတာပါ။ ရွာထဲကို ဗုံးကြဲခံရလို့ ထွက်ပြေးလာနေတဲ့ စစ်ဘေးရှောင်တွေထဲက အမျိုးသား ၁ ယောက်နဲ့ အမျိုးသမီး ၂ ယောက် ပေါင်း ၃ ယောက် ဆုံးသွားပါတယ်။ ၆ ယောက်လောက်လည်း ထိခိုက်ဒဏ်ရာတွေ ရထားပါတယ်” လို့ ပြောပါတယ်။

ထိခိုက်ဒဏ်ရာရသူတွေထဲမှာ စိုးရိမ်ရသူတွေပါနေတဲ့အတွက်လည်း အရေးပေါ် ဆေးကုသမှုတွေ ဆောင်ရွက်ပေးနေတယ်လို့လည်း သူက ဆက်ပြောပါတယ်။

စဥ့်ကူးမြို့နယ်ထဲက မိုးကုတ်-မန္တလေးကားလမ်းဘေးမှာရှိတဲ့ လက်ပံလှကျေးရွာ ပြီးခဲ့တဲ့ မတ်လ ၁၄ ရက် ညနေပိုင်းကလည်း စစ်ကောင်စီတပ်ရဲ့ တံတားဦးလေတပ်စခန်းက တက်လာတဲ့ YAK 130 ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ၄ လသားကလေးငယ် တယောက် အပါအဝင် ကလေးငယ် ၆ ယောက်နဲ့ ပြည်သူ ၂၀ ကျော် သေဆုံးခဲ့ရပြီး ၄၀ နီးပါးဒဏ်ရာရရှိခဲ့ကြကာ လူနေအိမ် ၂ လုံးထက်မနည်း မီးလောင် ပျက်စီးခဲ့သေးတယ်လို့လည်း ဆိုပါတယ်။

စဥ့်ကူးမြို့နယ် ပကဖ ပြန်ကြားရေးတာဝန်ခံ ဗိုလ်သံမဏိက “ကြားထဲမှာ ၂ ရက်ပဲခြားပြီး ဗုံးထပ်ကြဲသွားတာပါ။ အခုဗုံးကြဲခံရတဲ့ လက်ပံလှရွာဆိုတာ တော်လှန်ရေးတပ်ဖွဲ့တွေ စိုးမိုးထားတဲ့ နယ်မြေ​ဖြစ်ပေမဲ့ သူတို့စစ်တပ်က ကြွက်မနိုင် ကျီမီးနဲ့ ရှို့ဆိုသလို ပြည်သူကို ပစ်မှတ်ထားပြီးတော့ တိုက်ခိုက်နေတာ ဖြစ်တယ်။ သူတို့ ဗုံးကြဲလို့ တကယ်ခံရတာက ပြည်သူတွေ ဖြစ်လို့ စစ်တပ်ဟာ ပြည်သူအပေါ်မှာ အကြမ်းဖက်လုပ်ရပ်တွေ နေ့စဥ်ပြုလုပ်နေပြီးတော့ စစ်ရာဇဝတ်မှုတွေ တောက်လျှောက် ကျူးလွန်နေတာဖြစ်တယ်လို့ပဲ ပြောချင်တယ်”လို့ DVB ကို ပြောပါတယ်။

မတ် ၄ ရက်ကလည်း အဆိုပါ လက်ပံလှကျေးရွာကို စစ်တပ်က လေကြောင်းတိုက်ခိုက်မှုပြုလုပ်ခဲ့လို့ ပြည်သူ ၂ ယောက် သေဆုံးခဲ့သလို အများအပြားလည်း ထိခိုက်ဒဏ်ရာရရှိခဲ့ကြပါသေးတယ်။

စစ်ကောင်စီတပ်ရဲ့ ပြည်သူအပေါ် ပစ်မှတ်ထားပြီး လေကြောင်းကနေတိုက်ခိုက်နေတဲ့ ကျူးလွန်မှုတွေကို အပြစ်ပေးအရေးယူနိုင်ဖို့ အစွမ်းကုန်တာဝန်ယူ ဆောင်ရွက်သွားမယ်လို့ အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာဝန်ကြီးဌာနက မတ် ၁၆ ရက်မှာ ထုတ်ပြန် ထားပါတယ်။

Photo:  ရောင်နီနွေဦးအဖွဲ့