ရန်ကုန်၊ ဒဂုံဆိပ်ကမ်းမြို့နယ်၊ ယုဇနဥယျာဉ်မြို့‌တော် အပိုင်း (A)၊ ၁၀ လမ်းရှိ ၅ လွှာတိုက်ပေါ်ကနေ ဇန်နဝါရီ ၁၆ ရက် ညနေက ကလေး ၂ ဦး ပြုတ်ကျသေဆုံးခဲ့တယ်လို့ မြို့ခံကယ်ဆယ်ရေးအသင်းက ပြောပါတယ်။

အသက် ၁ နှစ် ၁ လအရွယ် မရွှေရည်လင်းလက်နဲ့ အသက် ၇ နှစ်အရွယ် မဖူးပြည့်စံတို့ဟာ ၅ လွှာရှိ အိပ်ခန်းထဲက ကုတင်ပေါ်တက်ဆော့ရာက ပြတင်းပေါက်ကနေ မြေပြင်ကို ပြုတ်ကျခဲ့တာ ဖြစ်ပါတယ်။

အာယုလူမှုကူညီရေးအသင်း တာဝန်ရှိသူက “အသင်းက DB တွေကို မြောက်ဥက္ကလာဆေးရုံကနေ ပြန်သယ်လာပေးတာပါ။ အဲဒီနေ့က ကလေးနှစ်ယောက်စလုံးက တိုက်ရဲ့ နောက်ဆုံးခန်းက ခုတင်ပေါ်မှာ တက်ဆော့နေကြရင်းနဲ့ ပြတင်းပေါက်ပေါ်ကနေ အရှိန်လွန်ပြီး ပြုတ်ကျတာ။ အပေါ်ဆုံး ၅ လွှာကနေပါ။ ကလေးတွေက ညီအစ်မတွေတော့ မဟုတ်ဘူး၊ အိမ်နီးနားချင်းတွေ” လို့ ပြောပါတယ်။

ပြုတ်ကျလို့ရလာတဲ့ ဒဏ်ရာကြောင့် မရွှေရည်လင်းမှာ အခင်းဖြစ်နေရာမှာ သေဆုံးခဲ့ပြီး မဖူးပြည့်စံမှာ မြောက်ဥက္ကလာ မေဓာဝီဆေးရုံမှာ တက်ရောက်ကုသနေချိန် ည ၉ နာရီ ၁၀ မိနစ်လောက်မှာ သေဆုံးခဲ့ပါတယ်။

သေဆုံးကလေးတွေရဲ့ ရုပ်အလောင်းကို မေဓာဝီဆေးရုံ၊ ရေခဲတိုက်ကနေ တောင်ဒဂုံ ကျီစုသုသာန်ကို အာယုလူမှုကူညီရေးအသင်းကားနဲ့ ပို့ဆောင်ပေးခဲ့ပြီး ဇန်နဝါရီ ၁၈ ရက်မှာ သင်္ဂြိုဟ်မယ်လို့ သိရပါတယ်။