ကရင်ပြည်နယ်၊ ဘားအံမြို့နယ်၊ ဝဲကရင်ကျေးရွာအုပ်စု၊ ရွာသစ်ကုန်းရွာရှိ သမတ်ကွေ့ ကူးတို့ဆိပ်အနီး လှိုင်းဘွဲ့ချောင်းထဲမှာ နစ်မြုပ်နေတဲ့ ကားနဲ့ လူ ၂ ဦးကို နိုဝင်ဘာ ၅ ရက်က ပြန်လည်ဆယ်ယူနိုင်ခဲ့တယ်လို့ မြန်မာနိုင်ငံ လူမူကယ်ဆယ်ရေးအဖွဲ့ (ကရင်ပြည်နယ်) က ပြောပါတယ်။
နိုဝင်ဘာ ၄ ရက် မနက်ပိုင်းက ပရိုဘောက်ကားပေါ်မှာ အမျိုးသား ၂ ဦးနဲ့ အမျိုးသမီး ၁ ဦး လိုက်ပါလာတာဖြစ်ပြီး ဘားအံမြို့ပေါ်ကို မျက်စိဆေးခန်းပြသဖို့ သွားခဲ့ကြရင်း အပြန်လမ်းမှာ ရွာသစ်ကုန်းကနေ ဒေါ်လန်းရွာဘက်ကို ကားနဲ့ ကူးတို့ကူးချိန် မွန်းလွဲ ၂ နာရီခွဲခန့်က မတော်တဆဖြစ်ကာ နစ်မြုပ်သွားခဲ့တာ ဖြစ်ပါတယ်။
ကားကူးတို့ကူးနေချိန် ဆင်းပြီးကျန်နေခဲ့တဲ့ အမျိုးသမီးဖြစ်သူမှာ ဒဏ်ရာရရှိခြင်း မရှိဘူးလို့ သိရပြီး ရေထဲနစ်မြုပ်နေသူတွေကို ကယ်ဆယ်ရေးအသင်းတွေက ၂ ရက်ဆက်တိုက် ရှာဖွေခဲ့ရာ ချောင်းထဲကနေ တိုယိုတာ ပရိုဘောက်ကား ၁စီး၊ အသက် ၈၄ နှစ်အရွယ် အမျိုးသား ၁ ဦးနဲ့ အသက် ၅၆ နှစ်အရွယ် အမျိုးသား ၁ ဦးတို့ရဲ့ ရုပ်အလောင်းတွေကို ညနေ ၅ နာရီနဲ့ ည ၈နာရီခွဲတွေမှာ ရေငုပ်ရှာဖွေကယ်ဆယ်ရေးအဖွဲ့က ဆယ်ယူနိုင်ခဲ့ပါတယ်။
မြန်မာနိုင်ငံလူမှုကယ်ဆယ်ရေးအဖွဲ့ (ကရင်ပြည်နယ်) ရဲ့ သတင်းနဲ့ပြန်ကြားရေး တာဝန်ရှိသူတဦးက “ကားရေထဲကျသွားတာက နိုဝင်ဘာ ၄ ရက် ညနေပိုင်းမှာပါ။ အားလုံး ၃ ဦးပါတာ။ ကူးတို့ကူးနေချိန် အမျိုးသမီးဖြစ်သူက ဆင်းနေခဲ့တာ။ အမျိုးသား ၂ ဦးတော့ ကားထဲပါသွားတယ်။ နိုဝင်ဘာလ ၅ ရက် မနက် ၈ နာရီလောက်ကစပြီး ပြန်လည်ရှာဖွေခဲ့ပါတယ်။ ညနေ ၅ နာရီလောက်မှာ အသက် ၈၄ နှစ် တဦးကို ဆွဲထုတ်နိုင်ခဲ့ပါတယ်။ ကျန်တဦးနဲ့ ကားကိုတော့ ည ၈ နာရီခွဲလောက်မှာ ဆွဲတင်နိုင်ခဲ့ပါတယ်” လို့ ပြောပါတယ်။
အဆိုပါနေရာကို မြန်မာနိုင်ငံ လူမှုကယ်ဆယ်ရေးအဖွဲ့ (ကရင်ပြည်နယ်) နဲ့အတူ အရပ်ဘက် ကယ်ဆယ်ရေးအသင်းတွေဖြစ်တဲ့ ဒေါ်လန်း၊ ရွှေကျိုက်ပေါင်၊ ဝဲကရင်၊ သာမညအသင်း၊ သက်ဆိုင်ရာအဖွဲ့တွေက ပါဝင်ဆယ်ယူခဲ့ကြပါတယ်။
