ဧရာဝတီတိုင်း၊ ပုသိမ်မြို့နယ်မှာ အနောက်တောင်တိုင်းစစ်ဌာနချုပ်က တပ်ကြပ်တဦး ပုသိမ်မြို့နယ်ပကဖထံ အလင်းဝင်ရောက်လာတယ်လို့ မြို့နယ်ပြည်သူ့ကာကွယ်ရေးတပ်ဖွဲ့-ပုသိမ် ထံကနေ သိရပါတယ်။
အနောက်တောင်တိုင်းစစ်ဌာနချုပ်လက်အောက်ခံ စစ်လက်နက်တပ်ဆင်ရေးတပ်ခွဲ ၄၄၄ မှ တပ်ကြပ်တဦးဟာ ဒီဇင်ဘာ ၈ ရက်က ပုသိမ်မြို့နယ်ပကဖထံ အလင်းဝင်ရောက်လာတာလို့ ဆိုပါတယ်။
ပုသိမ်မြို့နယ် ပကဖမှ တာဝန်ရှိသူတဦးက “သူက ဒီဇင်ဘာ ၈ ရက်နေ့ ညနေမှာ ချိတ်ဆက်ပြီး အလင်းဝင်ရောက်လာခဲ့ပါတယ်။ ကျနော်တို့အဖွဲ့ သူ့ရဲ့ ကိုယ်ရေးရာဇဝင်အချက်အလက်တွေကို စစ်ဆေးပြီး ၉ ရက်နေ့မှာ လက်ခံခဲ့ပါတယ်။ ၁၀ ရက်နေ့မှာတော့ သူ့ကို လွတ်မြောက်နယ်မြေ တခုကို ကျနော်တို့ ပို့ဆောင်ပေးခဲ့တယ်။ ဒီနေ့မှာတော့ သူ့ကို ပြည်သူ့ရင်ခွင်နဲ့ ချိတ်ဆက်ပေးခဲ့ပြီးပြီးပေါ့။ သူက လက်နက်တော့ မပါပါဘူး။ စစ်ကောင်စီတပ်ဖွဲ့ဝင်တွေကော ရဲတပ်ဖွဲ့ဝင်တွေပါ ပြည်သူ့ရင်ခွင်ခိုလှုံကြဖို့ အထူးတိုက်တွန်းချင်ပါတယ်” လို့ပြောပါတယ်။
ပုသိမ်မြို့နယ်ပကဖက CDM ဝင်လာတဲ့ တပ်ကြပ်ရဲ့ နေစရာနဲ့ စားသောက်မှုတွေကို စီစဉ်ပေးခဲ့သလို ဂုဏ်ပြုဆုငွေ ၅ သိန်းကျပ်လည်း ချီးမြှင့်ခဲ့ပါတယ်။
စစ်အာဏာသိမ်းပြီးကတည်းက ပုသိမ်မြို့နယ်ပကဖထံ အလင်းဝင်လာတဲ့ ကာကွယ်ရေးနဲ့ ပြည်ထဲရေးဝန်ထမ်း ၇ ဦးအထိ ရှိလာပြီးလို့ မြို့နယ်ပြည်သူ့ကာကွယ်ရေးတပ်ဖွဲ့-ပုသိမ်က ထုတ်ပြန် ပါတယ်။
