မန္တလေးတိုင်း၊ ပုဂံမြို့သစ်၊ အနော်ရထာရပ်ကွက်၊ သိင်္ခရပ်ရှိ ကမ္ဘောဇဘဏ်ခွဲအမှတ်(၃၈၄)မှာ ဇန်နဝါရီ ၃၁ရက် နေ့လယ် ၁၂ နာရီလောက်က ဓားပြတိုက်ခံရတယ်လို့ ဒေသခံတွေဆီက သိရပါတယ်။
ပုဂံမြို့ရှိ KBZ ဘဏ်ခွဲကို မနေ့ နေ့လယ်က အမည်မသိ လူ ၈ ဦးက ပါဂျဲရိုးကား အနက်ရောင်နဲ့ ရောက်ရှိလာပြီး ဘဏ်မန်နေဂျာကို သေနတ်နဲ့ထောက်ကာ ဓားပြတိုက် လုယက်သွားတာလို့ ဘဏ်နဲ့နီးစပ်သူတဦးက ပြောပါတယ်။
"နေ့လယ် ၁၂ နာရီလောက်က လက်နက်ငယ် အတိုအရှည်တွေကိုင်ပြီး ဝင်လာကြတာ။ အားလုံး ၈ ယောက်လောက်ရှိမယ်။ မန်နေဂျာ ဦးဟန်မျိုးလင်းကို သေနတ်နဲ့ ထောက်ထားပြီး ကျန်တဲ့ဝန်ထမ်း ၁၈ ယောက်ကို ကြမ်းပြင်မှာ မှောက်ခိုင်းထားတာပါ။ ဘဏ်မှာရှိတဲ့ ငွေသား သိန်းသုံးထောင်လောက်ရှိမယ် ယူသွားတာ။”
ပုဂံမြို့ရှိ KBZ ဘဏ်ကိုဓားပြတိုက်သူတွေဟာ ဓါးပြတိုက်လုယက်ပြီးနောက် ပုဂံ-ချောက် ကားလမ်းအတိုင်း ထွက်ပြေးလွတ်မြောက်သွားတယ်လို့ ဒေသခံတွေထံက သိရပါတယ်။
အလားတူ မနေ့မနက် ၉ နာရီလောက်ကလည်း စစ်ကိုင်းတိုင်း၊ ရွှေဘိုမြို့ရှိ KBZ ဘဏ် ၂ မှာ လုံခြုံရေးယူနေတဲ့ စစ်ကောင်စီ တပ်သားတွေကို ပြည်သူ့ကာကွယ်ရေးတပ်ဖွဲ့ Flying Dragon Force က လက်ပစ်ဗုံး ပစ်သွင်း တိုက်ခိုက်ခဲ့ပါတယ်။
