ကရင်နီ(ကယား)ပြည်နယ်၊ ဒီးမော့ဆိုမြို့နယ် အနောက်ခြမ်းရှိ စာသင်ကျောင်း ၂ ကျောင်းကို ဖေဖော်ဝါရီ ၅ ရက်မနက်မှာ စစ်ကောင်စီတပ်က လေယာဉ်နဲ့ ၁၀ ကြိမ်ထက်မနည်း ဗုံးကြဲတိုက်ခိုက်ခဲ့လို့ စာသင်နေတဲ့ကလေးငယ် ၄ ဦး သေဆုံးပြီး ၁၅ ဦး ဒဏ်ရာရကာ အမျိုးသား ၁ ဦး သေဆုံး၊ ၅ ဦး မနည်း ထိခိုက်ဒဏ်ရာရရှိခဲ့ပါတယ်။
ဒီနေ့ မနက်က ၁၀ နာရီကျော်ကနေ ၁၁ နာရီ ၂၀ မိနစ်လောက်အထိ စစ်ကောင်စီတပ်က ဂျက်လေယာဉ် ၃ စင်းနဲ့ ပစ်ခတ်ခဲ့သလို လက်နက်ကြီးတွေနဲ့ပါ ပစ်ခတ်ခဲ့တဲ့အတွက် ကျောင်းတက်နေတဲ့ ကျောင်းသား ကလေးငယ်တွေ သေဆုံးရတာလို့ ကရင်နီပြည်ကြားကာလ အုပ်ချုပ်ရေးကောင်စီအတွင်းရေးမှူး ၂ ဗညားခွန်အောင်က ပြောပါတယ်။
“ကျောင်း ၂ ကျောင်းပေါ့၊ ကျနော်တို့ခေါ်တာက လွိုင်နန်းဖကျောင်းနဲ့ ဒေါဆီအီကျောင်းကို စစ်ကောင်စီက အနည်းဆုံး လေယာဉ်နဲ့ ၁၀ ကြိမ်တိုင်တိုင် ဗုံးကြဲပစ်ခတ်တိုက်ခိုက်ခဲ့တယ်။ နောက်လွိုင်ကော်နဲ့ ဒီးမော့ဆိုကနေလည်း လက်နက်ကြီးတွေနဲ့ ၄ ကြိမ် ၅ ကြိမ်အထိ လှမ်းပြီးတော့ ထုလာတာရှိတာပေါ့။ အဲဒီအတွက်ကြောင့်မို့ ကျနော်တို့ ကျောင်းသားကလေးငယ် ၄ ဦး ပွဲချင်းပြီး သေဆုံးသွားတယ်။ ၁၅ ဦးဝန်းကျင်အထိ ထိခိုက်ဒဏ်ရာရှိခဲ့တယ်။ ကျောင်းဆရာ၊ ဆရာမ ၃ ဦး ထိခိုက်ဒဏ်ရာရတယ်။ တဦးကလည်းနည်းနည်း ပြင်းထန်တာပေါ့နော်။ ပြီးတော့ အရပ်သား သက်ကြီးပိုင်း ၁ ဦး သေဆုံးတယ်။ နောက်ပြီး ကျေးရွာသူ ကျေးရွာသား စစ်ရှောင် ၅ ဦးထိခိုက်ဒဏ်ရာရတယ်။”
လေကြောင်းတိုက်ခိုက်မှုကြောင့် ကျောင်းဆောင် ၆ ခု ထိခိုက်ပျက်စီးသွားခဲ့ပြီး ကျောင်းဆောင် ၂ ခုမှာ လုံးဝ ပြိုကျပျက်စီးသွားခဲ့တယ်လို့လည်း ဗညားခွန်အောင်က ပြောပါတယ်။
ဒီးမော့ဆိုမြို့နယ် ၄ မိုင်က ဒေါဆီအီကျောင်းမှာ သူငယ်တန်းကနေ ၈ တန်းအထိ ကျောင်းသူကျောင်းသား ၂၀၀ လောက် ပညာသင်နေကြတာဖြစ်ပြီး ကျောင်းတက်ချိန် လေယာဉ်နဲ့ ပစ်ခတ်ခံရတာဖြစ်တယ်လို့လည်း ဒေသခံက ပြောပါတယ်။
ကရင်နီလူ့အခွင့်အရေးအဖွဲ့ကတော့ စာသင်ကျောင်းတွေကို စစ်ကောင်စီရဲ့ လေကြောင်း တိုက်ခိုက်မှုအပေါ် ရှုတ်ချလိုက်ပြီး အရပ်ဘက်အခြေခံအဆောက်အဦနဲ့ အရပ်သားတွေ ခိုလှုံရာ နေရာတွေကို ရည်ရွယ်ချက်ရှိရှိ ဖျက်ဆီးတာဖြစ်သလို အိုးအိမ်စွန့်ခွာထွက်ပြေးရတဲ့ ကရင်နီလူမျိုး ထောင်ပေါင်းများစွာကို ရည်ရွယ်ချက်ရှိရှိ ဖျက်ဆီးနေတာဖြစ်တယ်လို့ ထုတ်ပြန်ထားပါတယ်။
