(က)
ဒီမနက်တော့ ရေနွေးကြမ်းဝိုင်းကို စောစောစီးစီး ရောက်ပါ၏။ အရေးကြီးသော သတင်းစကားတွေ ရှိသည်ဟုဆို၍ ခပ်စောစောထွက်လာခဲ့လေရာ အဘစောမူးသာ၊ စစ်ပြန်ကြီးအဘလုံးတုံးနှင့် စိမ်းသရဖူစိမ်း အဘစိမ်းမောင်တို့က ဆီးကြိုကာ နှုတ်ဆက်ကြပါလေ၏ ခင်ဗျာ။
“အမယ်မယ် . . . ဒီမနက်တော့ စောသားပဲ ‘ကိုစောမောင်ကြီး’ ရဲ့”
“ဟားဟား ဟားဟား ဟားဟား . . . . .”
အရွှင်အဘနှစ်ဦးစကားကြောင့် ‘တွန့်’ ကနဲပင် ဖြစ်သွားရပါလေ၏။ သူတို့ပြောမှပဲ နန်းအချခံခဲ့ရသည့် ‘ဦးစောမောင်’ ကို ပြေး၍ မြင်မိပါလေတော့၏။
၁၉၉၀ ရွေးကောက်ပွဲမှာ NLD က သောင်ပြိုကမ်းပြို အနိုင်ရပြီးနောက် သူက ‘စစ်တန်းလျား’ ကိုပြန်ကာ NLD ကို အာဏာလွှဲမည်ဟု ကတိပေးထားသူဖြစ်လေရာ ဖက်ဆစ်အာဏာရှင်ကြီး ဗိုလ်နေဝင်းက “အခြေအနေကတော့ ငါတို့အတွက် မဟန်တော့ဘူး၊ သန်းရွှေရေ . . ‘စောမောင်ကြီးရူးနေပြီ’ သတင်းလွှင့်ပြီး အာဏာထပ်သိမ်းလိုက်ကွာ” ဆိုသည်မှစကာ မြန်မာပြည်ဟာ ချောက်ထဲကို ထပ်မံကျခဲ့ရတာဟု အဘလုံးတုံးက ပြောပါလေ၏။
“ဟုတ်တယ်မဟုတ်လား ‘စောမောင်ကြီး’”
“ခင်ဗျာ . . . . .”
“ဝါး . . . ဟားဟား ဟားဟား ဟားဟား”
သိပ်မကြာခင်မှာပဲ ‘နောက်ထပ်စောမောင်’ တယောက် ထပ်မံ၍ ပေါ်ထွက်လာနိုင်သည်ဟု လိုင်းပေါ်မှာ ပြောနေကြသည်ဟု ဆိုကြပါ၏။ ဘာဖြစ်လို့လဲမေးတော့ ဟိုဘက်ရက်က ‘တပ်မြို့’ ဖြစ်တဲ့ ပြင်ဦးလွင်မှာ မဘသဘုန်းကြီးတွေ၊ တပ်ထောက်ခံသူ ဘောမတွေက တပ်ချုပ် မအလနေရာမှာ လက်ဘက်ခြောက်စိုးဝင်းကို အစားထိုးဖို့ ပေါ်တင်ကြီး တောင်းဆိုခဲ့ကြပါလို့တဲ့။
“အဲဒါ ဖြစ်နိုင်လားအဘ”
“စစ်မျက်နှာအစုံမှာ တပ်တွေပြုန်းနေတဲ့အချိန်နဲ့ကိုက်ပြီး ဖော်ဆောင်ခဲ့တဲ့ လှုပ်ရှားမှုပဲလကွာ၊ ပြည်သူကို ဇဝေဇဝါဖြစ်အောင် လုပ်တာလည်း ဖြစ်မှာပါ”
“ဒါဆိုရင် ‘ဒုတိယစောမောင်’ မဖြစ်နိုင်ဘူးလို့ ဆိုလိုတာပေါ့”
“‘ဒုတိယစောမောင်’ ဖြစ် မဖြစ်တော့ မသိဘူး၊ ‘လုပ်ကြံခံရ မအလ’ တော့ ဖြစ်ဖို့ အတော့်ကို နီးကပ်နေပြီကွ ဖေကြီးရ”
“ဟားဟား ဟားဟား ဟားဟား ဟားဟား”
သုံးဦးသား ပေါ့ပေါ့ပါးပါး ရယ်နေကြသော်ငြား အဘစိမ်းမောင်ကား သူနှင့်ဘာမှမဆိုင်သလို ရှုတည်တည်ကြီးပါ ခင်ဗျ။ “ရယ်ပါဟ စိမ်းမောင်ရ” ဟု ဝိုင်းပြောကြတော့ “ဘာရယ်စရာ ပါလို့လဲဟ” ဟု ဘုတောပါလေ၏။
“မအလဘောမ သင်္ကန်းအရေခြုံ မဘသ ဝါသဝတို့ ဂေါက်ကိုယ်တော်တို့က မအလကို တပ်ချုပ်အဖြစ်ကနေ ဖယ်ပေးဖို့ လူသိထင်ရှား တောင်းဆိုနေကြတာကြီးဟာ ရယ်စရာ မကောင်းဘူးလားဟ”
“‘ဝါသဝ’ တော့ ‘နာသဝ’ ဖြစ်တော့မယ်”
“ဟားဟား ဟားဟား ဟားဟား . . . စိမ်းမောင်တောင်မှ ကာရံတွေ နဘေတွေနဲ့ ပြောတတ်လာပါပြီလား”
“ဝါး . . . ဟားဟား ဟားဟား ဟားဟား”
(ခ)
သင်္ကန်းအရေခြုံ ဝါသဝ၊ ဂေါက်ကိုယ်တော်မှသည် ကြင်စိုး သာဝ မအလကို ဝိုင်း၍ ဘောမနေခဲ့ကြသည့် ရှိရှိသမျှ ဘောမအပေါင်းတို့သည်လည်း မအလကို ရိသလိုလို ထေ့သလိုလို လှောင်သလိုလို ပြောင်သလိုလို အပေါက်ကိုချိုးလာကာ တော်လှန်စစ်ပွဲ ဆင်နွှဲနေကြသည့် ပြည်သူလူထုကို ဝေဝါးရှုပ်ထွေးအောင် ကြံဆောင်နေကြပြန်သည်ဟု ဆိုကြပါလေ၏။
အဘစိမ်းမောင်က မျက်မှောင်ကြုံ့ကာ ပြောပြန်ပါ၏။
“အရင်တုန်းကဆိုရင် ‘အဘ အဘ’ နဲ့ မ နေတဲ့သူတွေက အခုလို နစကဥက္ကဋ္ဌကြီး ‘နိမ့်ပါးချိန်’ လည်းကျရော ဝိုင်းပြီး ဗျင်းနေကြတယ်ဆိုတော့ အလကားဟာတွေပါ”
“ဟားဟား ဟားဟား ဟားဟား . . . .”
ရပ်ကျေးအစိမ်းဥက္ကဋ္ဌစကားကို ဝိုင်း၍ဟားကြပြန်လေရာ အဘစိမ်းမှာ ဘုကြည့်ကြည့်ပါလေ၏ ခင်ဗျာ။ “မင်းတို့က ဘာထရယ်ကြပြန်တာလဲ ဟ” ဟု မေး၏။
“မင်းစကားထဲမှာ ‘မအလကြီး နိမ့်ပါးချိန်’ ဆိုတာပါတော့ ရယ်ရတာပေါ့ကွာ”
“ဟေ . . .”
“ဒါနဲ့ မင်းတို့အဘ မအလကြီး ‘နိမ့်ပါးနေပြီ’ ဆိုတာ တကယ်လားဟ”
“အဲ . . . ဟို . . . ဒီ . . . ဒီ လို”
“ဟားဟား ဟားဟား ဟားဟား ဟား”
“စိမ်းမောင် . . . စိမ်းမောင် . . . အခုတော့လည်း ဘာမဆိုလုပ်ရဲတယ်ဆိုတဲ့ မအလကြီး နိမ့်ပါးလာတာကို လက်ခံလိုက်ပြီပေါ့ နော်”
“အမ် . . .”
“ဝါး . . . ဟားဟား ဟားဟား ဟားဟား”
အဘစိမ်းမောင်ကား တိမ်းရှောင်ကာ အလင်း၏အလျင်ဖြင့် ပြန်ပြေးချင်နေပြီ ဖြစ်ပါ၏။ အရွှင်အဘများကား ပြုံးဖြဲဖြဲ ဆင်တူမျက်နှာများဖြင့် ဖေကြီးအား လှမ်းကြည့်ကြပါ၏။ ပြီးတော့ စကားဆက်ကြပြန်ပါ၏။
“မင်းတို့အဘ မအလကြီး နိမ့်ပါးမပါးတော့ မသိဘူး . . . သူ့ဖက်ဆစ်တပ်ကြီးကတော့ နိမ့်ပါးသွားလိုက်တာများ အခုဆိုရင် လက်နက်ချ၊ အလံဖြူထောင်၊ အလင်းဝင်၊ ထွက်ပြေးနဲ့ ‘တိုးရစ်စ်’ တွေတောင် ဖြစ်ကုန်ပြီ”
“ဘာ ‘တိုးရစ်စ်’ လဲ လုံးတုံးရ”
“မူးသာကလည်းကွာ . . ဒီကောင်တွေကို ပြည်သူ့ကာကွယ်ရေးတပ်တွေက လိုက်လိုက်တိုက်ရင် ‘ထိုင်း’ တို့၊ ‘အိန္ဒိယ’ တို့၊ ‘တရုတ်’ နိုင်ငံထဲတို့ကို ဝင်ဝင်ပြေးပြီး ကမ္ဘာလှည့် တိုးရစ်စ်တွေ လုပ်နေကြတာလကွာ”
“ဝါး . . . ဟားဟား ဟားဟား ဟားဟား”
(ဂ)
သို့ဖြင့် ‘တိုးရစ်စ်တွေ’ အကြောင်းကို ဆက်ကြလေရာ အိန္ဒိယကို သုံးလေးခေါက် အပြေးအလွှား ရောက်ဖူးသူတွေ၊ တရုတ်ကို ရောက်ဖူးသူတွေ၊ ထိုင်းကို ရောက်ဖူးသူတွေဖြင့် ဖက်ဆစ်လက်ပါးစေတွေရဲ့ လက္ခဏာတွေမှာ ‘ဖောရိမ်းလမ်းကြောင်းတွေ’ ပါမှာ သေချာကြောင်း ပြောကြပါလေ၏။
“သူ့တပည့် လက်ပါးစေ ဖက်ဆစ်တပ်သားတွေမှာ ‘ဖောရိမ်းလမ်းကြောင်းတွေ’ ပါပေမဲ့ အယုတ်တကာ့ ထိပ်ခေါင် မအလ ကြောင်ချီးရဲ့ လက္ခဏာမှာတော့ အဲသည် ‘ဖောရိမ်းလမ်းကြောင်းေတွ’ ပါးလျားရာကနေ ပျောက်ဆုံးနေပြီကွ”
“ဟေ . . . ‘နိုင်ငံခြားလမ်းကြောင်းတွေ’ သူ့လက္ခဏာမှာ ပျောက်ကုန်ပြီ . . . ဟုတ်လား”
“အမှန်ကို ပျောက်ကွယ်ကုန်တာ လုံးတုံးရ”
“ဘယ်လိုကြောင့်လဲ ဆိုပါအုံးဟ”
အဘစောမူးသာက ရှင်းပြပါလေ၏။ လူတယောက်ရဲ့ ‘လက္ခဏာ’ ဟာ သူ့အနေအထိုင် သူ့အတွေးအမြင် သူ့လုပ်ရပ်တွေကိုလိုက်ပြီး မကြာခဏ ပြောင်းလဲတတ်ကြောင်း၊ အသက်လမ်းကြောင်းတို့ အောင်မြင်ရေးလမ်းကြောင်းတို့ နှလုံးလမ်းကြောင်းတို့မှသည် အနှီ ‘ဖောရိမ်းလမ်းကြောင်း’ အထိ ပေါ်လိုက် ပျောက်လိုက် ဖြစ်တတ်ကြောင်း ရှင်းပြပါ၏။
ယခုအခါ အဆိုပါ ကြင်စိုး သာဝ မအလ၏ လက်ဖဝါးကို ကြည့်ခွင့်ရမည်ဆိုပါက မြင်ရမည်မှာ ‘နိုင်ငံခြားလမ်းကြောင်း’ လုံးဝနည်းပါး ကွယ်ပျောက်သွားတာ အမှန်ပဲဟု ယုံကြည်ကြောင်း ဆက်ပြောပြပါ၏။ အဘစိမ်းလည်း စိတ်ဝင်တစား ဖြစ်လာပုံရပြီး မေးခွန်းတောင်မှ ဝင်မေးလာပါလေတော့၏။
“ဒီမှာ မူးသာ . . . နစကဥက္ကဋ္ဌကြီးမှာ နိုင်ငံခြားသွားခွင့်ရမယ့်လက္ခဏာ ပျောက်နေတယ်လို့ မင်းဘယ်လိုလုပ် ဟောနိုင်တာလဲ”
“ဟဲ ဟဲ ဟဲ ဟဲ ဟဲ ဟဲ . . . စိမ်းမောင် . . . စိမ်းမောင် . . . ငါက ‘အင်္ဂဝိဇ္ဇာ’ နည်းကော ‘အယူတော်မင်္ဂလာ’ နည်းနဲ့ပါ အသေအချာကို တွက်ချက်ကြည့်ထားတာကွ”
“လုပ်ပါအုံးဟ . . .”
“အေး . . . မင်းတို့ အခုလို နောက်ဆုံးအချိန်အထိ မိုက်မိုက်မဲမဲ ကိုးကွယ်ဆဲဖြစ်တဲ့ မအလကို အာဏာသိမ်းထားတာ ၃ နှစ်ပြည့်တော့မယ့်အချိန်အထိ ဘယ်နိုင်ငံကမှ ‘အစိုးရ’ အဖြစ် အသိအမှတ်မပြုဘူး”
“အဲ . . . . .”
“ကမ္ဘာက အသိအမှတ်မပြုသလို အာဆီယံကလည်း အသိအမှတ်မပြုဘူး”
“အမ် . . . . .”
“ပြီးတော့ သူအားကိုးတဲ့ ပထွေးတွေဖြစ်တဲ့ ရုရှားကော တရုတ်ကပါ ‘အစိုးရအဖြစ် ဝမ်းမြောက်ကြောင်းသဝဏ်လွှာ’ ပို့တာ မြင်လား”
“ဟို . . . ဒီ . . . ဒီ လို . . .”
“အခုဆိုရင် မအလရဲ့ နောက်ဆုံးနေ့ရက်တွေ ဖြစ်နေပြီ၊ အနီးကပ်လုပ်ကြံခံရမလား၊ ဒုတိယစောမောင် ဖြစ်မလား၊ ကိုယ့်ကိုယ်ကိုယ် သတ်သေမလား၊ ပြည်ပကိုထွက်ပြေးမလား”
“နေပါဦး မူးသာရ . . . မင်းပဲ မအလမှာ ပြည်ပထွက်ခွာခွင့်လက္ခဏာ ပျောက်နေပြီဆို ဟ”
“အေးပါ လုံးတုံးရ . . . ဒီကောင်ကြီး ပြည်ပတော့ ထွက်ပြေးလို့ရမှာ မဟုတ်တော့ဘူး”
ဒင်းလို ချီးထုပ်အာဏာရှင်ကို ဘယ်နိုင်ငံကမှ ပြည်ဝင်ခွင့်ဗီဇာ ပေးရဲမှာမဟုတ်တော့ဟု အဘစောမူးသာက ပြောပါ၏။ ဒါပေမယ်လို့ ချွင်းချက်အနေနဲ့ ‘ရုရှား’ ကတော့ မအလရဲ့ ပိုင်ဆိုင်မှုတွေကို ရုရှားကိုပြောင်းရင် လက်ခံချင် လက်ခံနိုင်သဟ ဟု ဆိုပါလေ၏။ ဒါပေမဲ့ ပူတင်လည်း ချီးပေကို လက်မခံဘူးလို့ ထင်သဟဟု ပြောပါ၏။
“အဲဒါကြောင့်ဖြစ်မယ် လုံးတုံးရ . . မအလကြီး ‘ဖိုးချို’ သီချင်းကို ပြန်ပြန်ဆိုပြီး ‘ဖိုးငို’ လုပ်နေတယ် ကြားသဟ”
“ဟေ . . . ဒင်းက ဘယ်လိုတွေများ သီဆို ငိုကြွေးနေတာလဲ မူးသာရ”
စစ်ပြန်ကြီးအဘလုံးတုံး အမေးကို အဘမူးသာက ပြုံးကာနားဆင်ရင်း ရေနွေးတခွက် မော့ချကာ အဟမ်းဟု လည်ချောင်းရှင်းပြီးသကာလ သူ၏ အောင်မြင်လှသည့် ဘယ်သံဝါဝါကြီးဖြင့် ဤသို့ သီဆိုပြပါလေတော့သတည်း။
“အခုတော့ ဘယ်သူမှ
လက်မခံနိုင်တော့မှန်း
တကယ့်ကို သေချာလွန်းခဲ့ပြီ . . .
အခုတော့ ဘယ်ဝါမှ
လက်မခံနိုင်တော့မှန်း
တကယ့်ကို သေချာလွန်းခဲ့ပြီ . . .”
ဖေကြီး(လေရှီး)
