ဖေ့စ်ဘွတ်ခ်နဲ့ Meta ကုမ္ပဏီ ထူထောင်သူ မာ့ခ်ဇူကာဘာ့ဂ်ဟာ ပြင်သစ်ဖက်ရှင်သူဌေးကြီး ဘားနတ် အားနိုးလ်ကို ကျော်တက်ပြီး ကမ္ဘာ့တတိယအချမ်းသာဆုံးပုဂ္ဂိုလ် ဖြစ်လာခဲ့တယ်လို့ Forbes မဂ္ဂဇင်းက ဖော်ပြပါတယ်။

Meta ရှယ်ယာစျေးတွေ တက်လာပြီး အာနိုးလ်ရဲ့ LMMH ကုမ္ပဏီရှယ်ယာစျေး ကျသွားတဲ့အတွက် အခုလို အလှည့်အပြောင်း ဖြစ်လာတာပါ။

ဇူကာဘာ့ဂ်ရဲ့ ကြွယ်ဝမှုဟာ ဒေါ်လာ ၈ ဒသမ ၆ ဘီလီယံ တိုးသွားပြီး စုစုပေါင်း ၁၇၅ ဒသမ ၅ ဘီလီယံ ကြွယ်ဝလာတယ်လို့ Forbes ရဲ့ အချိန်နဲ့တပြေးညီ ပြောင်းလဲဖော်ပြပေးနေတဲ့ ဘီလီယံနာစာရင်းမှာ ဖော်ပြပါတယ်။

Louis Vuitton, Tiffany, Dior, Hennessy စတဲ့ နာမည်ကျော်ဘရန်းတွေ ထုတ်တဲ့ LVMH လုပ်ငန်းစုရဲ့ ဥက္ကဋ္ဌနဲ့ စီအီးအိုဖြစ်သူ အာနိုးလ်ရဲ့ ကြွယ်ဝမှုကတော့ ၁၇၄ ဒသမ ၁ ဘီလီယံ ဖြစ်သွားပြီး ဒေါ်လာ သန်း ၅၀၀ ကျော် လျော့ကျသွားတာဖြစ်ပါတယ်။

တက်စလာနဲ့ SpaceX ထူထောင်သူ အီလွန်မတ်စ်ခ်ကတော့ ကြွယ်ဝမှု ဒေါ်လာ ၂၂၃ ဒသမ ၆ ဘီလီယံနဲ့ ကမ္ဘာ့အချမ်းသာဆုံးပုဂ္ဂိုလ်အဖြစ် ဆက်လက်ရပ်တည်နေပါတယ်။

Amazon တည်ထောင်သူ ဂျက်ဖ်ဘီးဇော့ဖ်ကတော့ ၁၈၃ ဒသမ ၅ ဘီလီယံနဲ့ ဒုတိယအချမ်းသာဆုံး ဖြစ်ပါတယ်။

ကမ္ဘာ့အချမ်းသာဆုံးပုဂ္ဂိုလ်စာရင်းဟာ ပြီးခဲ့တဲ့လတွေအတွင်း အပြောင်းအလဲ မကြာခဏ ဖြစ်ခဲ့ပါတယ်။

ဖက်ရှင်သူဌေးကြီး အာနိုးလ်ဟာ အခုနှစ်အစောပိုင်းက ကမ္ဘာ့အချမ်းသာဆုံးပုဂ္ဂိုလ်နေရာ ရောက်ခဲ့ပေမဲ့ မတ်စ်ခ်က ထိပ်ဆုံးပြန်ရောက်လာခဲ့ပါတယ်။

အဲဒီနောက်ပိုင်း ဘီးဇော့စ်နဲ့ အာနိုးလ်တို့က နံပါတ်နှစ်နေရာကို တယောက်တလှည့် ယူနေကြတာ ဖြစ်ပါတယ်။

ရှယ်ယာစျေးအတက်အကျတွေက ကြွယ်ဝမှုကို ချက်ချင်းအပြောင်းအလဲ ဖြစ်စေတာ ဖြစ်ပါတယ်။

Source-Reuters