ရန်ကုန်၊ ဒေါပုံမြို့နယ်၊ ဝါဆိုတံတား (ဂျပန်တံတား) အဆင်းမှာ မတ်လ ၈ ရက် နေ့လယ် ၁၁ နာရီ ၅၅ မိနစ်လောက်က YBS ၁၃၄ ယာဉ်လိုင်းက မီနီဘတ်စ်ကားတစီး တိမ်းမှောက် မီးလောင်ခဲ့ပြီး ခရီးသည် ၅ ဦး ဒဏ်ရာရရှိခဲ့တယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။
မျက်မြင်တွေ့ရှိသူတွေရဲ့ ပြောပြချက်အရ YBS ဘတ်စ်ကားဟာ လမ်းပြောင်းပြန်မောင်းလာတဲ့ အိမ်စီးကားတစီးကို တိမ်းရှောင်ရင်းကနေ တုံးလုံးလဲမီးလောင်သွားခဲ့တာလို့ သိရပါတယ်။
YBS ၁၃၄ ဟာ ဒဂုံဆိပ်ကမ်းမြို့နယ် ၁၆၈ ရပ်ကွက် ဂိတ်ကနေ လသာမြို့နယ်အထိ ပြေးဆွဲနေတဲ့ မီနီဘတ်စ်ယာဉ်လိုင်းဖြစ်ပြီး ယာဉ်မီးလောင်မှုအတွင်း အသက် ၂၀ ကျော်အရွယ် အမျိုးသား ၁ ဦးနဲ့ အမျိုးသမီး ၄ ဦးမှာ ပွန်းပဲ့ပြတ်ရှမစိုးရိမ်ရဒဏ်ရာတွေ ရရှိခဲ့ပါတယ်။
မြို့ခံလူမှုကူညီရေးအသင်းဝင်တဦးက “ YBS က ဒဂုံဆိပ်ကမ်းကနေ လိုင်းဆွဲတဲ့ကား၊ YBS ၁၃၄ ပါ။ လူနာကကျား ၁ ဦး၊ မ ၄ ဦး အစိမ်းရောင်အဆင့်တွေပါ”လို့ ဆိုပါတယ်။
မီးလောင်မှုနေရာကို ဒေါပုံမြို့နယ်မီးသတ်က မီးသတ်ယာဉ် တစီး၊ ပုဇွန်တောင်မြို့နယ်မီးသတ်က မီးသတ်ယာဉ် တစီးနဲ့ အရပ်ဖက်အသင်းတွေက လာရောက်ငြှိမ်းသတ်ခဲ့ကြတာကြောင့် နေ့လယ် ၁၂ နာရီ ၁ မိနစ်မှာ မီးငြိမ်းသွားပါတယ်။
