တွဲဖက်ကစားခဲ့ဖူးတဲ့အသင်းဖော်တွေထဲမှာ ကားလို့စ်တီဗက်ဇ်က အကြိုက်ဆုံးအသင်းဖော်ဖြစ် ကြောင်း ဝိန်းရွန်းနီက ပြောသွားပါတယ်။
အာဂျင်တီးနားတိုက်စစ်မှူးဟောင်း တီဗက်ဇ်နဲ့ ဝိန်းရွန်းနီတို့ဟာ ၂၀၀၇ ခုနှစ်ကနေ ၂၀၀၉ ခုနှစ်အထိ မန်ယူအသင်းမှာ အတူတွဲဖက်ကစားခဲ့တာပါ။
တခြား တိုက်စစ်မှူးတွေနဲ့ တွဲဖက်ကစားရာမှာ နံပါတ် ၁၀ နောက်ချန် တိုက်စစ်မှူးနေရာအဖြစ် ပြောင်းလဲကစားခဲ့ရပြီး တီဗက်ဇ်နဲ့ တွဲဖက်ကစားရာမှာတော့ နံပါတ် ၉ နေရာကို တယောက်တလဲ ပြောင်းလဲကစားလို့ရတာကြောင့်ဖြစ်တယ်လို့ ရွန်းနီက ပြောပါတယ်။
“ကျနော်အနှစ်သက်ဆုံး အသင်းဖော်ကတော့ တီဗက်ဇ်ပါ။ ကျနော်တို့နှစ်ယောက်ရဲ့ ဆက်သွယ်မှုကို တကယ်သဘောကျပါတယ်။ တွဲဖက်တိုက်စစ်မှူးတွေ အနေနဲ့ နားလည်မှုရှိရှိ ကစားနိုင်ခဲ့တယ်။ ပုံမှန်ဆိုရင် ဆာဟာ၊ နစ္စတယ်ရွိုင်း၊ ဗန်ပါဆီ ဘယ်သူတွေနဲ့ပဲ ကစားသည်ဖြစ်စေ သူတို့က နံပါတ် ၉ နေရာမှာ ကစားခွင့်ရပြီး ကျနော်က နံပါတ် ၁၀ နေရာမှာ ကစားရတယ်။ တီဗက်ဇ်နဲ့ ကတော့ လှည့်လည်ပြီး ကစားလို့ရတယ်။ ကျနော် နံပါတ် ၉ နေရာရောက်ရင် သူက နံပါတ် ၁၀ နေရာမှာ ကစားတယ်။ ဘောလုံးဆုံးရှုံးချိန်မှာလည်း ကျနော်တို့ နှစ်ယောက်လုံးက ကျွဲနှစ်ကောင်လို ပြန်ရုန်းပြီး လိုက်ကစားတယ်” လို့ ဝိန်းရွန်းနီ ကပြောပါတယ်။
ရွန်းနီနဲ့ တီဗက်ဇ် တိုက်စစ်အတွဲဟာ မန်ယူအသင်းကို ၂၀၀၈ ခုနှစ်ချန်ပီယံလိဂ်မှာ ချန်ပီယံဖြစ်အောင် ကစားနိုင်ခဲ့သလို ပရီးမီးယားလိဂ်မှာလည်း အကောင်းဆုံးအတွဲအဖက်ဖြစ်ခဲ့ ပါတယ်။
Photo - Reuters
