ပဲခူးတိုင်း၊ ပဲခူးမြို့နယ် ၁၀ မိုင်ကုန်းရှိ မဟာဝိဟာရကျောင်းတိုက်က အသက် ၁၀ နှစ်ကျော်အရွယ် ကိုရင် ၄ ပါး ပျောက်ဆုံးနေတာ တလကျော်လာပြီး လက်ရှိအချိန်အထိ ပြန်မတွေ့သေးဘူးလို့ ဂေါပကအဖွဲ့ဆီက သိရပါတယ်။
ဂေါပကအဖွဲ့ဝင်တယောက်က “နိုဝင်ဘာ ၂၄ ရက် မနက်ပိုင်းကတည်းက ပျောက်ဆုံးသွားတာ။ ကိုရင် ၄ ပါးလုံးက အဲ့ဒီနေ့ အရုဏ်ဆွမ်း ဘုဉ်းပေးပြီးနောက် ဆရာတော်နဲ့ ကျောင်းနေဦးပဉ္စင်းတွေကို လျှောက်ထားခြင်းမရှိဘဲ ကျောင်းတိုက်က ထွက်သွားတာ။ ဒီနေ့အထိ ဘာအဆက်အသွယ်မှ မရသေးဘူး” လို့ ပြောပါတယ်။
ပျောက်ဆုံးနေတဲ့ ကိုရင် ၄ ပါးဟာ ဧရာဝတီတိုင်း၊ ဝါးခယ်မမြို့နယ်က ရှင်ဓမ္မနန္ဒ၊ ရှမ်းပြည်နယ် လားရှိုးမြို့နယ်က ရှင်ဃောသက၊ ရခိုင်ပြည်နယ် တောင်ကုတ်မြို့က ရှင်စန္ဒနဲ့ ဂွမြို့နယ်က ရှင်ပညာသိရီတို့ ဖြစ်တယ်လို့ သိရပါတယ်။
ကိုရင်တွေနဲ့ ရင်းနှီးသူတယောက်က “ကိုရင်တွေက မဟာဝိဟာရကျောင်းတိုက်ကို ရောက်ရှိ သီတင်းသုံးနေတာ။ ၃ နှစ်နီးပါးလောက် ရှိနေပြီ။ မိဘတွေဘက်ကို ကိုရင်တွေ ရောက်လာတာ ဆက်သွယ်တော့လည်း မရောက်လာဘူးလို့ပြောတယ်။ ဆရာတော်တွေနဲ့ ဒါယကာ၊ ဒါယိကာမတွေက စိတ်ပူနေတယ်” လို့ ပြောပါတယ်။
ကိုရင်ငယ်လေးတွေကို တွေ့ရှိခဲ့ပါက ဖုန်း-၀၉-၆၇၆၆၉၁၄၇၅၊ ၀၉-၆၉၇၄၅၆၀၈၁၊ ၀၉-၆၆၈၆၁၄၁၇၄ နဲ့ ၀၉-၇၉၀၇၇၂၉၃၃ တို့ကို ဆက်သွယ်အကြောင်းကြားပေးကြဖို့ မဟာဝိဟာရကျောင်းတိုက်က လူမှုကွန်ရက်ကတဆင့် အကူအညီ တောင်းခံထားတယ်လို့ သိရပါတယ်။
