စစ်အာဏာသိမ်းပြီးနောက် ရိုက်ကူးထားသည့် မြန်မာ့မှတ်တမ်းရုပ်ရှင်များ DVB Peacock Film Festival ကို သြစတြေးလျနိုင်ငံ၊ ဆစ်ဒနီမြို့မှာ မတ် ၂၉ ရက်နေ့ ပွဲဦးထွက် ကျင်းပသွားဖို့ ရှိပါတယ်။

ဒီရုပ်ရှင်ပွဲတော် ကျင်းပရတဲ့ အဓိက အကြောင်းအရင်းမှာ မြန်မာနိုင်ငံမှာ စစ်အာဏာသိမ်းမှုနောက်ပိုင်း ပြည်သူတွေ ရင်ဆိုင်ကြုံတွေ့နေရတဲ့ လူ့အခွင့်အရေး ချိုးဖောက်ခံရမှု မှတ်တမ်းရုပ်ရှင်တွေကို ကမ္ဘာမှာ အသံကျယ်ကျယ်လောင်လောင် ကြားသိလာနိုင်ဖို့ ဖြစ်ပါတယ်။ 

ဒီပွဲတော်ကို DVB, Myanmar Campaign Network နဲ့ ဆစ်ဒနီ နည်းပညာတက္ကသိုလ်တို့ ပူးပေါင်း စီစဉ်ကျင်းပတာလည်း ဖြစ်ပါတယ်။

မြန်မာ သတင်းထောက်တွေနဲ့ မှတ်တမ်းရုပ်ရှင်ဖန်တီးသူတို့ရဲ့ လွတ်လပ်စွာ ဖန်တီးရိုက်ကူးနိုင်စွမ်းကို မြင့်တင်နိုင်ဖို့အပြင် လွတ်လပ်စွာ ပြောဆိုခွင့်အတွက် တိုက်ပွဲဝင်နေကြသူတွေသို့ အန္တရာယ်ကြားက ရုပ်ရှင်ရိုက်ကူးသူတွေနဲ့ သတင်းထောက်တွေရဲ့ ရဲရင့်မှုကိုလည်း မီးမောင်းထိုးပြထားပါတယ်။

စစ်ကြောင်းအတွင်း ပြည်သူတွေ အကြမ်းဖက် သတ်ဖြတ်ခံခဲ့ရတဲ့ ဖြစ်စဉ်တွေ၊ တော်လှန်ရေးမှာ ပါဝင်နေကြတဲ့ နယ်ပယ်အသီးသီးက CDM တွေရဲ့ အကြောင်းတွေ၊ လူငယ်တွေရဲ့ အတွေးအမြင်တွေ အခက်အခဲကြားက ရင်ဆိုင်ကျော်လွှားနေကြတဲ့ အမျိုးသမီးတွေရဲ့ အကြောင်းတွေ စတဲ့ မြန်မာနိုင်ငံ နယ်ပယ်ဒေသအသီးသီးက မှတ်တမ်းရုပ်ရှင်တွေကို ပြသသွားမှာလည်း ဖြစ်ပါတယ်။

ပွဲတော်မှာ မှတ်တမ်းရုပ်ရှင်ပြသတာအပြင် ဆွေးနွေးပွဲတွေကိုလည်း ထည့်သွင်းကျင်းပသွားမှာ ဖြစ်ပါတယ်။

မနက်ပိုင်း ရုပ်ရှင်ပြသအပြီးမှာ The Road to Democracy in Burma ခေါင်းစဉ်နဲ့ ဆွေးနွေးပွဲကို ပရော်ဖက်ဆာ ရှောင်တာနယ်၊ ပရော်ဖက်ဆာ ဒေါ်ထွေးထွေးသိန်းတို့က ဦးဆောင်ဆွေးနွေးမှာ ဖြစ်ပြီး ABC သတင်းဌာနက သတင်းထောက် Libby Hogan က ဆွေးနွေးပွဲကို ပံ့ပိုးကူညီပေးသွားမှာ ဖြစ်ပါတယ်။

နေ့ခင်းပိုင်း ရုပ်ရှင်ပြသအပြီးမှာလည်း DVB သတင်းထောက် မခင်ရူပါနဲ့အတူ မြန်မာ Documentary Filmmaker တယောက် ၊ SBS က Dateline Executive Producer Georgina Davies တို့က မြန်မာနိုင်ငံမှာ ပြည်တွင်း ပြည်ပက သတင်းသမားတွေရဲ့ သတင်းရယူ မှတ်တမ်းတင်နေကြရတဲ့ အခြေအနေတွေနဲ့ ပတ်သက်ပြီး ဆွေးနွေးသွားမှာ ဖြစ်ပြီး SBS က Commissioning Editor Tinzar Lwyn က ဆွေးနွေးပွဲကို ပံ့ပိုးကူညီပေးသွားမှာ ဖြစ်ပါတယ်။

ဒီပွဲတော်မှာ မြန်မာ့ဒီမိုကရေစီရဲ့ အနာဂတ်နဲ့ လွတ်လပ်စွာ ထုတ်ဖော်ပြောဆိုမှုတွေနဲ့ ပတ်သက်လို့ ဩစတြေးလျရောက် မြန်မာတွေအပြင် မြန်မာအရေး စိတ်ဝင်စားသူတွေ ကျောင်းသူကျောင်းသားတွေ လာရောက်လေ့လာ ပါဝင်ဆွေးနွေးနိုင်ဖို့ ဖန်တီးထားတဲ့ ပွဲတော်တခုလည်း ဖြစ်ပါတယ်။

ဆစ်ဒနီမြို့မှာ ပြုလုပ်မယ့် DVB Peacock Film Festival ကို မတ်လ ၂၉ ရက် မနက် ၉ နာရီကနေ ညနေ ၅ နာခွဲအထိ ဆစ်ဒနီ နည်းပညာတက္ကသိုလ် University of Technology Sydney UTS မှာ ကျင်းပသွားမှာ ဖြစ်ပြီး မြန်မာ့ရိုးရာ အစားအသောက်တွေလည်း တည့်ခင်း ရောင်းချပေးသွားမှာ ဖြစ်ပါတယ်။

ဆစ်ဒနီမြို့မှာ မြန်မာ့ဒီမိုကရေစီသမိုင်းမှတ်တမ်း ရုပ်ရှင်တွေကို ကြည့်ရှုနိုင်ဖို့အတွက် DVB Peacock Film Festival ဖေ့ဘွတ်ခ်စာမျက်နှာနဲ့ Burmese Film Festival in Sydney Event Page တွေကနေတဆင့်လည်း အချက်အလက်တွေကို လေ့လာနိုင်ပြီး လက်မှတ်တွေကို ကြိုတင်မှာယူနိုင်ပြီ ဖြစ်ပါတယ်။

DVB Peacock Film Festival မှာ ပြသခဲ့တဲ့ မြန်မာ့ဒီမိုကရေစီလှုပ်ရှားမှု မှတ်တမ်းရုပ်ရှင်တွေကို နိုင်ငံတကာမှာလည်း ပြသနိုင်အောင် DVB က ကြီးမှူးစီစဉ်နေပြီး လက်ရှိအချိန်ထိ နော်ဝေ၊ ဆွီဒင်၊ ချက်၊ အိုင်ယာလန်၊ နယူးဇီးလန် စတဲ့ ဥရောပနိုင်ငံတွေမှာလည်း ပြသခဲ့ပြီးဖြစ်သလို ဩစတြေးလျနဲ့ တခြားနိုင်ငံတွေမှာလည်း ဆက်လက် ပြသနိုင်ဖို့ စီစဉ်နေပါတယ်။