အမေရိကန်ပြည်ထောင်စု တန်နက်ဆီပြည်နယ်မှာ ဒီဇင်ဘာ ၉ ရက်က ပြင်းထန်တဲ့ မိုးကြိုး မုန်တိုင်းတွေနဲ့ လေဆင်နှာမောင်း တိုက်ခတ်မှုကြောင့် အနည်းဆုံး လူ ၆ ဦး သေဆုံးခဲ့ပြီး ဒါဇင်နဲ့ချီတဲ့ လူတွေ ဒဏ်ရာရရှိခဲ့တဲ့အပြင် ပျက်စီးဆုံးရှုံးမှု အများအပြား ကြုံနေရကြောင်း ဒေသဆိုင်ရာ အရေးပေါ် ဝန်ဆောင်မှုအဖွဲ့တွေက ပြောပါတယ်။ 

ဒါ့အပြင် လူ ၂၃ ဦးကို ဆေးရုံမှာ ပို့ဆောင်ထားတယ်လို့ ဆိုပါတယ်။ လေဆင်နှာမောင်းဟာ မွန်းလွဲ ၁ နာရီ ၃၅ မိနစ် လောက်မှာ တိုက်ခတ်ခဲ့ကြောင်း ကလာ့ခ်စ် ဗီးလ် ရဲဌာနက ပြောပါတယ်။

ကလာ့ခ်စ်ဗီးလ် မြို့တော်ဝန် ဂျိုးပစ်ထ်စ် က လေဆင်နှာမောင်း တိုက်ခတ်ခဲ့မှုကို အတည်ပြုခဲ့ပြီး ညနေပိုင်း မိုးရွာခြင်းနဲ့ မိုးကြိုးပစ်ခြင်းတို့ကြောင့် နေရာအများအပြားမှာ အပျက်အစီးတွေ များပြားကြောင်း ကလာ့ခ်စ်ဗီးလ် ရဲတပ်ဖွဲ့က သတင်းထုတ်ပြန်ပါတယ်။ 

သေဆုံးသူတွေဟာ နက်ရှ်ဗီးလ် ဧရိယာမှာ လူ ၃ ဦးနဲ့ ကလာ့ခ်စ်ဗီးလ် မှာ ၃ ဦးတို့ဖြစ်ကြောင်း ABC သတင်းဌာန လက်အောက်ခံ WKRN အရ သိရပါတယ်။  

မွန့်ဂိုမာရီ၊ ဒေးဗစ်ဆင် နဲ့ ဆမ်နာ ခရိုင်တွေမှာ မုန်တိုင်းနဲ့ဆက်နွှယ်တဲ့ ပျက်စီးမှုတွေရှိခဲ့ပြီး ထောင်သောင်းချီတဲ့ ဒေသခံတွေ လျှပ်စစ်မီး မရဘဲဖြစ်နေပါတယ် ။ 

မွန့်ဂိုမာရီကောင်တီနဲ့ ကလာ့ခ်စ်ဗီးလ်မြို့မှ တာဝန်ရှိသူတွေဟာ ဓာတ်အားလိုင်းတွေ ပြတ်တောက်မှုအပါအဝင် ကြီးမားတဲ့ ပျက်စီးဆုံးရှုံးမှုတွေကို အကဲဖြတ်နေတာကြောင့် လမ်းတွေ ပေါ်မှာ မနေကြဖို့ ဒေသခံတွေကို တောင်းဆိုထားပါတယ်။ 

တန်နက်ဆီပြည်နယ်မှာ စနေနေ့ ညနေအထိ လူပေါင်း ၈၀၀၀၀ ကျော် လျှပ်စစ်မီး ပြတ်တောက်ခဲ့ကြောင်း  poweroutage.us  ဝက်ဆိုက်အရ သိရပါတယ်။  

Source/Photo - Reuters