အမေရိကန်၊ ဗြိတိန်နဲ့ သြစတြေးလျတို့အကြား AUKUS ကာကွယ်ရေးသဘောတူညီချက်ရဲ့ အစိတ်အပိုင်းတခုအဖြစ် တောင်ကိုရီးယားနိုင်ငံက ပူးပေါင်းပါဝင်နိုင်ရေး ဆွေးနွေးခဲ့တယ်လို့ တောင်ကိုရီးယားကာကွယ်ရေးဝန်ကြီး ရှင်းဝန်းဆစ်ခ်က မေ ၁ ရက်မှာ ပြောပါတယ်။
ဒါ့အပြင် ဒီသီတင်းပတ်တွေအတွင်း ဂျပန်နိုင်ငံပါ ဝင်ရောက်ခွင့်ရရေး တရားဝင်ဆွေးနွေးပွဲတွေ ကျင်းပမယ်လို့ သိရပါတယ်။
AUKUS ဟာ အာရှပစိဖိတ်ဒေသအတွင်း တရုတ်နိုင်ငံရဲ့ ကြီးထွားလာနေတဲ့ ဩဇာကို ဆန့်ကျင်ဖို့ ကြိုးပမ်းချက်ရဲ့ တစိတ်တပိုင်းပါ။ ၂၀၂၁ ခုနှစ်မှာ ၃ နိုင်ငံက ဖွဲ့စည်းခဲ့တဲ့ လုံခြုံရေးဆိုင်ရာ သဘောတူညီချက်တရပ်လည်း ဖြစ်ပါတယ်။
သဘောတူညီချက်ရဲ့ ပထမအဆင့်မှာ သြစတြေးလျနိုင်ငံက လိုချင်နေတဲ့ နျူစွမ်းအင်သုံး ရေငုပ်သင်္ဘောနည်းပညာကို ပေးဖို့ဖြစ်ပြီး အဓိကအဖွဲ့ဝင် ၃ နိုင်ငံကိုသာ ကန့်သတ်ထားပါတယ်။
ဒုတိယအဆင့်မှာတော့ "Pillar 2" လို့ခေါ်ပြီး ကွမ်တမ်ကွန်ပြူတာနဲ့ အသံထက်မြန်တဲ့ ဒုံးပျံတွေအပါအဝင် နယ်ပယ်များစွာမှာ စစ်ဘက်ဆိုင်ရာနည်းပညာမျှဝေဖို့ကို အာရုံစိုက် ထားပါတယ်။
မဲလ်ဘုန်းမြို့မှာ သြစတြေးလျနဲ့ တောင်ကိုရီးယား နှစ်နိုင်ငံက ကာကွယ်ရေးနဲ့ နိုင်ငံခြားရေး ဝန်ကြီးတွေရဲ့ အစည်းအဝေးမှာ မြောက်ကိုရီးယားနဲ့ အရှေ့အလယ်ပိုင်းအပါအဝင် နိုင်ငံခြားရေး နဲ့ လုံခြုံရေးဆိုင်ရာ ကိစ္စရပ်တွေကို ခြုံငုံဆွေးနွေးခဲ့ကြပါတယ်။
Source/Photo-REUTERS/Asanka Brendon Ratnayake
