မန္တလေးတိုင်း၊ အောင်မြေသာဇံမြို့နယ်မှာ No-More Dictatorship ပြောက်ကျားတပ်ဖွဲ့ဝင် ၁ ဦးနဲ့ အရပ်သား ၂ ဦးကို ဖေဖော်ဝါရီ ၄ ရက်နေ့မှာ စစ်ကောင်စီတပ်ဖွဲ့တွေက ဖမ်းဆီးခဲ့တယ်လို့ NMD မြို့ပြပြောက်ကျားတပ်ဖွဲ့ကနေ သိရပါတယ်။
No-More Dictatorship အဖွဲ့ဝင်တွေဖြစ်တဲ့ အောင်မြေသာဇံမြို့နယ် မင်းတဲအီကင်းရပ်ကွက်မှာ နေထိုင်တဲ့ မသီတာစိုးနဲ့ ကိုတိုးညွန့်၊ ပြည်ကြီးရန်လုံရပ်ကွက်မှာ နေထိုင်တဲ့ မကေခိုင်စိုးတို့ကို လက်နက်တွေနဲ့ ဖမ်းမိခဲ့တယ်လို့ ဖေဖော်ဝါရီ ၆ ရက်နေ့မှာ စစ်ကောင်စီက ထုတ်ပြန်ခဲ့ပါတယ်။
ဖမ်းဆီးခံရသူ ၃ ဦးဟာ ကြာအင်းဆိပ်ကြီးမြို့မှာ နေထိုင်တဲ့ အမျိုးသားတဦးထံက ခရီးသည်တင်ကားနဲ့ မန္တလေးကို ပို့ဆောင်ထားတဲ့ လက်နက်တွေကို စစ်ကိုင်းဘက် ပို့ပေးနေတာဖြစ်တယ်လို့ ဖော်ပြထားပါတယ်။
NMD တာဝန်ရှိသူတဦးကတော့ ဖမ်းဆီးခံခဲ့ရတဲ့ ၃ ဦးထဲမှာ ထောက်ပို့တပ်သား ၁ ဦးသာပါပြီး ကျန် ၂ ဦးက သာမန်အရပ်သားတွေသာ ဖြစ်တယ်လို့ ပြောပါတယ်။
“မန္တလေးမှာ လက်နက်နဲ့ ၃ ယောက် ဖမ်းခံရတာ ဟုတ်ပါတယ်။ ဒါပေမဲ့ ကျနော်တို့တပ်ဖွဲ့က ထောက်ပို့တပ်သား တယောက်တည်းပါ။ စစ်ကောင်စီထုတ်ပြန်သလို ၃ ယောက်လုံး ထောက်ပို့တပ်သား မဟုတ်ပါဘူး။ ကျန်တဲ့နှစ်ယောက်က မီနီအိုးဝေမောင်းတဲ့သူတဦးနဲ့ ဒီတိုင်း အဖော်လိုက်ပေးတဲ့ တယောက်ပါ။”
အဖွဲ့အတွက် အရေးကြီးတဲ့ ထောက်ပို့တပ်သား ၁ ဦးအပြင် လက်နက်အများအပြားလည်း ဖမ်းဆီးခံထားရတဲ့ထဲ ပါသွားပြီး ဆုံးရှုံးမှုများခဲ့ပေမဲ့ အရင်ကထက် ပိုကြိုးစား ဆောင်ရွက်သွားမယ်လို့ သူက ဆက်ပြောပါတယ်။
အာဏာသိမ်းပြီး ၃ နှစ်ကျော်အတွင်း မန္တလေးမြို့မှာ မြို့ပြပြောက်ကျားတပ်ဖွဲ့ဝင် ၃၀၀ မှ ၅၀၀ ကြားအထိ ဖမ်းဆီးခံထားရတယ်လို့ NMD အဖွဲ့ကနေ သိရပါတယ်။
