တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်မှာ စစ်ကောင်စီအခြေစိုက် ခမရ ၅၆၁ တပ်ရင်းကို ဧပြီ ၄ ရက်က ဒရုန်းနဲ့ ဗုံးသီးချ တိုက်ခိုက်ခဲ့တယ်လို့ မြိတ်ခရိုင် ပြည်သူ့ကာကွယ်ရေးစစ်ကြောင်းက ပြောပါတယ်။
ဧပြီ ၄ ရက် ညနေ ၅ နာရီလောက်ကနေ ည ၁၂ နာရီကြားမှာ မြိတ်ခရိုင် ပြည်သူ့ကာကွယ်ရေး စစ်ကြောင်း ၁ က ခမရ ၅၆၁ တပ်ရင်းထဲကို ဒရုန်းနဲ့ ဗုံးသီးငါးလုံး ကြဲချခဲ့တယ်လို့ စစ်ကြောင်းရဲ့ တာဝန်ရှိသူတဦးက ပြောပါတယ်။
“တပ်ရင်းထဲကျတာပါ၊ တလုံးက ဗုံးခိုကျင်းထဲကျပြီး သေတယ်။ သူတို့ဘက်က ထိတဲ့သူတွေကို သယ်ထုတ်နေတာတွေနဲ့ အလုပ်ရှုပ်နေကြတယ်။”
ဒရုန်းတိုက်ခိုက်မှုကြောင့် စစ်ကောင်စီတပ်ရင်းက တပ်သားလေးဦး သေဆုံးကာ နှစ်ဦး ဒဏ်ရာရရှိကြောင်း မြိတ်ခရိုင် ပြည်သူ့ကာကွယ်ရေးစစ်ကြောင်းက ပြောပေမဲ့ DVB က သီးခြား အတည်မပြုနိုင်သေးပါဘူး။
ပြီးခဲ့တဲ့ ဧပြီ ၂ ရက်ကလည်း ခမရ ၅၆၁ တပ်ရင်းကို ပထမအကြိမ် ဒရုန်းနဲ့ တိုက်ခိုက်စဉ်ကလည်း တပ်သားသုံးဦး သေဆုံးခဲ့တယ်လို့ ဆိုပါတယ်။
မြိတ်ခရိုင် ပြည်သူ့ကာကွယ်ရေး ပူးပေါင်းစစ်ကြောင်း ၁ ကို မြိတ်ခရိုင်တပ်ရင်း ၂ (တပ်ခွဲ ၁)၊ ဘက်မလိုက်ပြောက်ကျားတပ်ဖွဲ့၊ တောင်ပိုင်းသူရဲကောင်းတပ်ဖွဲ့၊ မြိတ်မြို့နယ်(ပကဖ)၊ ဒရုန်းတပ်ဖွဲ့တို့နဲ့ ပူးပေါင်းဖွဲ့စည်းထားပါတယ်။
စစ်ကောင်စီတပ်ရင်းတွေ ဆက်တိုက်ဆိုသလို တိုက်ခိုက်ခံနေရပြီး တနင်္သာရီမြို့နယ်မှာ စစ်ကြောင်းထိုး တိုက်ခိုက်တာတွေ လုပ်လာနိုင်တာကြောင့် ဒေသခံပြည်သူတွေ အသွားအလာ သတိပြုကြဖို့ ဒေသတွင်း တော်လှန်ရေးတပ်ဖွဲ့တချို့က အသိပေးထားပါတယ်။
