မန်ယူအသင်းမှာ ကစားနိုင်ဖို့က တခြားအသင်းတွေလောက် မလွယ်ကူကြောင်း နည်းပြ အဲရစ်တန်ဟတ်ဂ်က ပြောသွားပါတယ်။
အသင်းကနေ ထွက်ခွာသွားတဲ့ ကွင်းလယ်လူ ဗန်ဒီဘိခ်ရဲ့ အခြေအနေအပေါ် သုံးသပ်စကားဆိုချိန်မှာ မန်ယူအသင်းမှာ ကစားနိုင်ဖို့ တခြားအသင်းတွေလောက် မလွယ်ကြောင်း နည်းပြတန်ဟတ်ဂ်က ထည့်သွင်းပြောခဲ့တာပါ။
ဗန်ဒီဘိခ်ဟာ ဒဏ်ရာရရှိမှုများတာကြောင့် အိုင်းယက်စ်တုန်းကလို မဟုတ်ခဲ့ကြောင်း၊ အချိန်များစွာ အနားယူခဲ့ရတာကြောင့် ခြေစွမ်းပြသနိုင်ဖို့ ခက်ခဲခဲ့တာဖြစ်ကြောင်း အဲရစ်တန်ဟတ်ဂ်က ပြောပါတယ်။
နည်းပြတန်ဟတ်ဂ်က “ပရီးမီးယားလိဂ်မှာ ကစားနိုင်ဖို့ ခက်ခဲသလို မန်ယူအသင်းမှာ ကစားနိုင်ဖို့ကလည်း ခက်ပါတယ်။ တခြားဘယ်အသင်းမှာမဆို လွယ်ကူစွာ ကစားလို့ရပေမဲ့ မန်ယူအသင်းမှာတော့ အဲဒီလောက်မလွယ်ပါဘူး။ ဘာဖြစ်လို့လဲဆိုတော့ အသင်းမှာ ကစားရတာက အမြဲတမ်း ဖိအားများလို့ဖြစ်တယ်” လို့ ပြောပါတယ်။
အဲဒီအခြေအနေအပေါ် ဖြေရှင်းသွားရမှာဖြစ်ပေမဲ့ ကစားသမားတိုင်းက ကိုယ့်ကိုယ်ကိုယ် ယုံကြည်မှုရှိဖို့ လိုအပ်ကြောင်းလည်း နည်းပြတန်ဟတ်ဂ်က ပြောသွားပါတယ်။
Photo-Reuters
