ရခိုင်ပြည်နယ်၊ ကျောက်တော်မြို့အတွင်းရှိ စစ်ကောင်စီရဲ့ တပ်မဌာနချုပ်၊ တပ်ရင်းစခန်းတွေ အားလုံးကို သိမ်းပိုက်လိုက်ပြီလို့ ရက္ခိုင့်တပ်တော် (အေအေ)က ဖေဖော်ဝါရီ ၁၃ ရက်မှာ ဓာတ်ပုံတွေနဲ့တကွ ထုတ်ပြန်ကြေညာပါတယ်။
တရက်တည်းမှာပဲ မင်းပြားမြို့နယ်မှာလည်း သက်ပုန်းရွာအနီး ရေကြောင်းတိုက်ပွဲဖြစ်ပွားပြီး စစ်ကောင်စီရဲ့ စစ်သင်္ဘော ၁ စီးကို ထပ်မံတိုက်ခိုက် သိမ်းပိုက်နိုင်ခဲ့တယ်လို့ အေအေက ထုတ်ပြန်ပါတယ်။
ဖေဖော်ဝါရီ ၁၂ ရက်မှာလည်း မင်းပြားမြို့နယ်၊ ပုလဲပေါက်ကျေးရွာအနီး ရေကြောင်းတိုက်ပွဲမှာ မြစ်ကြောင်းတလျှောက်ရှိ ကျေးရွာတွေကို လက်နက်ကြီးနဲ့ ပစ်ခတ်ဒုက္ခပေးနေတဲ့ စစ်သင်္ဘော ၁ စီးအားကို ထပ်မံ တိုက်ခိုက်နိုင်ခဲ့တယ်လို့ဆိုပါတယ်။
အလားတူ ဖေဖော်ဝါရီ ၇ ရက်နဲ့ ၈ ရက်တွေမှာ ကျောက်တော်မြို့နယ်၊ အပေါက်ဝကျေးရွာအနီး ရေကြောင်းတိုက်ပွဲမှာ စစ်ကောင်စီ ရေတပ်က စစ်သင်္ဘော ၂ စီးနဲ့ ဇက်ရေယာဉ် ၁ စီးကို တိုက်ခိုက်ခဲ့ပြီး မီးလောင်ပျက်စီးကာ ရေထဲနစ်မြုပ်သွားအောင် ပြုလုပ်နိုင်ခဲ့တယ်လို့ အေအေက ထုတ်ပြန်ထားပါတယ်။
ဖေဖော်ဝါရီ ၇ ရက်မှ ၁၃ ရက်အထိ၊ ၆ ရက်တာ ရေကြောင်းတိုက်ပွဲအတွင်း စစ်ကောင်စီရဲ့ စစ်သင်္ဘော ၃ စီးနဲ့ ဇက်ရေယာဉ် ၂ စီး၊ စုစုပေါင်း ၅ စီးကို တိုက်ခိုက်နှစ်မြှုပ်နိုင်ခဲ့ပြီး သင်္ဘာ ၄ စီးမှာလည်း ရေချလို့ မရနိုင်တဲ့အထိ ပျက်စီးသွားခဲ့တယ်လို့ အေအေ ထုတ်ပြန်ချက်မှာ ဖော်ပြပါတယ်။
အဆိုပါ တိုက်ပွဲတွေမှာ နှစ်ဖက်တပ်တွေ ထိခိုက်ဒဏ်ရာရတဲ့ အခြေအနေကို မသိရသေးသလို စစ်ကောင်စီဘက်ကလည်း သတင်းထုတ်ပြန်တာ မရှိသေးပါဘူး။
Photo- AA
