ရန်ကုန်-မန္တလေး အမြန်လမ်း၊ မြို့ချောင်းတိုက်နယ်၊ ၉၇ မိုင် ၆ ဖာလုံအနီးမှာ မတ် ၁၆ ရက် မနက် ၉ နာရီလောက်က ကယ်ဆယ်ရေးအသင်းတခုရဲ့ လူနာတင်ယာဥ်တစီး တိမ်းမှောက်ခဲ့လို့ လူ ၃ ယောက်သေ၊ ၂ ယောက် ဒဏ်ရာရရှိခဲ့တယ်လို့ အမြန်လမ်းမီးသတ်တပ်ဖွဲ့က ပြောပါတယ်။

ရန်ကုန်၊ သာကေတမြို့နယ်ကနေ နေပြည်တော်ကို လူနာပို့ဆောင်ဖို့ သွားတဲ့ အောင်ဇေ လူမှုကူညီရေးအသင်းက လူနာတင်ယာဉ်တစီးဟာ အမြန်လမ်းမှာ ခွေးကိုရှောင်ရင်း အရှိန်လွန်ကာ တိမ်းမှောက်သွားခဲ့တာ ဖြစ်ပါတယ်။

အမြန်လမ်း ကယ်ဆယ်ရေးအဖွဲ့ဝင်တယောက်က “ရန်ကုန်ကနေ နေပြည်တော်ဘက်သွားတဲ့ ဘက်မှာ ဖြစ်တာ။ တခုခု‌ကိုရှောင်ရင်း အရှိန်လွန်ပြီး လမ်းအလယ်က အပင်တွေကို တိုက်မိပြီး မှောက်ထားတဲ့ပုံစံပါ။ လူနာ ၂ ဦး၊ သေဆုံး ၃ ဦး” လို့ ပြောပါတယ်။

လူ ၅ ယောက်ပါ အသင်းယာဉ် တိမ်းမှောက်မှုကြောင့် ၉ တန်းကျောင်းသူ အသက် ၁၈ နှစ်အရွယ် စေတနာ့ဝန်ထမ်း အသင်းသူတယောက်၊ ကားပေါ်ပါ လူနာနဲ့ လူနာရှင်တယောက်ပါ သေဆုံးသွားခဲ့ပြီး စေတနာ့ဝန်ထမ်း အမျိုးသား ၂ ယောက်မှာ ခါးထိခိုက်မှု ပြင်းထန်ဒဏ်ရာတွေ ရရှိသွားပါတယ်။

ကူညီကယ်ဆယ်ရေးကို အမြန်လမ်းကယ်ဆယ်ရေးအဖွဲ့တွေအပြင် နီးစပ်ရာ အရပ်ဘက်အသင်းတွေက လုပ်ဆောင်ခဲ့ကြပြီး မြို့ချောင်းတိုက်နယ်ဆေးရုံကနေ ရန်ကုန်ပြည်သူ့ဆေးရုံကြီးကို ထပ်ဆင့်ပို့ဆောင်ပေးထားကြပါတယ်။

ရန်ကုန်ကယ်ဆယ်ရေးအဖွဲ့ဝင်တယောက်က “ဆုံးသွားတဲ့ အသင်းသူက စေတနာ့ဝန်ထမ်း ကျောင်းသူလေးပါ။ ‌အဖွဲ့သားတွေရော ရန်ကုန်ကအသင်းတွေရော အကုန်လုံး စိတ်မကောင်း တော်တော်ဖြစ်ရပါတယ်။ ကားက လူနာတဦးနဲ့ နေပြည်တော်ဘက်ကို ဆေးကုဖို့ လိုက်ပို့တာ။ ကားပေါ်ပါ ဆုံးသွားတဲ့လူနာနဲ့ လူနာရှင် ၂ ဦးက၊ ကျား ၁၊ မ ၁ ပါ” လို့ ပြောပါတယ်။

သေဆုံးသူ ရုပ်အလောင်းတွေကို ရန်ကုန်၊ တောင်ဒဂုံ ကျီစုသုသာန် ပို့ဆောင်ပေးထားကြသလို သေဆုံးသွားတဲ့ အသင်းသူ မိန်းကလေးဟာ ၉ တန်းဖြေဆိုပြီးနောက် စေတနာ့ဝန်ထမ်း လာရောက်လုပ်ကိုင်ပေးနေသူလို့ သိရပါတယ်။

ပြီးခဲ့တဲ့ မတ် ၁၄ ရက်ကလည်း အလုံမြို့နယ်၊ သခင်မြပန်းခြံအနီး EV ကား အားသွင်းစက်အနီးမှာ ကယ်ဆယ်ရေးအသင်း လူနာတင်ယာဉ်တစီး စက်ချို့ယွင်းပြီး လမ်းဘေးသစ်ပင်ကို ဝင်တိုက်မိခဲ့လို့ နှလုံးရောဂါကြောင့် ကွယ်လွန်ခါနီး လူနာအမျိုးသားတယောက် သေဆုံးခဲ့ကာ လူ ၆ ယောက် ဒဏ်ရာရရှိခဲ့ပါတယ်။