မူဆယ်ခရိုင်၊ ကြူကုတ် (ပန်ဆိုင်း)မြို့နယ်၊ နမ့်တောင်းရွာအနီး နမ့်တောင်း-ဖာဖိတ် လမ်းပေါ်မှာ အောက်တိုဘာ ၁၀ ရက်နေ့ ညနေ ၃ နာရီလောက်က ဒေသခံ အမျိုးသား ၁ ဦး မိုင်းနင်းမိပြီး ခြေထောက်ပြတ် ဒဏ်ရာရခဲ့တယ်လို့ ဒေသခံတွေက ပြောပါတယ်။
“မိုးရွာတယ် ဆိုပြီး ဟို ကွင်းလမ်းကနေ မသွားချင်လို့ မိုင်းမရှိတော့ဘူး ထင်လို့ သွားတာတဲ့။ အဲဒါ ပြန်နင်းမိတာ။ ဒီတခါနဲ့ဆို အဲဒီနေရာမှာ မိုင်း ၄ ခါ ပေါက်ပြီ” လို့ ဒေသခံတဦးက ပြောပါတယ်။
နမ့်တောင်း-ဖာဖိတ်ကြားမှာ အရင်တလောက စစ်တပ်က လမ်းဖြတ်တောက် တူးဆွပြီး မိုင်းအများကြီး ထောင်ထားတာလို့ ဆိုပါတယ်။
ထိခိုက်ဒဏ်ရာရသူက အသက် ၃၀ ဝန်းကျင်အရွယ် ဖာဖိတ်ရွာခံ လရှီးနော် ဖြစ်တယ်လို့ ဆိုပါတယ်။
“ခုက မူဆယ် ဆေးရုံရောက်နေတယ်။ မနေ့က သယ်သွားတာ” လို့ မျက်မြင်ဒေသခံ နောက်တဦးက ပြောပါတယ်။
အဲဒီနေရာမှာ ပထမအကြိမ် TNLA စစ်သား ၁ ဦး၊ ဒုတိယတကြိမ်မှာ နမ့်ဟွယ် ၁၀၅ မိုင်ဘက်ကနေ ဖာဖိတ်ဘက် ဗြုံးအုတ် လာပို့သူ ၁ ဦး၊ တတိယတကြိမ်မှာတော့ ပန်ဆိုင်းက တရုတ်အမျိုးသား ၁ ဦး ဖာဖိတ်ဘက် သူ့ကြံခင်း သွားကြည့်ရာမှ မိုင်းနင်းမိခဲ့ပြီး အခု တကြိမ်နဲ့ဆို ၄ ကြိမ်ရှိပြီလို့ ဆိုပါတယ်။
ပြီးခဲ့တဲ့ ဩဂုတ် ၁၅ ရက်မှာ စစ်တပ်က အဲဒီလမ်းကို စက်ယန္တရား အသုံးပြု ဖျက်ဆီးခဲ့ပြီးနောက် TNLA နဲ့ စစ်ကောင်စီတို့ တိုက်ပွဲဖြစ်ပွားခဲ့ဖူးတဲ့နေရာ ဖြစ်ပါတယ်။
