စစ်ကိုင်းတိုင်း၊ ဟုမ္မလင်းမြို့နယ်၊ နားမော်ကျေးရွာမှာ ဒီဇင်ဘာ ၂၀ ရက် မနက်ပိုင်းက ဘုန်းကြီးကျောင်းတကျောင်း မီးလောင်ပြီး ကိုရင်တပါး သေဆုံးသွားကြောင်း သိရပါတယ်။
လွှစင်ကုန်းကျေးရွာနဲ့ နောင်ပိုအောင်ကျေးရွာက စစ်ဘေးရှောင်ပြည်သူ ၄၀၀ နီးပါး လာရောက်တိမ်းရှောင်နေတဲ့ နားမော် ဘုန်းတော်ကြီးကျောင်း မီးလောင်ပြာကျပြီး အသက် ၈ နှစ်အရွယ် ကိုရင်တပါး အသက်ဆုံးရှုံးခဲ့ကြောင်း ဒေသခံတွေဆီက သိရပါတယ်။
ဒေသခံ အမျိုးသားတဦးက “ကျောင်းဝင်းထဲမှာက စစ်ဘေးရှောင် ၄၀၀ နီးပါး လာရောက်ခိုလှုံနေတာ။ မနက် ၁ နာရီလောက် လောင်တာ။ မီးလောင်တာကတော့ တရားစခန်းဖွင့်တဲ့ ကျောင်းဆောင်ကြီး ပြာကျသွားတယ်။ ဘုန်းကြီးတွေနေတဲ့ အဆောင်ပေါ့။ အဲဒီအထဲနေတဲ့ ကိုရင်တပါးလည်း မီးလောင် အသက်ဆုံးသွားတယ်။ ဘယ်လိုစလောင်လဲ ဆိုတာကတော့ တိတိကျကျကို မသိရသေးဘူး” လို့ ပြောပါတယ်။
ဘုန်းတော်ကြီးကျောင်း မီးလောင်လို့ အသက် ၈ နှစ်အရွယ် ကိုရင်တပါး သေဆုံးတာနဲ့ ပတ်သက်ပြီး ဒေသခံတွေက ပေါ့ဆမီးကြောင့်လည်းကောင်း၊ ဒရုန်းနဲ့ ဗုံးပစ် တိုက်ခိုက်ခြင်းကြောင့်လည်းကောင်း အမျိုးမျိုး ပြောဆိုနေကြပေမဲ့ ဒီဗွီဘီအနေနဲ့ အတည်ပြုဖို့ ကြိုးစားနေဆဲ ဖြစ်ပါတယ်။
နားမော်ကျေးရွာဟာ ဟုမ္မလင်းမြို့နဲ့ ၁၀ မိုင်ကျော် အကွာအဝေးမှာ တည်ရှိကာ အိမ်ခြေ ၄၀၀ ကျော် တည်ရှိပြီး ရှမ်းနီတိုင်းရင်းသားအများစု နေထိုင်တဲ့ကျေးရွာ ဖြစ်ပါတယ်။
