မြန်မာနိုင်ငံရဲ့ ကုန်းတွင်းရေနံမြေတွေကနေ ရေနံထုတ်ယူနေတဲ့ စင်ကာပူနိုင်ငံအခြေစိုက် ကုမ္ပဏီတခုဖြစ်တဲ့ Interra Resources ဟာ အမေရိကန်ဒေါ်လာ သန်း ၁၅၀ ကျော် တန်ဖိုးရှိ ရေနံစည်ပေါင်း ၂ သန်းကျော်ကို အာဏာသိမ်း စစ်ကောင်စီအတွက် ထောက်ပံ့ခဲ့တယ်လို့ Justice For Myanmar က ထုတ်ပြန်ပါတယ်။

စင်ကာပူအခြေစိုက် Interra Resources ကုမ္ပဏီဟာ ၂၀၂၁ ခုနှစ် ဇန်နဝါရီလကနေ ၂၀၂၃ ခုနှစ် နှစ်ကုန်အတွင်း မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE) ကို ရေနံစည်ပေါင်း ၂ ဒသမ ၃ သန်း ထောက်ပံ့ခဲ့တဲ့ Goldpetrol Joint Operating Company Inc. ရဲ့ ၆၀ ရာခိုင်နှုန်းကို ပိုင်ဆိုင်တယ်လို့ ဇန်နဝါရီ ၂၉ ရက် ထုတ်ပြန်ချက်မှာ ဖော်ပြထားပါတယ်။

Justice For Myanmar နဲ့ ယူကေသတင်းထောက်အဖွဲ့အစည်း Finance Uncovered တို့ဟာ လျှို့ဝှက်ပေါက်ကြားခဲ့တဲ့ ဘဏ္ဍာရေးအစီရင်ခံစာတွေကို လေ့လာသုံးသပ်ခဲ့ပြီး ဒီသုံးသပ်ချက်အရ Interra Resources ကုမ္ပဏီဟာ မြန်မာပြည်တွင်းလုပ်ငန်းတွေကနေ ဝင်ငွေ ဒေါ်လာ ၅ သန်းခွဲကျော် ရရှိခဲ့တာပဲ ဖြစ်ပါတယ်။

ရေနံတွေကို မန်းသံပရာကန် ဓာတုဗေဒစက်ရုံစုမှာ ချက်လုပ်သန့်စင်တာဖြစ်ပြီး ဒီစက်ရုံစုကို စစ်အုပ်စုက တရားမဝင်ထိန်းချုပ်ထားတဲ့ စွမ်းအင်ဝန်ကြီးဌာနအောက်က မြန်မာ့ရေနံဓာတုဗေဒ လုပ်ငန်း (MPE) က ကြီးကြပ်လုပ်ကိုင်တာဖြစ်သလို အရပ်သားပြည်သူတွေအပေါ် စစ်ရာဇဝတ်မှုတွေ ကျူးလွန်ရာမှာ အသုံးပြုတဲ့ လေယာဉ်များ၊ ထရပ်ကားများနဲ့ တင့်ကားများကို မောင်းနှင်ဖို့ လိုအပ်တဲ့ ဒီဇယ်နဲ့ လေယာဉ်ဆီတွေကို ချက်လုပ်ပေးနေတာလည်း ဖြစ်ပါတယ်။

Justice For Myanmar အနေနဲ့ MOGE နဲ့ Interra Resources တို့ကြားက ငွေပေးချေယူမှုတွေကို ဆောင်ရွက်ပေးနေတဲ့ စစ်အုပ်စု ထိန်းချုပ်ထားတဲ့ ဘဏ်တွေအပါအဝင် မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) နဲ့ မြန်မာ့ရေနံဓာတုဗေဒလုပ်ငန်း (MPE) တို့အပေါ် ပစ်မှတ်ထား ဒဏ်ခတ်ပိတ်ဆို့မှုတွေ စုပေါင်းချမှတ်ဖို့ Justice For Myanmar က ထုတ်ပြန်ချက်မှာ တောင်းဆိုခဲ့ပါသေးတယ်။

Justice For Myanmar ရဲ့ ပြောရေးဆိုခွင့်ရှိသူ မရတနာမောင်ကတော့ “Interra Resources က အကြမ်းဖက် စစ်အုပ်စုဆီ ရေနံတွေ ဆက်လက်ရောင်းချပြီး မြန်မာစစ်အုပ်စုရဲ့ နိုင်ငံတကာ ရာဇဝတ်မှုတွေမှာ ကြံရာပါ ပတ်သက်နေပါတယ်” လို့ ပြောပါတယ်။

Interra Resources အနေနဲ့ စစ်အုပ်စုကို ရေနံရောင်းချ ထောက်ပံ့နေတာ ချက်ချင်း ရပ်တန့်ပေးဖို့ Justice For Myanmar က တောင်းဆိုထားပါတယ်။

ဒါ့အပြင် စင်ကာပူစတော့အိတ်ချိန်း အနေနဲ့လည်း Interra Resources ဟာ ဒဏ်ခတ်ပိတ်ဆို့ထားတဲ့ အဖွဲ့အစည်းတရပ်နဲ့ စီးပွားရေး ဆက်လက်လုပ်ဆောင်နေပြီး စစ်အုပ်စုရဲ့ နိုင်ငံတကာရာဇဝတ်မှုတွေမှာ ကြံရာပါ ပတ်သက်နေတာကြောင့် စည်းမျဉ်းပိုင်းဆိုင်ရာ အရေးယူ ဆောင်ရွက်သင့်ကြောင်း အကြံပြု တိုက်တွန်းခဲ့ပါသေးတယ်။