ပဲခူးမြို့မှာ မိုးသည်းသည်းထန်ထန်ရွာသွန်းပြီး ရထားလမ်းရေကျော်နေတာကြောင့် ရပ်ဆိုင်းထားတဲ့ ရန်ကုန်-မော်လမြိုင် အစုန်၊ အဆန်ရထားကို ဩဂုတ် ၃ ရက် ဒီနေ့မှာ ပြန်လည်ပြေးဆွဲခဲ့တယ်လို့ မော်လမြိုင်ဘူတာကြီးက ထုတ်ပြန်ပါတယ်။
ပဲခူးမြို့ထဲမှာ ဇူလိူင် ၂၉ ရက်နေ့က မိုးသည်းသည်းထန်ထန် ရွာနေတာကြောင့် ပဲခူးဘူတာဝင်းထဲက တံတားအမှတ် ၆၀ ရေကျော်ပြီး ရထားဖြတ်သန်းလို့မရတာကြောင့် ရန်ကုန်-မော်လမြိုင် ရထားခရီးစဉ်ကို ယာယီရပ်ဆိုင်းခဲ့ပါတယ်။
ပဲခူးဘူတာဝင်းထဲမှာ ဩဂုတ် ၂ ရက်နေ့က ရေပြန်ကျသွားတာကြောင့် ဒီနေ့ ဩဂုတ် ၃ ရက်နေ့မှာ ရန်ကုန်-မော်လမြိုင် အစုန်၊ အဆန် ရထားခရီးစဉ်ကို ပြန်လည်ပြေးဆွဲတာဖြစ်တယ်လို့ မော်လမြိုင်ဘူတာကြီး ဝန်ထမ်းတယောက်က ပြောပါတယ်။
“ဘူတာဝင်းထဲက ရေကျသွားတာနဲ့ လမ်းပိုင်းစစ်ဆေးပြီး တခါတည်း ပြေးဆွဲခဲ့တာပါ။ ပထမပြေးဆွဲတော့ရက်ဆိုတော့ လူကတော့ အနည်းငယ်နည်းပါတယ်။ ရထားခရီးစဉ်ဟာ ပြည်သူတွေ ကုန်ကျစရိတ် အသက်သာဆုံးနဲ့ အန္တရာယ်အကင်းဆုံးဖြစ်တာကြောင့် နေ့စဉ်ပြေးဆွဲပေးနိုင်အောင် ကြိုးစားပေးနေပါတယ်” လို့ ပြောပါတယ်။
ရန်ကုန်-မော်လမြိုင် ကားလမ်းပိုင်းမှာရှိတဲ့ တံတားတွေ မကြာခဏမိုင်းခွဲခံရတာကြောင့် လမ်းပန်းဆက်သွယ်ရေး ပြတ်တောက်နေတဲ့အချိန်မှာ ရထားပြန်လည်ပြေးဆွဲနိုင်တာဟာ ခရီးသည်တွေအတွက် ပိုအဆင်ပြေတယ်လို့ မော်လမြိုင်ဒေသခံတယောက်က ပြောပါတယ်။
မော်လမြိုင်-ရန်ကုန် အထက်တန်းရထားလက်မှတ်တွေကို ၂ ရက်၊ ၃ ရက်ကြိုတင် ရောင်းချမှာဖြစ်ပြီး ရိုးရိုးတန်း ရထားလက်မှတ်ကိုတော့ တရက်ကြိုတင်ပြီး မော်လမြိုင်ဘူတာကြီး ရက်ကြိုလက်မှတ်ရုံမှာ မနက် ၇ နာရီကနေ မွန်းလွဲ ၃ နာရီအထိ ရောင်းချသွားမှာဖြစ်တယ်လို့ မော်လမြိုင်ဘူတာကြီးက ထုတ်ပြန်ထားပါတယ်။
