ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်၊ နမ့်ဖတ်ကာကျေးရွာအုပ်စုမှာ ဒီဇင်ဘာ ၆ ရက် မွန်းလွဲ ၁ နာရီကျော်က စစ်ကောင်စီတပ် လက်နက်ကြီးနဲ့ ပစ်ခတ်တာတွေကြောင့် ကလေးငယ်တဦး အပါအဝင် ၂ ဦး ထိခိုက်ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။
ကွတ်ခိုင်မြို့နယ်၊ နမ့်ဖတ်ကာကျေးရွာအုပ်စု မန်မိုင်ရွာမှာနေတဲ့ အသက် ၁ နှစ်ခွဲအရွယ် စိုင်းဇင်နဲ့ အသက် ၃၇ နှစ်အရွယ် စိုင်းနော် ဆိုသူတို့ လက်နက်ကြီးကျည်ကြောင့် ဒဏ်ရာရရှိကြပြီး နေအိမ်တလုံးလည်း ပျက်စီးသွားတယ်လို့ နမ့်ဖတ်ကာဒေသခံတွေဆီက သိရပါတယ်။
ကွတ်ခိုင်မြို့ခံ အမျိုးသားတဦးက “အခုက လူတော့ မသေဘူးပေါ့နော်။ ကလေးက လက်ထိတယ်၊ အကြီးကောင်က ဗိုက်နဲ့ လက်ပြင်ထိတယ်။ ပြီးခဲ့တဲ့အပတ်က ဟိုနောင်ရွာဘက်မှာ လူ ၃ ယောက်သေတယ်” လို့ ပြောပါတယ်။
ကွတ်ခိုင်မြို့နယ် တုံဆင့်အောက်ရွာမှာလည်း ပြီးခဲ့တဲ့ နိုဝင်ဘာ ၂၈ ရက် ည ၁၀ နာရီကျော်လောက်က လက်နက်ကြီးကျည် အိမ်ပေါ်ကို ကျရောက်လာတာကြောင့် မိသားစုဝင် ၆ ဦးထဲမှာ ၃ ဦး သေဆုံးသွားပြီး ကျန် ၃ ဦးကိုလည်း ဆေးရုံတင်ပို့ထားရတယ်လို့ သိရပါတယ်။
ရှမ်းပြည်နယ်မြောက်ပိုင်းမှာ ညီနောင်မဟာမိတ်အဖွဲ့တွေ ဖော်ဆောင်ခဲ့တဲ့ “၁၀၂၇ စစ်ဆင်ရေး” တလကျော်အတွင်းမှာပဲ စစ်ကောင်စီတပ်က ပစ်ခတ်နေတဲ့ လက်နက်ကြီးကျည် ထိမှန်တာကြောင့် ကွတ်ခိုင်မြို့နယ်ထဲမှာ အမျိုးသမီး ၅ ဦးနဲ့ ကလေး ၄ ဦး အပါအဝင် စုစုပေါင်း ၁၀ ဦး သေဆုံးပြီး ၁၅ ဦးထက်မနည်း ထိခိုက်ဒဏ်ရာ ရရှိထားတယ်လို့ ကွတ်ခိုင်မြို့ခံတွေဆီကနေ သိရပါတယ်။
