တရုတ်နိုင်ငံရဲ့ တနှစ်တာ ကာကွယ်ရေးအသုံးစရိတ်ကို အခုနှစ်မှာ မနှစ်ကထက် ၇ ဒသမ ၂ ရာခိုင်နှုန်း တိုးသုံးသွားမှာဖြစ်တယ်လို့ အစိုးရသတင်းရင်းမြစ်တွေကို ကိုးကားပြီး Nikkei Asia သတင်းဌာနက ဖော်ပြပါတယ်။
ဒီနှစ်အတွက် တိုင်းပြည်စီးပွားရေးတိုးတက်မှု မျှော်မှန်းချက် ၅ ရာခိုင်နှုန်းဝန်းကျင်ပဲ မှန်းထားပြီး အခုနှစ်ပိုင်းတွေမှာ တိုးတက်မှုနှုန်း နှေးလာပေမဲ့ စစ်ရေးအသုံးစရိတ်ကိုတော့ နှစ်စဉ် ၇ ရာခိုင်နှုန်းဝန်းကျင် တိုးသုံးနေတာ သုံးနှစ်ဆက်ရှိပြီ ဖြစ်ပါတယ်။
မတ်လ ၅ ရက် မနက်ပိုင်း တရုတ်အမျိုးသားပြည်သူ့ကွန်ဂရက်မှာ ဘတ်ဂျက်အစီအစဉ်ကို ကြေညာသွားဖို့ရှိပြီး ကာကွယ်ရေးအသုံးစရိတ်ဟာ ၂၀၂၄ ဘတ်ဂျက်နှစ်အတွက် ယွမ် ၁ ဒသမ ၆၇ ထရီလီယံ (အမေရိကန်ဒေါ်လာ ၂၃၂ ဘီလီယံ) ရှိလာမှာဖြစ်ပါတယ်။
စစ်ရေးအသုံးစရိတ်မှာ တရုတ်ထက်များတာ အမေရိကန်ပဲ ရှိပါတော့တယ်။ အနောက်ကမ္ဘာနဲ့သာမက ထိုင်ဝမ်နဲ့ ဆက်ဆံရေး တင်းမာလာချိန်၊ တောင်တရုတ်ပင်လယ်နဲ့ အရှေ့တရုတ်ပင်လယ်မှာလည်း ပိုင်နက်အငြင်းပွားနေကြချိန်မှာ တရုတ်က စစ်အင်အားကောင်းအောင် တောက်လျှောက်ကြိုးပမ်းနေပါတယ်။
ဒါပေမဲ့ ပြည်တွင်းအသားတင်ကုန်ထုတ်လုပ်မှုတန်ဖိုး (ဂျီဒီပီ) နဲ့ ကြည့်ရင်တော့ တရုတ်စစ်ရေးအသုံးစရိတ်ဟာ ဂျီဒီပီရဲ့ ၁ ဒသမ ၃ ရာခိုင်နှုန်းသာ ရှိပါတယ်။
အမေရိကန်က ဂျီဒီပီရဲ့ ၃ ဒသမ ၅ ရာခိုင်နှုန်းသုံးပြီး နေတိုးအဖွဲ့ဝင်တွေအတွက် လမ်းညွှန်ချက်က ကာကွယ်ရေးအသုံးစရိတ်ကို ဂျီဒီပီရဲ့ ၂ ရာခိုင်နှုန်းအထိ သုံးဖို့ သတ်မှတ်ထားတာပါ။
မြန်မာနိုင်ငံမှာတောင် စစ်ရေးအသုံးစရိတ်ဟာ ၂၀၂၂ မှာ ဂျီဒီပီရဲ့ ၃ ရာခိုင်နှုန်းအထိ ရှိတယ်လို့ ကမ္ဘာ့ဘဏ်အချက်အလက်တွေက ဖော်ပြပါတယ်။
Source/Photo-REUTERS/Jason Lee
