မန်ယူအသင်းတိုက်စစ်မှူးတွေ ဂိုးပေါက်ပျောက်နေတာဟာ ယုံကြည်မှု အားနည်းတာကြောင့် ဖြစ်တယ်လို့ နောက်ခံလူ လုခ်ရှောက ပြောသွားပါတယ်။
မန်ယူအသင်းဟာ ပရီးမီးယားလိဂ်မှာ နောက်ဆုံး ၄ ပွဲဆက်တိုက် ဂိုးမသွင်းနိုင်ခဲ့တာပါ။
တိုက်စစ်မှူး ရက်ရှ်ဖို့ဒ် ခြေစွမ်းကျဆင်းနေသလို ဟွိုက်လန်း၊ အန်တိုနီ တို့ဟာလည်း သွင်းဂိုး မရသေးတာပါ။
တိုက်စစ်က ဂိုးမသွင်းနိုင်သေးတာက ဘာကြောင့်လဲဆိုတာ ရှင်းပြဖို့ခက်ခဲပေမဲ့ အခွင့်အရေးတွေ လုံလုံလောက်လောက် မဖန်တီးနိုင်တာနဲ့ အဆုံးသတ် အားနည်းချက်တွေကြောင့်ဖြစ်ကြောင်း လုခ်ရှောက ပြောပါတယ်။
ဒါ့အပြင် ယုံကြည်မှုအားနည်းတာလည်း ဖြစ်နိုင်ပြီး တခါတလေ ဘောလုံးမှာ ဖြစ်လေ့ဖြစ်ထရှိကြောင်း၊ အကောင်းမြင်စိတ်နဲ့ ဆက်လက်ကြိုးပမ်းသွားရမှာဖြစ်ကြောင်း လုခ်ရှောက ပြောသွားပါတယ်။
ပရီးမီးယားလိဂ် အမှတ်ပေးဇယား အဆင့် ၈ ရောက်နေတဲ့ မန်ယူအသင်းဟာ ဗုဒ္ဓဟူးနေ့ မနက်ပိုင်းမှာ အက်စ်တန်ဗီလာကို အိမ်ကွင်းမှာ လက်ခံကစားသွားရမှာ ဖြစ်ပါတယ်။
Photo-Reuters
