ရန်ကုန်၊ လှိုင်မြို့နယ်နဲ့ မန္တလေး-ရန်ကုန် အမြန်လမ်းမတို့မှာ ဇန်နဝါရီ ၅ ရက်က အိမ်စီးကား ၂ စီး အပူလွန်ကဲ မီးလောင်မှုတွေ ဖြစ်ပွားခဲ့ပါတယ်။
လှိုင်မြို့နယ်၊ ၁၂ ရပ်ကွက်၊ လှိုင်တက္ကသိုလ်အနီး ပါရမီလမ်းပေါ်မှာ မနက်အစောပိုင်း ၂ နာရီ မိနစ် ၄၀ လောက်က တိုယိုတာ ဟာရီယာ 99 ကားတစီးဟာ မောင်းနေရင်း မီးလောင်ခဲ့လို့ လှိုင်မြို့နယ်မီးသတ်က မီးသတ်ယာဉ် ၂ စီးနဲ့ လာရောက်ငြှိမ်းသတ်ခဲ့ပါတယ်။
မနက် ၂ နာရီ မိနစ် ၅၀ လောက်မှာ မီးငြှိမ်းသတ်နိုင်ခဲ့ပြီး ကားမီးလောင်မှုကြောင့် လူထိခိုက်မှုမရှိပေမဲ့ ကားတစီးလုံး ပျက်စီးဆုံးရှုံးသွားပါတယ်။
မြို့ခံကယ်ဆယ်ရေးအဖွဲ့ဝင်တဦးက “ကားပေါ်ပါသူတွေတော့ ဘာမှမဖြစ်ပါဘူး။ ကလပ်က ပြန်လာတဲ့ကားလို့ ပြောတယ်။ ကားကတော့ အရိုးပဲကျန်တော့တယ်။ Harrier 99 ကားပါ” လို့ ပြောပါတယ်။
ဒီနေ့ နေ့ခင်း ၁၁ နာရီ မိနစ် ၅၀ လောက်မှာလည်း ရန်ကုန်-မန္တလေးအမြန်လမ်းမကြီး၊ သာဂရအမြန်လမ်း မီးသတ်နယ်မြေ၊ မိုင်တိုင်အမှတ် ၁၇၀/၃ ဖာလုံနဲ့ ၁၇၀/၄ ဖာလုံအကြားမှာ လူ ၂ ဦးပါ အဖြူရောင် Hummer အိမ်စီးကားတစီး မီးလောင်ခဲ့ပါတယ်။
အဆိုပါကားဟာ ရန်ကုန်မြို့ကနေ နေပြည်တော်ကို မောင်းနှင်လာရင်း ကားရှေ့စက်ခန်းကနေ မီးတောက်လာခဲ့ကာ လောင်ကျွမ်းသွားတာ ဖြစ်ပါတယ်။
သာဂရအမြန်လမ်းမီးသတ် တာဝန်ရှိသူတဦးက “လမ်းသွားတဲ့ကားတွေကနေ စခန်းကို လာပြောတာ၊ ကားက အပူလွန်ကဲ လောင်တာပါ။ ကားပေါ်မှာပါတဲ့ ၂ ယောက်တော့ ထိခိုက်မှု မရှိပါဘူး။ ကားက ရန်ကုန်ကနေ နေပြည်တော်ကို မောင်းလာတာ” လို့ ပြောပါတယ်။
မီးလောင်မှုကို လမ်းသွားလမ်းလာ ကားတွေကနေ အမြန်လမ်းမီးသတ်ကို အကြောင်းကြားခဲ့တာဖြစ်ပြီး ရောက်ရှိ ငြှိမ်းသတ်ခဲ့ရာ နေ့လယ် ၁၂ နာရီလောက်မှာ မီးငြိမ်းသွားပါတယ်။
အမြန်လမ်းပေါ်မှာပဲ ပြီးခဲ့တဲ့ ၂၀၂၃ ဒီဇင်ဘာ ၁၈ ရက်က မိုင်တိုင်အမှတ် ၁၂၉/၇ ဖာလုံအနီးမှာ Hono Profia ၁၀ ဘီးကားတစီး လမ်းလယ်ကျွန်းကို တိုက်မိပြီး မီးလောင်ခဲ့သလို ဒီဇင်ဘာ ၁၉ ရက်ကလည်း မိုင်တိုင်အမှတ် ၂၄၆/၃ ဖာလုံနဲ့ ၄ ဖာလုံကြားမှာ Express ခရီးသည်တင်ယာဉ်တစီးရဲ့ ကားနောက်ဘက် အင်ဂျင်ခန်းကနေ မီးလောင်မှု ဖြစ်ပွားခဲ့ပါတယ်။
