တနင်္သာရီတိုင်း၊ မြိတ်ခရိုင်၊ ပုလောမြို့နယ်၊ မီးလောင်ချောင်းတိုက်ပွဲမှာ ပစ်ခတ်တိုက်ခိုက်မှုတွေဖြစ်ပြီး အရပ်သားသေဆုံးမှုတွေပါ ရှိခဲ့တယ်လို့ ပြည်သူ့ကာကွယ်ရေးတပ်ဖွဲ့တွေက ပြောပါတယ်။
ဇန်နဝါရီ ၃၀ ရက် မနက် ၅ နာရီမှာ ဒေသခံပြည်သူ့ကာကွယ်ရေးတပ်ဖွဲ့တွေက မီးလောင်ချောင်းရှိ ပျူစောထီး ၁၅ ဦးဝန်းကျင်နဲ့ စစ်ကောင်စီတပ်သား ၅ ဦး စုစုပေါင်း အင်အား ၂၀ ဝန်းကျင်လောက်ရှိတဲ့ စခန်းကို ဝင်ရောက်တိုက်ခိုက်ခဲ့တယ်လို့ သိရပါတယ်။
ပြည်သူ့ကာကွယ်ရေး ပူးပေါင်းတပ်ဖွဲ့ဘက်က မီးလောင်ချောင်းစခန်းကို သိမ်းနိုင်ခဲ့ပြီးချိန် မနက် ၈ နာရီခွဲလောက်မှာ စစ်ကောင်စီဘက်က လေကြောင်းနဲ့ ဗုံးနှစ်လုံးချတဲ့အပြင် ပလမြို့ဘက်ကနေပြီး လက်နက်ကြီးနဲ့ အချက် ၃၀ ကျော် ပစ်ခတ်ခဲ့တယ်လို့ တိုက်ပွဲဝင် ရဲဘော်တဦးက ပြောပါတယ်။
“ကျနော်တို့ စခန်းကိုရော အုပ်ချုပ်ရေးမှူးအိမ်ရော ဝင်စီးပြီးပြီ။ ထွက်ပြေးသွားတဲ့ ပျူစောထီးတွေရော ရှိသေးတယ်။ ပြီးမှ သူတို့ဘက်က လေကြောင်းနဲ့ရော လက်နက်ကြီး ပစ်ကူနဲ့ရော ပြန်လည်ပစ်ခတ်လို့ ပြန်ဆုတ်လာရတယ်။”
အဆိုပါတိုက်ပွဲမှာ ပျူစောထီး ၅ ဦးနဲ့ စစ်ကောင်စီတပ်သား ၁ ဦး သေဆုံးပြီး ထိခိုက်ဒဏ်ရာရသူတွေ ရှိတဲ့အပြင် ပြည်သူ့ကာကွယ်ရေး ပူးပေါင်းတပ်ဖွဲ့ဘက်က ၅ ဦးသေဆုံးပြီး ၁ ဦး ထိခိုက်ဒဏ်ရာ ရရှိခဲ့တယ်လို့ ပြည်သူ့ကာကွယ်ရေးတပ်ဖွဲ့တွေရဲ့ ပြောကြားချက်အရ သိရပါတယ်။
ဒါ့အပြင် စစ်ကောင်စီဘက်က လက်နက်ကြီးပစ်ခတ်မှုကြောင့် တပိုရွာက အရပ်သားနှစ်ဦး ထိခိုက်ဒဏ်ရာရပြီး ခရီးသည်ယာဉ်မောင်းတဦး သေဆုံးခဲ့တယ်လို့ ဒေသခံတွေဆီက သိရပါတယ်။
လက်ရှိအခြေအနေမှာတော့ မီးလောင်ချောင်းရွာမှာ စစ်ကောင်စီရဲ့ နယ်မြေရှင်းလင်းရေး လုပ်ဆောင်နေတာကြောင့် မီးလောင်ချောင်းရှိ အရပ်သားတွေနဲ့ အဲဒီရွာအနီး ကြဲရွာရှိ အရပ်သားတချို့ ထွက်ပြေးတိမ်းရှောင်နေရတယ်လို့ ဒေသခံတွေဆီက သိရပါတယ်။
