ရခိုင်ပြည်နယ် တောင်ကုတ်နဲ့ ကျောက်ဖြူမြို့နယ်တွေမှာ ဒီဇင်ဘာ ၆ ရက်နဲ့ ၇ ရက်နေ့တွေက ဒေသခံပြည်သူ ၃ ယောက်ကို ULA/AA နဲ့ ဆက်စပ်တယ်လို့ စွပ်စွဲပြီး စစ်ကောင်စီတပ်က ဖမ်းဆီးသွားပါတယ်။
တောင်ကုတ်မြို့ သဇင်အပေါင်ဆိုင်ပိုင်ရှင် အသက် ၃၀ ကျော်အရွယ် ဦးအေးချမ်းကို ဒီဇင်ဘာ ၆ ရက် ညပိုင်းမှာ စစ်ကောင်စီတပ်သားတွေက ULA/AA နဲ့ ဆက်စပ်တယ်လို့ စွပ်စွဲပြီး လာရောက်ဖမ်းဆီးသွားကြတယ်လို့ တောင်ကုတ်မြို့ ဒေသခံတယောက်က ဒီဗွီဘီကို ပြောပါတယ်။
ဒါ့အပြင် ချောင်းကောက်ရပ်ကွက်က အသက် ၄၀ အရွယ် ဦးအောင်အောင်ကိုလည်း ဒီဇင်ဘာ ၇ ရက် ညပိုင်းမှာ စစ်ကောင်စီတပ်သားတွေက ULA/AA နဲ့ ဆက်စပ်တယ်လို့ စွပ်စွဲကာ ဖမ်းခေါ်သွားကြတယ်လို့ ဆိုပါတယ်။
ကျောက်ဖြူမြို့ စေတီယျရပ်ကွက်က အသက် ၃၄ နှစ်အရွယ် ဦးနိုင်ဝင်းကိုလည်း ဒီဇင်ဘာ ၆ ရက် ည ၈ နာရီလောက်မှာ စစ်ကောင်စီတပ်သား အင်အား ၂၀ လောက်က ULA/AA နဲ့ ဆက်စပ်မှုရှိတယ်လို့ စွပ်စွဲပြီး ဖမ်းဆီးသွားကြတယ်လို့ ကျောက်ဖြူမြို့ ဒေသခံတယောက်က ပြောပါတယ်။
ရခိုင်ပြည်နယ်အတွင်းမှာ ရက္ခိုင့်တပ်တော် (အေအေ) နဲ့ စစ်ကောင်စီတပ်တို့ တကျော့ပြန် တိုက်ပွဲတွေ ပြန်လည်ဖြစ်ပွားပြီးနောက် စစ်ကောင်စီဘက်က ဒေသခံပြည်သူ ၁၀၀ ကျော်လောက်ကို အေအေနဲ့ ဆက်စပ်တယ်လို့ သံသယမှုနဲ့ ဖမ်းဆီးခဲ့ကြတယ်လို့ ဒေသခံတွေဆီကနေ သိရပါတယ်။
