မန်စီးတီးကစားသမား ဖီးလ်ဖိုဒန်ဟာ ပရော်ဖက်ရှင်နယ် ဘောလုံးအဖွဲ့အစည်း (PFA) ကချီးမြှင့်တဲ့ တနှစ်တာအကောင်းဆုံး ကစားသမားဆု ရရှိခဲ့ပါတယ်။

PFA ရဲ့ အကောင်းဆုံး လူငယ်ကစားသမားဆုကိုတော့ ချဲလ်ဆီး တောင်ပံကစားသမား ကိုးပါလ်မာက ရရှိခဲ့ပါတယ်။

အရေးပါတဲ့ ဒီဆု ၂ ဆုကို အင်္ဂလန်ကစားသမား ၂ ဦးက ရရှိခဲ့တာဖြစ်ပြီး ၂၀၀၉-၁၀ ရာသီနောက်ပိုင်း ပထမဆုံးအကြိမ်လည်း ဖြစ်ပါတယ်။

ဖိုဒန်ဟာ မန်စီးတီးအသင်းရဲ့ ၄ နှစ်ဆက်တိုက် ချန်ပီယံအောင်မြင်မှုမှာ အဓိကကျသူဖြစ်ပြီး ပွဲပေါင်း ၃၅ ပွဲ ကစားခဲ့ပြီး ၁၉ ဂိုး သွင်းယူနိုင်ခဲ့ပါတယ်။

အသက် ၂၃ နှစ်အရွယ် ဖိုဒန်ဟာ ပရီးမီးယားလိဂ်ဖလား ၆ လုံး ပိုင်ဆိုင်ထားတဲ့ အသက် အငယ်ဆုံး ကစားသမားလည်း ဖြစ်ပါတယ်။ ဒါ့အပြင် ဖိုဒန်က ဒီဆုကို အသင်းဖော် ဟာလန်းနဲ့ ရိုဒရီတို့ကို ကျော်ဖြတ်ပြီး ရရှိခဲ့တာပါ။

အကောင်းဆုံး လူငယ်ကစားသမားဆုရခဲ့တဲ့ ပါလ်မာ ဟာလည်း ချဲလ်ဆီးအသင်းအတွက် ပထမဆုံးရာသီမှာတင် ၃၄ ပွဲကစား ၂၂ ဂိုး သွင်းယူနိုင်ပါတယ်။

ပရီးမီးယားလိဂ် အကောင်းဆုံးအသင်းမှာတော့ မန်စီးတီးနဲ့ အာဆင်နယ်အသင်းတို့ရဲ့ ကစားသမားအများစုသာ ပါဝင်ခဲ့ကြပါတယ်။

Photo-Reuters